LESENI 38

Mauri be Harihari Gauna Dainai Oi Laloa Bada

Printaia Gauna

Ita mauri dainai gau namodia momo ita karaia bona moalelaia diba. Ena be hekwakwanai ita davaria, to nega haida mauri ai ita karaia gaudia ita moalelaia diba. Edena dala ai ita hahedinaraia harihari gauna, mauri ita laloa bada? Bona unai ita karaia ena badina badana be dahaka?

1. Dahaka dainai mauri ita laloa bada be namo?

Namona be mauri ita laloa bada badina unai be iseda lalokau Tamana, Iehova, ena harihari gauna. Ia be “mauri ena badina”—ia ese mauri gaudia ibounai ia havaraia. (Salamo 36:9) “Ia ese taunimanima ibounai dekenai mauri, laga bona gau ibounai ia henia.” (Kara 17:25, 28) Iehova ese mauri durua gaudia ia henia ita mauri noho totona. To unai sibona lasi, mauri ita moalelaia totona ia ese gau namodia momo ia karaia.—Kara 14:17 duahia.

2. Edena dala ai Iehova dekenai do ita hahedinaraia harihari gauna mauri ita laloa bada?

Emu sinana ena bogana lalonai oi do noho neganai, Iehova ese oi ia naria. Dirava ena heduru amo ena hesiai tauna ta Davida, ia gwau: “Egu sinana ena bogana ai lau vara matamaia neganai, lau oi itaia.” (Salamo 139:16) Iehova ese emu mauri ia laloa bada. (Mataio 10:29-31 duahia.) Iehova do ia lalohisihisi bada bema ta be mai ena ura ida, ia sibona ena mauri eiava ma ta ena mauri ia kokia.a (Esodo 20:13) Danu Iehova do ia lalohisihisi bema anina lasi gauna ta dainai iseda mauri ita haboioa o haida edia mauri gimaia karana ita laloa bada lasi. Iseda mauri ita naria namonamo bona haida edia mauri ita matauraia neganai, ita hahedinaraia harihari gauna hereadaena mauri, ita laloa bada.

DIBA MA HAIDA ABIA

Harihari gauna mauri laloa bada karana oi hahedinaraia daladia ma haida mani oi laloa.

3. Emu helt oi naria namonamo

Keristani taudia be Iehova dekenai edia mauri idia gwauhamatalaia dainai idia ura edia mauri ibounai lalonai ia idia hesiai henia. Unai be hegeregere edia tauanina be boubou gauna bamona Dirava dekenai idia henia. Roma 12:1, 2 duahia, bena inai henanadai herevalaia:

Dahaka ese oi ia durua emu mauri o helt oi naria namonamo totona?
Unai oi karaia totona dala haida be dahaka?

Rogorogo hahine ta be ena doketa ida ia herevahereva.

4. Dika o mase ia vara lasi totona oi karaia gaudia dekenai oi naria namonamo

Baibel ese ita ia hagoadaia dika idia havaraia karadia ita dadaraia. VIDIO itaia emu seifti totona gau haida oi dibaia.

VIDIO: Seifti Laloa Bada (8:34)

Aonega Herevadia 22:3 duahia, bena oi bona ma haida emui seifti dalana herevalaia, hegeregere . . .

emu ruma ai.
emu gaukara gabuna ai.
oi gadara neganai.
motuka oi taria o guia neganai.

Tau ta be motuka lalonai sit belt ia atoa noho.

5. Sinana ena bogana ai ia noho natuna ena mauri matauraia

Rogorogo hahine ta be ena bogana ia dahua noho.

Davida ese Iehova ena lalohadai, ia vara lasi natuna ena mauri bona ena tubu dalana dekenai ia herevalaia. Salamo 139:13-17 duahia, bena inai henanadai herevalaia:

Iehova ena matana ai, ta ena mauri be sinana ia rogorogo negana amo ia matamaia, eiava ia mara negana amo ia matamaia?

Iehova ena taravatu Israela taudia totona ese sinadia bona bogana lalonai ia noho beibi ia gimaia. Esodo 21:22, 23 duahia, bena inai henanadai herevalaia:

Bema tau ta be ia diba lasi bona ia karaia gauna ta ese sinana ena bogana ai ia noho beibi ia hamasea, Iehova ese ia be edena bamona do ia laloa?
To bema ta be mai ena ura ida unai ia karaia, Iehova ena hemami be edena bamona?b
Dirava ena lalohadai be edena bamona oi laloa?

VIDIO itaia.

VIDIO: Dirava Tohotohoa—Mauri Oi Laloa Bada (5:00)

Mauri ia laloa bada hahine danu be reana do ia mamia dala tamona be ena bogana ai beibi do ia hamasea. Iosua 20:3 duahia, bena inai henanadai herevalaia:

Bema hahine ta be haida edia hereva dainai ia ura ena bogana ai ia noho beibi ia hamasea, daika dekenai heduru ia abia be namo? Dahaka dainai?

HAIDA IDIA GWAU: “Hahine be mai ena maoro ia abia hidi bogana ai ia noho natuna do ia hamasea eiava lasi—unai be ena tauanina.”

Dahaka dainai oi diba momokani sinana bona ia vara lasi beibi edia mauri be Iehova ese ia laloa bada?

POINT BADANA

Baibel ese ita ia hadibaia, Iehova ia henia harihari gauna mauri, ita ura henia, matauraia bona gimaia. Anina be iseda mauri bona ma haida edia mauri danu.

Riviu

Dahaka dainai Iehova ese taunimanima edia mauri ia laloa bada?
Bema tau ta be mai ena ura ida ma ta ena mauri ia kokia, Iehova ena hemami be edena bamona?
Dahaka dainai harihari gauna, mauri oi laloa bada?

Leseni ia ore deit:

Tahua Gauna

Emu mauri o helt oi naria diba dalana ta oi laloa.

Gau ma haida:

Emu tahua gauna ma ta

REFERENS ITAIA

Mauri be Iehova ena harihari gauna dainai edena dala ai ia ita tanikiu henia diba?

Ane 141—Mauri be Harihari Gauna (2:41)

Inai henanadai ena haere oi tahua, Bogana ai beibi ia hamasea hahine ena kerere be Dirava ese do ia gwauatao diba, a?

“Bogana Lalonai Beibi Hamasea Karana Dekenai Baibel ena Hereva be Dahaka? (Websait atikol)

Dirava ena lalohadai mauri dekenai ese ita ia durua moale kara maorodia ita abia hidi dalana oi dibaia.

“‘Spot Gadara Dikadia’ Oi Karaia be Namo, A?” (Noga!, October 8, 2000)

Bema tau ta be sibona hamasea lalohadaina ia abia be edena bamona? Mani Baibel ese ia henia heduru dalana oi itaia.

“Lau Ura Mase—Sibona Hamasea Lalohadaina Lau Abia Neganai, Baibel ese Lau Ia Durua Diba, A?” (Websait atikol)

a Iehova ese idia lalometau taudia ia lalodia bada. (Salamo 34:18) Idia lalohisihisi bada dainai sibona hamasea lalohadaina idia abia taudia edia hemami be Dirava ese ia lalopararalaia, bona ia ura idia ia durua. Dirava ena heduru amo ta ese sibona hamasea lalohadaina ia dadaraia dalana oi dibaia totona, inai leseni ena Referens Itaia kahana ai, atikol ladana, “Lau Ura Mase—Sibona Hamasea Lalohadaina Lau Abia Neganai, Baibel ese Lau Ia Durua Diba, A?” oi duahia.

b Namo lasi bogana lalonai beibi idia hamasea hahinedia ese edia kerere idia lalohisihisilaia momo, badina Iehova ese edia dika ia gwauatao diba. Heduru hereva haida totona, inai leseni ena Referens Itaia kahana ai atikol ladana, “Bogana Lalonai Beibi Hamasea Karana Dekenai Baibel ena Hereva be Dahaka?” oi itaia.