LESENI 46
Dahaka Dainai Ita Gwauhamata Bona Ita Bapatiso?
Oi be Iehova dekenai oi guriguri bona gwauhamata oi karaia ia sibona do oi tomadiho henia bona emu mauri lalonai ena ura do oi atoa guna. (Salamo 40:8) Unai murinai bapatiso oi abia. Unai kara amo haida dekenai oi hahedinaraia oi be gwauhamata oi karaia vadaeni. Iehova dekenai iseda mauri ita gwauhamatalaia be mai anina bada, badina unai abia hidi ese emu mauri do ia haidaua. Dahaka ese emu lalona do ia veria unai bamona abia hidi oi karaia totona?
1. Dahaka ese ta ena lalona ia veria gwauhamata ia karaia totona?
Iehova dekenai gwauhamata ita karaia badina ia ita lalokau henia. (1 Ioane 4:10, 19) Baibel ia gwau: “Iehova emu Dirava do oi lalokau henia mai emu kudouna ibounai, mai emu mauri ibounai, mai emu lalona ibounai, bona mai emu goada ibounai ida.” (Mareko 12:30) Namo lasi ita hereva sibona Dirava ita lalokau henia, to namona be iseda kara amo ita hahedinaraia danu. Tau bona hahine be ta ta idia lalokau henia dainai idia headava, unai hegeregerena ita danu be Iehova ita lalokau henia dainai ia dekenai gwauhamata ita karaia bona ita bapatiso.
2. Iehova ese idia bapatiso Witnes taudia dekenai dahaka hahenamo ia henia?
Bapatiso oi abia neganai, Iehova ena ruma bese namona ai do oi noho. Dala idauidau ai iena lalokau do oi mamia, bona iena turana namona ai do oi lao. (Malaki 3:16-18 duahia.) Iehova be emu Tamana bona tanobada hegegemadai oi be mai emu tadikaka bona taihu. Idia ese Dirava idia lalokau henia bona oi idia lalokau henia danu. (Mareko 10:29, 30 duahia.) To, kara haida do oi karaia guna bena bapatiso do oi abia. Iehova do oi dibaia, oi lalokau henia, bona ena Natuna do oi abidadama henia. Dokonai, Iehova dekenai emu mauri do oi gwauhamatalaia. Bema unai oi karaia bona bapatiso oi abia, oi be mauri hanaihanai oi abia diba. Baibel ia gwau: “Hari umui ia hamauria noho gauna . . . be bapatiso karana.”—1 Petero 3:21.
DIBA MA HAIDA ABIA
Iehova dekenai gwauhamata oi karaia bona bapatiso oi abia be gau badana ena badina oi dibaia.
3. Namona be abia hidi ita karaia daika do ita hesiai henia
Israela taudia edia nega ai, haida idia laloa Iehova bona dirava koikoina Bala, be nega tamona idia tomadiho henidia diba. To Iehova ese peroveta tauna Elia ia siaia edia lalohadai kererena ia hamaoromaoroa totona. King Taudia Ginigunana 18:21 duahia, bena inai henanadai herevalaia:
Israela taudia be dahaka abia hidi do idia karaia?
Israela taudia bamona, ita danu ese abia hidi do ita karaia daika do ita tomadiho henia totona. Luka 16:13 duahia, bena inai henanadai herevalaia:
Dahaka dainai Iehova, tau ta eiava gau ma ta be nega tamona ita tomadiho henidia diba lasi?
Edena dala ai Iehova dekenai ita hahedinaraia, abia hidi ita karaia ia do ita tomadiho henia?
4. Iehova ese oi ia lalokau henia karana oi laloa dobu
Iehova ese ita dekenai harihari gaudia namodia momo herea ia henia. Ia dekenai dahaka do ita henia diba? VIDIO itaia.
Edena dala haida ai Iehova ese oi dekenai lalokau ia hahedinaraia? Salamo 104:14, 15 bona 1 Ioane 4:9, 10 duahia, bena inai henanadai herevalaia:
Iehova ese oi dekenai ia henia harihari gaudia amo, edena oi laloa bada?
Unai harihari gaudia dainai emu hemami Ia dekenai be edena bamona?
Ta ese ita dekenai ia henia harihari gauna ita ura henia bada neganai, ita ura unai tauna dekenai tanikiu karana ita hahedinaraia. Deuteronomi 16:17 duahia, bena inai henanadai herevalaia:
Iehova ese oi totona ia karaia gaudia ibounai oi laloa neganai, oi ura ia dekenai dahaka do oi henia?
5. Emu mauri oi gwauhamatalaia karana ese hahenamo momo do ia mailaia
Taunimanima momo idia abia dae, ladana bada, moni gaukara namona, eiava moni ese idia dekenai moale do ia henia. Unai be momokani, a? VIDIO itaia, bona henanadai herevalaia.
Vidio ai, tadikaka be soka gadara ia ura henia bada, to dahaka dainai ia rakatania?
Abia hidi ia karaia ena mauri be soka dekenai lasi, to Iehova dekenai do ia gwauhamatalaia. Oi laloa ia be abia hidi maorona ia karaia, a? Dahaka dainai?
Aposetolo Paulo be Keristani tauna ai ia do lao lasi neganai, ia be dagi bada gaukarana ta ia karaia. Ia be ladana bada tisa ta ena henunai Iuda ena taravatu ia stadilaia. To, Paulo be Keristani tauna ai ia lao totona, unai ia rakatania. Ia lalohisihisi, a? Filipi 3:8 duahia, bena inai henanadai herevalaia:
Paulo be Keristani tauna ai ia lao neganai, dahaka dainai ia gwau guna ia karaia gauna be “momoru sibona”?
Unai gaudia ia rakatania murinai, dahaka hahenamo ia davaria?
Oi laloa dahaka ese emu mauri do ia hanamoa, Iehova ena hesiai gaukara eiava oi sibona emu ura gaukarana ta?
Paulo be Keristani tauna ai ia lao neganai, ia abia hahenamo ese ia rakatania gaudia idia hereaia
HAIDA IDIA GWAU: “Lau diba inai be hereva momokani, to egu lalona lau do hadaia lasi bapatiso lau abia totona.”
Dahaka dainai oi laloa Iehova dekenai emu mauri oi gwauhamatalaia be maoro?
POINT BADANA
Lalokau dainai Iehova dekenai iseda mauri ita gwauhamatalaia bona bapatiso ita abia.
Riviu
Dahaka dainai mai iseda kudouna ibounai ida Iehova ita lalokau henia bona tomadiho henia be maoro?
Iehova ese edena dala ai ena bapatiso Witnes taudia ia hanamodia?
Oi ura Iehova dekenai emu mauri oi gwauhamatalaia, a?
REFERENS ITAIA
Miusiki gadaralaia hahine bona heau helulu tauna ese Iehova dekenai edia mauri idia gwauhamatalaia ena badina do oi itaia.
Matamata Taudia Edia Henanadai—Dahaka do Lau Karaia Egu Mauri Dekenai—Laloa Lou (6:54)
Gwauhamata oi karaia ena badina ma haida oi laloa.
“Dahaka Dainai Iehova Dekenai Oi Gwauhamata be Namo?” (Gima Kohorona, January 15, 2010)
Inai miusiki vidio lalonai Iehova dekenai edia mauri idia gwauhamatalaia taudia edia moale do oi itaia.
Inai sivarai ladana “Lagani Momo Lalonai Lau Laloa, ‘Ita Mauri Noho Ena Badina be Dahaka?’” lalonai, hahine ta be mai anina bada gaudia ia laloa namonamo totona heduru ia abia dalana do oi dibaia.
“Baibel ese Mauri Ia Haidaua” (Gima Kohorona, November 1, 2012)