LESENI 34
Edena Dala ai Iehova Lalokau Henia Karana Ita Hahedinaraia Diba?
Baibel oi stadilaia negana amo oi mamia oi be Dirava kahirakahira oi lao noho, a? Oi ura ia ida emu hetura karana oi hagoadaia noho, a? Bema oibe, namona be oi laloatao Iehova ese ia oi lalokau henia bada karana ia itaia neganai, oi do ia lalokau henia bada bona naria danu. Edena dala ai oi hahedinaraia diba Dirava oi lalokau henia?
1. Edena dala ai ita hahedinaraia Iehova ita lalokau henia?
Iehova lalokau henia karana be ia badinaia karana amo ita hahedinaraia. (1 Ioane 5:3 duahia.) Dirava be taunimanima ia doria lasi iena hereva idia badinaia totona. To, ia do ita badinaia eiava lasi ena abia hidi be ita ta ta dekenai ia rakatania. Dahaka dainai? Badina Iehova ia ura mai ‘kudouna ibounai ida ia ita badinaia.’ (Roma 6:17) Unai ena anina be, Dirava ia ura ena hereva oi badinaia, to namo lasi oi laloa iena ura dainai do oi karaia, to oi karaia badina ia oi lalokau henia. Inai buka ena kahana 3 bona 4 ese oi do ia durua Iehova ia hamoalea gaudia oi karaia, bona ia moalelaia lasi gaudia oi dadaraia totona, unai amo oi hahedinaraia ia oi lalokau.
2. Dahaka dainai Iehova lalokau henia karana hahedinaraia totona be mai ena hekwarahi?
“Kara maoromaoro tauna ese ia davaria hisihisi be momo.” (Salamo 34:19) Ita ibounai ita hekwarahi badina ita be goevadae lasi taudia. Danu moni ena hekwakwanai, kara gageva, bona mauri ena hekwakwanai ma haida ita davaria. Iseda mauri lalonai metau ita davaria neganai, do ia auka Iehova ena ura ita karaia totona. Badina do ita laloa dala kererena badinaia karana be hekwarahi lasi. To mai abidadama ida Iehova ese ia gwauraia gaudia oi karaia neganai, oi hahedinaraia ia lalokau henia. Bona oi hamomokania ia oi badinaia noho. Bona ia ese oi dekenai badinaia karana do ia hahedinaraia. Oi do ia rakatania lasi.—Salamo 4:3 duahia.
DIBA MA HAIDA ABIA
Oi tahua dahaka dainai Iehova dekenai emu badinaia karana be mai anina bada, bona unai oi karaia totona oi do idia durua gaudia oi dibaia.
3. Satani ese oi totona ia gwauraia samania herevana
Baibel bukana Iobu ese ia hahedinaraia hegeregerena, Satani ena samania hereva be Iobu sibona dekenai lasi, to Iehova idia hesiai henia taudia ibounai dekenai danu. Iobu 1:1, 6–2:10 duahia, bena inai henanadai herevalaia:
Iobu ese Iehova ia kamonai henia ena badina be Satani ese edena bamona ia gwauraia?—Iobu 1:9-11 itaia.
Satani ese taunimanima ibounai bona oi dekenai dahaka samania herevana ia gwauraia?—Iobu 2:4 itaia.
Iobu 27:5b duahia, bena inai henanadai herevalaia:
Edena dala ai Iobu ia hamomokania Iehova ia lalokau henia bada?
Iobu be ena badinaia karana amo ia hamomokania Iehova ia lalokau henia
Iseda badinaia karana amo ita hamomokania Iehova ita lalokau henia
4. Iehova ena kudouna oi hamoalea
Aonega Herevadia 27:11 duahia, bena inai henanadai herevalaia:
Oi aonega bona Iehova oi kamonai henia neganai, iena hemami be edena bamona? Dahaka dainai?
5. Iehova badinaia karana oi hahedinaraia diba
Iehova lalokau henia karana ese ita ia durua dainai ma haida dekenai ia ita herevalaia. Iseda badinaia karana ese ita ia durua dainai unai bamona ita karaia, ena be nega haida ia auka. VIDIO itaia, bona henanadai herevalaia.
Nega haida ia auka ma haida dekenai Iehova oi herevalaia totona, a?
Vidio ai dahaka ese Grayson ia durua ena gari karana ia hanaia totona?
Do ia auka lasi Iehova ita badinaia totona, bema ia lalokau henia gaudia ita lalokau henia bona ia inai henia gaudia ita inai henia. Salamo 97:10 duahia, bena inai henanadai herevalaia:
Emu stadi ai oi dibaia hegeregerena, edena gaudia be Iehova ese ia lalokau henia? Bona edena gaudia ia inai henia?
Edena dala ai namo gaudia oi lalokau henia bona dika gaudia oi inai henia karana do oi dibaia?
6. Iehova ita kamonai henia neganai namo ita davaria
Iehova kamonai henia karana be hanaihanai mai ena namo. Isaia 48:17, 18 duahia, bena inai henanadai herevalaia:
Oi abia dae Iehova be hanaihanai ia diba dahaka be namo ita totona, a? Dahaka dainai?
Baibel oi stadilaia bona Dirava momokani, Iehova oi dibaia karana ese edena dala ai oi ia durua?
HAIDA IDIA GWAU: “Egu kara be Dirava ese ia laloa bada lasi.”
Edena siri amo do oi hahedinaraia iseda kara ese Iehova ia hamoalea eiava hahisia diba?
POINT BADANA
Herevana metau idia vara, to Iehova ena hereva oi badinaia bona emu kamonai karana ese do ia hahedinaraia ia oi lalokau henia.
Riviu
Iobu ena haheitalai amo dahaka oi dibaia?
Edena dala ai do oi hamomokania Iehova oi lalokau henia?
Dahaka ese oi do ia durua Iehova oi badinaia noho totona?
REFERENS ITAIA
Iehova bona kongrigeisen oi badinaia diba daladia itaia.
Satani ese taunimanima dekenai ia gwauraia samania herevadia oi duahia.
“Iobu be Kara Maoromaoro Ia Badinaia” (Baibel—Dahaka Sivarai Ia Herevalaia? kahana 6)
Matamata taudia danu ese edia lalokau Iehova totona idia hahedinaraia dalana oi itaia.
Edena dala ai matamata tauna ta be Dirava ia badinaia diba, ena be matamata taudia ma haida ese idia doria kerere ia karaia totona?