LESENI 47
Oi Hegeregere Bapatiso Abia Totona, A?
Emu Baibel stadi amo Iehova dekenai gau momo oi dibaia vadaeni. Oi dibaia gaudia oi badinaia dainai emu mauri lalonai gau haida oi haidaua. To, reana gau haida ese oi idia koua dainai oi mamia ia auka Iehova dekenai emu mauri oi gwauhamatalaia bona bapatiso oi abia totona. Inai leseni ai bapatiso oi ura abia neganai, do idia vara koua gaudia bona hanaia daladia do ita herevalaia.
1. Gau ibounai oi diba murinai bapatiso do oi abia, a?
Bapatiso oi abia totona, “hereva momokani ena diba maoromaoro” oi abia be namo. (1 Timoteo 2:4) To, namo lasi oi laloa, Baibel amo taunimanima edia henanadai ibounai oi haerelaia diba murinai, bapatiso oi abia diba. Lagani daudau idia bapatiso vadaeni Keristani taudia danu be diba idia do abia noho. (Kolose 1:9, 10) To, Baibel ena hahediba hereva badadia oi lalopararalaia be gau badana. Kongrigeisen elda taudia ese oi do idia durua, unai amo do oi diba bema oi dibaia gaudia be hegeregere.
2. Bapatiso oi do abia lasi neganai, dahaka gaudia oi karaia be namo?
Bapatiso oi do abia lasi neganai, namona be oi “helalo-kerehai, bona Dirava dekenai [oi] giroa.” (Kara 3:19 duahia.) Unai ena anina be emu kerere dainai oi sori bona Iehova oi noia emu dika do ia gwauatao. Danu kara dika oi dadaraia, bona Dirava ia moalelaia mauri dalana oi badinaia. Ma danu, Keristani heboudia dekenai oi lao bona kongrigeisen taudia ida haroro gaukara oi karaia matamaia.
3. Dahaka dainai gari karana ese oi ia koua lasi be namo?
Haida idia gari badina idia laloa Iehova dekenai idia karaia gwauhamatana do idia badinaia diba lasi. Momokani, nega haida kerere do oi karaia, Baibel ese ia gwauraia abidadama tatau bona hahine haida bamona. To, Iehova ia gwau lasi ia idia tomadiho henia taudia be do idia goevadae. (Salamo 103:13, 14 duahia.) Lasi, to oi gaukara goada neganai, Iehova ia moale! Oi do ia durua. Oibe, Iehova ia gwauhamata, gau ta ese “ena lalokau . . . amo ita ia hapararaia diba lasi.”—Roma 8:38, 39 duahia.
DIBA MA HAIDA ABIA
Do oi itaia Iehova oi diba namonamo bona iena heduru oi abia dae neganai, bapatiso urana idia koua gaudia do oi hanaia diba.
4. Iehova oi diba namonamo
Iehova be edena bamona do oi diba namonamo, bena gabeai bapatiso oi abia? Namona be Iehova oi diba namonamo, unai amo oi lalokau henia bona oi ura ia oi hamoalea. VIDIO itaia bona tanobada hegegemadai, Baibel stiuden taudia ese unai idia karaia dalana do oi dibaia. Bona henanadai herevalaia.
Vidio ai, dahaka ese haida ia durua unai amo bapatiso totona idia hegaegae?
Roma 12:2 duahia, bena inai henanadai herevalaia:
Baibel ena hahediba herevadia haida dekenai oi daradara, a? Eiava oi laloa Iehova ena Witnes taudia be hereva momokani idia hadibaia, a?
Bema oi daradara, dahaka do oi karaia?
5. Bapatiso urana idia koua gaudia oi hanaia
Ita ura Iehova dekenai iseda mauri ita gwauhamatalaia bona bapatiso ita abia neganai, hekwakwanai haida do ita davaria. Haheitalai ta itaia totona, VIDIO itaia, bona henanadai herevalaia.
Vidio ai, Narangerel ese dahaka koua gaudia ia hanaia unai amo Iehova ia hesiai henia diba?
Edena dala ai Iehova ia lalokau henia karana ese ia durua koua gaudia ia hanaia totona?
Aonega Herevadia 29:25 bona 2 Timoteo 1:7 duahia, bena inai henanadai herevalaia:
Dahaka ese ita dekenai goada ia henia koua gaudia ita hanaia totona?
6. Iehova ena heduru do oi abidadama henia
Iehova ese oi do ia durua, unai amo ia oi hamoalea diba. VIDIO itaia, bona henanadai herevalaia.
Vidio ai, dahaka dainai Baibel stiuden be bapatiso ia do abia lasi?
Dahaka ia dibaia, unai amo ena abidadama Iehova dekenai ia hagoadaia?
Isaia 41:10, 13 duahia, bena inai henanadai herevalaia:
Dahaka dainai oi diba momokani oi karaia gwauhamatana oi hagugurua diba?
7. Iehova ena lalokau dainai oi tanikiu henia bada
Nega ibounai Iehova ese oi ia lalokau henia karana oi laloa neganai, do oi ura bada ia oi tanikiu henia bona iena hesiai gaukara oi karaia ela bona hanaihanai. Salamo 40:5 duahia, bena inai henanadai herevalaia:
Iehova ese oi ia henia hahenamo idauidau amo edena oi laloa bada?
Peroveta tauna Ieremia ese Iehova bona ena hereva ia lalokau henia bada, bona Iehova ena ladana ai ia gaukara ena hahenamo ia laloa bada. Ieremia ia gwau: “Emu hereva dainai lau moale bada, badina . . . Dirava Iehova e, lau be emu ladana ai gaukara lau karaia.” (Ieremia 15:16) Inai henanadai haerelaia:
Dahaka dainai Iehova ena Witnes tauna ta ai oi lao be hahenamo hereadaena ta?
Oi ura bapatiso bona Iehova ena Witnes tauna ta ai oi lao, a?
Gau haida ese oi idia koua dainai unai oi do karaia lasi, a?
Oi laloa dahaka oi karaia be namo emu tahua gauna, bapatiso, oi abia totona?
HAIDA IDIA GWAU: “Lau gari badina lau laloa bapatiso murinai, reana lau karaia gwauhamata do lau hagugurua diba lasi.”
Unai bamona hemami oi abia danu, a?
POINT BADANA
Iehova ena heduru amo koua gaudia oi hanaia diba bena bapatiso do oi abia.
Riviu
Baibel amo gau ibounai oi diba guna bena bapatiso do oi abia, a?
Dahaka gaudia be emu mauri ai oi haidaua guna be namo bena oi bapatiso diba?
Dahaka dainai gari karana ese oi ia koua lasi be namo?
REFERENS ITAIA
Emu abia hidi bapatiso abia totona ena badina oi tahua be namo.
“Oi Hegeregere Bapatiso Oi Abia Totona, A?” (Gima Kohorona, March 2020)
Oi idia koua gaudia hanaia dalana oi dibaia.
“Dahaka ese Lau ia Koua Lau Bapatiso Totona?” (Gima Kohorona, March 2019)
Tau ta be bapatiso ia abia totona hekwakwanai badadia haida ia hanaia diba dalana oi itaia.
Matamanai tau ta ladana Ataa ia ura lasi bapatiso ia abia. To dahaka ese ena lalona ia veria dainai unai mai anina bada abia hidi ia karaia dalana oi itaia.