Keristani Taudia Edia Lalohadai Alkahol Dekenai be Dahaka?

Tanobada ibounai dekenai, taunimanima edia lalohadai alkahol dekenai be idauidau. Haida be edia turadia ida idia noho neganai alkahol idia inua. Haida be alkahol idia dadaraia. Ma haida be idia inua ela bona idia kekero. To Baibel ena lalohadai alkahol dekenai be dahaka?

1. Alkahol ita inua be kerere, a?

Baibel ia gwau lasi alkahol ita inua be kerere. To, Dirava amo idia mai harihari gau namodia ibounai ia herevalaia neganai, “lalona ia hamoalea wain” ia gwauraia danu. (Salamo 104:​14, 15) Bona Baibel ese ia gwauraia abidadama tatau bona hahine haida be alkahol idia inua danu.—1 Timoteo 5:23.

2. Alkahol idia ura inua taudia dekenai Baibel ena sisiba be dahaka?

Iehova ese alkahol momo inua bona kekero karana ia taravatua. (Galatia 5:21) Baibel ia gwau: “Wain momo idia inua taudia . . . huanai umui noho lasi.” (Aonega Herevadia 23:20) Unai dainai, bema ita sibona o ma haida ida ita ura inuinu, namo lasi alkahol momo ita inua bena ita kekero, bona iseda lalohadai, hereva bona kara ita biagua namonamo lasi, eiava ita gorere. Bema iseda inuinu karana ita biagua diba lasi, alkahol ita rakatania momokani be namo.

3. Edena dala ai haida edia abia hidi alkahol dekenai ita matauraia diba?

Ta be alkahol do ia inua eiava lasi ena abia hidi be ia sibona ese do ia karaia. Namo lasi alkahol sisina ia ura inua tauna ita hahemaoro henia, eiava ia ura lasi inua tauna ita doria. (Roma 14:10) Danu, abia hidi do ita karaia alkahol ita inua lasi totona, bema ita diba unai ese haida do ia hahekwakwanaia. (Roma 14:21 duahia.) Namo lasi ‘sibona eda namo ita tahua, to namona be ma ta ena namo ita tahua.’—1 Korinto 10:​23, 24 duahia.

DIBA MA HAIDA ABIA

4. Abia hidi oi karaia alkahol oi inua eiava lasi

Alkahol inua karana dekenai Iesu ena lalohadai be dahaka? Haere diba totona Iesu ese ia karaia hoa kara ginigunana mani oi laloa. Ioane 2:​1-11 duahia, bena inai henanadai herevalaia:

• Unai hoa karana amo, Iesu ena lalohadai alkahol bona idia inua taudia dekenai dahaka ita dibaia?

• Iesu be alkahol inua karana ia gwauraia dika lasi dainai, Keristani tauna ese alkahol ia inua tauna be edena bamona ia laloa be namo?

Ena be Keristani tauna ese alkahol ia inua diba, to hanaihanai unai bamona ia karaia be aonega karana lasi. Aonega Herevadia 22:3 duahia, bena alkahol do oi inua eiava lasi ena badina haida oi laloa:

• Motuka oi taria o masini ta oi gaukaralaia.

• Oi rogorogo.

• Doketa ia gwau alkahol oi inua lasi.

• Alkahol momo inua karana oi biagua diba lasi.

• Gavamani ena taravatu ese oi dekenai gwaumaoro ia henia lasi alkahol oi inua totona.

• Oi bamoa tauna ia ura lasi alkahol ia inua, badina guna ia hekwarahi ena inuinu karana ia biagua totona.

Headava aria eiava moale karana ta dekenai alkahol oi gaukaralaia be namo, a? Abia hidi oi karaia totona inai, VIDIO itaia.

VIDIO: Alkahol Do Lau Atoa Eiava Lasi? (2:​41)

Roma 13:13 bona 1 Korinto 10:​31, 32 duahia. Baibel siri ta ta duahia murinai, inai henanadai herevalaia:

• Unai hakaua hereva badinaia karana ese edena dala ai oi do ia durua, unai amo oi karaia abia hidi ese Iehova ia hamoalea diba?

5. Abia hidi oi karaia alkahol hida oi inua totona

Bema oi ura alkahol oi inua, inai oi laloatao: Iehova ese alkahol inua karana ia taravatua lasi, to ia ese inuinu momo karana ia taravatua. Dahaka dainai? Hosea 4:​11, 18 duahia, bena inai henanadai herevalaia:

• Dahaka do ia vara bema ta be alkahol momo ia inua?

Dahaka ese ita do ia durua inuinu momo karana ita dadaraia totona? Namona be hida do ita inua ena maka ita diba. Aonega Herevadia 11:2 duahia, bena inai henanadai herevalaia:

• Dahaka dainai hida do oi inua ena hetoana oi diba be namo?

6. Dahaka ese ta ia durua diba inuinu momo karana ia hadokoa totona?

VIDIO: ‘Egu Mauri Lau Hesikulaia’ (6:​32)

• Vidio ai, Dmitry ia inuinu neganai ena kara be edena bamona?

• Ia be inuinu momo karana ia hadokoa haraga, a?

• Edena dala ai ia ese inuinu momo karana ia hadokoa?

Korinto Ginigunana 6:​10, 11 duahia, bena inai henanadai herevalaia:

• Dahaka dainai inuinu kekero karana be kara dika badana?

• Dahaka ese ia hahedinaraia inuinu kekero tauna be ena mauri ia haidaua diba?

Mataio 5:30 duahia, bena inai henanadai herevalaia:

• Imana utua oho karana ena anina be Iehova ita hamoalea totona gau haida do ita rakatania. Dahaka oi karaia diba bema oi hekwarahi noho inuinu momo karana oi rakatania totona?a

Korinto Ginigunana 15:33 duahia, bena inai henanadai herevalaia:

• Emu turadia ida oi inua hebou karana ese edena dala ai emu kara ia haidaua diba?

POINT BADANA

Iehova ese alkahol ia henia ita moale totona, to ia ese inuinu momo bona kekero karana ia taravatua.

Riviu

• Baibel ena lalohadai alkahol dekenai be dahaka?

• Inuinu momo karana ese dahaka dika ia havaraia diba?

• Edena dala ai haida edia abia hidi alkahol dekenai ita matauraia be namo?

REFERENS ITAIA

Edena dala ai memero kekeni ese alkahol dekenai abia hidi maorona idia karaia diba?

Inuinu Karana Ena Dika Oi Laloa Guna (2:​31)

Inuinu momo karana oi hadokoa diba dalana oi dibaia.

“Alkahol Bona Lalohadai Maorona” (Gima Kohorona, July 1, 2010)

Keristani tauna ese wain galasi abia isi karana ia karaia be namo, a?

“Duahia Taudia Edia Henanadai” (Gima Kohorona, February 15, 2007)

Inai atikol ladana, “Lau be Inuinu Momo Tauna” ai, tau ta ese inuinu kekero karana ia rakatania ena sivarai oi duahia diba.

“Baibel ese Mauri Ia Haidaua” (Gima Kohorona, May 1, 2012)