Memero Kekeni Edia Henanadai
Dahaka Dainai Kekeni ese Lau Idia Ura Henia Lasi?
Lau diba ia be lau ia ura henia. Badina egu sivarai—hegeregere lau biagua kohudia, lau lao henia gabudia bona lau dibaia taudia be ia dekenai lau gwauraia vadaeni. Reana ia ura dikadika lau ia tura henia!
Lau be inai mero lau ura henia lasi! Ia be unai ia lalopararalaia, eiava? Edena dala ai ia lau koua lau ia hereva henia lasi bona ena lalona lau hahisia lasi totona?
EMU mauri lagani be ia hegeregere vadaeni ta oi tura henia totona. Oi ura oi tura henia kekenina be mai ena hairai bona oiemu tomadiho ena hahediba herevadia ia abia dae. (1 Korinto 7:39) Guna oi be kekeni ta oi tura henia gwauraia, to emu hetura karana ia dika.
Bema oi ura kekeni ta ena kara oi dibaia namonamo, dahaka gaudia oi laloa be namo? Bona edena Baibel ena hakaua herevadia oi laloatao be namo?
Oi Karaia Gauna Ginigunana
Kekeni ta oi do tura henia lasi neganai, namona be gau haida oi karaia guna, bona unai ese oi do ia durua ma haida danu oi tura henia totona. Mani inai gaudia oi laloa.
◼ Kara namodia oi hahedinaraia. Baibel ia gwau, “Lalokau be haida hadikaia ia ura lasi.” (1 Korinto 13:5) Kara namodia oi karaia amo oi hahedinaraia oi be ma haida oi matauraia bona Keriso ena kara oi tohotohoa danu. To, kara namodia be dabua bamona lasi, ma haida edia lalona veria totona oi hahedokilaia bona ruma dekenai oi giroa lou neganai oi kokia. Sibona oi nanadaia, ‘Lau be egu ruma bese taudia dekenai kara namodia lau karaia, a?’ Bema unai bamona oi karaia lasi, to ma haida oi kara namo henia, oi be oi koikoi. Oi laloatao, ia laloa namonamo kekenina ese emu ruma bese oi kara henia dalana ia itaia, unai amo emu kara do ia diba.—Efeso 6:1, 2.
Kekeni idia gwau: “Lau ura henia merona be gau maragidia dekenai lau ia kara namo henia, hegeregere lau totona iduara ia kehoa, bona gau badadia, hegeregere lau ia laloa bona kara namo henia sibona lasi to egu ruma bese ia kara namo henia danu.”—Tina, ena mauri lagani be 20.a
“Lau ura lasi bema lau hedavari henia merona be lau ia nanadaia, ‘Oi be ta oi tura henia, a?’ bona ‘Emu tahua gaudia be dahaka?’ Unai be namo lasi bona unai bamona henanadai ese egu hemami ia hadikaia!”—Kathy, ena mauri lagani be 19.
◼ Emu tauanina ia goeva karana. Goeva karana ese ia hahedinaraia oi be ma haida oi matauraia bona oi sibona oi matauraia danu. (Mataio 7:12) Bema oi sibona oi matauraia, ma haida ese oi do idia matauraia diba. Danu, bema oi be goeva karana oi laloa bada lasi, vadaeni do ia auka kekeni ta ese oi ia ura henia totona.
Kekeni idia gwau: “Lau ia ura henia merona ena uduna bonana be dika momokani. Unai lau ura lasi.”—Kelly, ena mauri lagani be 24.
◼ Herevahereva karana oi hanamoa. Hetura karana ia noho daudau totona, herevahereva namonamo karana be mai anina bada. Unai ena anina be oi sibona emu namo oi herevalaia momo lasi, to emu turana ena namo danu oi laloa be namo.—Filipi 2:3, 4.
Kekeni idia gwau: “Lau moale bema mero ta be ia hemarai lasi bona lau ida ia herevahereva, lau gwauraia gaudia ia laloatao, bona ai herevahereva daudau totona henanadai ia henia.”—Christine, ena mauri lagani be 20.
“Lau laloa memero be idia itaia gaudia idia ura henia to kekeni be idia kamonai gaudia idia ura henia.”—Laura, ena mauri lagani be 22.
“Harihari gaudia be namo herea. To, bema mero ta be oi ida ia herevahereva namonamo bona ena hereva amo oi ia hagoadaia. Unai be namo herea.”—Amy, ena mauri lagani be 21.
“Lau ura tura henia merona ena kara be inai bamona: Ia hevaseha, to danu mai anina bada gaudia ia herevalaia neganai, ia koikoi lasi.”—Kelly, ena mauri lagani be 24.
Ataiai idia noho herevadia oi badinaia neganai, unai ese oi do ia durua emu hetura karana oi moalelaia totona. To, bema oi laloa oi be hegeregere kekeni ta oi tura henia, vadaeni dahaka oi karaia be namo?
Oi Karaia Gauna Iharuana
◼ Kara ta oi karaia. Bema oi be ta oi ura henia bona oi laloa ia hegeregere emu adavana ai ia lao totona, vadaeni namona be unai kekeni oi hamaoroa oi be ia oi ura henia. Namona be ia dekenai emu hemami oi gwauraia hedinarai. Momokani, reana do oi gari o ia auka unai bamona oi karaia totona. Badina reana oi laloa unai kekeni ese oi do ia ura henia lasi. To, bema oi hegaegae vadaeni unai kekeni oi hamaoroa totona, unai ese ia hahedinaraia oi be taunimanima badadia bamona oi laloa.
Kekeni idia gwau: “Lau be ta ena lalohadai lau diba lasi. Unai dainai, bema mero ta be lau ia ura henia, vadaeni namona be lau dekenai ia mai bona ena lalohadai bona hemami ia gwauraia hedinarai.”—Nina, ena mauri lagani be 23.
“Mero ta be guna oiemu turana namona, to gabeai oi ia hamaoroa ia be oi ia ura henia, unai ese emu hemami do ia hadikaia. To bema ena lalohadai ia gwauraia hedinarai, unai do lau matauraia.”—Helen, ena mauri lagani be 25.
◼ Kekeni ena lalohadai oi matauraia be namo. Bema oi ura henia kekenina ese oi ia hamaoroa, ia ura lasi oi ia tura henia, vadaeni dahaka oi karaia be namo? Iena lalohadai oi matauraia bona bema ia gwau, lasi, vadaeni unai oi abia dae be namo. To bema ia oi doria noho oi ia tura henia totona, unai ese ia hahedinaraia emu lalohadai be natu maragidia bamona. Bema iena lalohadai oi abia dae lasi eiava ia oi badu henia noho, oi be iena namo oi laloa eiava oi sibona emu namo oi laloa, a?—1 Korinto 13:11.
Kekeni idia gwau: “Bema mero ta lau hamaoroa ia lau ura henia lasi, to egu hereva ia abia dae lasi, lau badu.”—Colleen, ena mauri lagani be 20.
“Lau be mero ta lau hamaoroa, lau ura lasi ia lau tura henia, to ia ura dikadika egu telefon namba ia abia. Lau ura ia lau kara namo henia. Lau diba reana lau dekenai ena hemami ia gwauraia be ia auka. To, gabeai ia lau hereva auka henia.”—Sarah, ena mauri lagani be 23.
Oi Karaia Lasi Gaudia
Memero haida idia laloa, kekeni ese idia ura henidia be auka lasi. Idia sibona huanai idia itaia daika be kekeni momo ese do idia ura henia. To, unai bamona kara be namo lasi, bona unai kara amo oi be sibona emu ladana oi hadikaia diba. (Aonega Herevadia 20:11) Unai oi dadaraia diba, bema henunai idia noho herevadia oi badinaia.
◼ Ta oi hauraia kava lasi. Unai bamona ia karaia merona be ena hereva bona kara amo kekeni ta ena lalona ia veria. Bona ia ura kekeni ia tura henia kava sibona. Unai bamona ia kara bona hereva merona be Baibel ena sisiba ia badinaia lasi, ia gwau: “Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.” (1 Timoteo 5:2) Ta ia hauraia kava merona be tura namona eiava adavana namona ai ia lao diba lasi. Idia laloa namonamo kekeni be unai idia diba.
Kekeni idia gwau: “Bema mero ta be oi ia hauraia kava, bona oi diba unai mero be oiemu turana ta dekenai unai bamona ia karaia danu, unai be namo lasi.”—Helen, ena mauri lagani be 25.
“Inai mero mai hairaina be lau ia hauraia kava, bona nega momo sibona ena kara ia herevalaia. Kekeni ma ta ia mai bona ai ida ai herevahereva neganai, unai mero be unai bamona ia karaia. Bena kekeni ihatoina ia mai neganai, unai mero be unai bamona ia karaia danu. Unai be kara namona lasi!”—Tina, ena mauri lagani be 20.
◼ Kekeni ena hemami oi hadikaia lasi. Namo lasi oi laloa, mero ta tura henia karana be kekeni ta tura henia karana ida ia hegeregere. Dahaka dainai? Mani inai oi laloa: Bema mero ta be dabua namona ta ia hahedokilaia, vadaeni ia do oi hanamoa o nega momo ia ida oi herevahereva bona ia dekenai emu lalohadai oi gwauraia, to unai mero be lalohadai kererena do ia abia lasi. To, bema kekeni ta be dabua namona ta ia hahedokilaia, ia do oi hanamoa o nega momo unai kekeni ida oi herevahereva bona ia dekenai emu lalohadai oi gwauraia, vadaeni do ia laloa oi be ia oi ura henia.
Kekeni idia gwau: “Lau laloa memero idia laloparara lasi gauna be inai, edia turadia idia kara henia dalana be idau bona kekeni idia kara henia dalana be idau.”—Sheryl, ena mauri lagani be 26.
“Mero ta be egu telefon namba do ia abia, bona lau dekenai teks mesij ia siaia. Dahaka dainai ia be unai bamona ia karaia? Nega haida teks mesij oi siaia dalana amo ta oi tura henia diba, bona umui ura heheni, to unai dala amo hereva momo do umui gwauraia lasi, ani?”—Mallory, ena mauri lagani be 19.
“Lau laloa mero ta ia lalopararalaia lasi gauna be inai, bema ia be kekeni ta ia kara namo henia bona ia auka lasi unai mero ia hereva henia totona, vadaeni kekeni be do ia laloa unai mero be ia ia ura henia. Unai ese ia hahedinaraia lasi kekeni be ia ura dikadika unai mero ia tura henia. To, lau laloa kekeni momo be memero idia ura henia bona nega momo idia be idia ura henia dikadika merona idia tahua.”—Alison, ena mauri lagani be 25.
Lalohadai Maorona Oi Abia
Namo lasi oi laloa kekeni ibounai ese oi idia ura henia, unai be lalohadai maorona lasi. To kekeni haida ese oi do idia ura henia bema inai oi laloatao: Emu toana be anina lasi, to emu kara be mai anina bada. Unai dainai, Baibel ia gwau namona be ‘mauri matamata do ita atoa,’ anina be iseda kara namodia ita hahedinaraia noho.—Efeso 4:24.
Kate, ena mauri lagani be 21, ia gwau: “Memero idia laloa, bema idia be dabua mai ena sitaelo idia hahedokilaia o edia toana idia hanamoa, kekeni ese idia ura henidia totona. Momokani kekeni haida be memero edia toana dainai idia ura henia, to kekeni momo be memero edia kara namodia dainai idia ura henidia.”b
“Memero Kekeni Edia Henanadai” edia hereva ma haida oi diba totona, inai Web sait www. watchtower. org/ype oi itaia diba.
[Footnotes]
a Ladana haida ai haidaua.
b Questions Young People Ask—Answers That Work, Volium 2, ena karoa 3 oi itaia, Iehova ena Witnes taudia ese idia karaia.
INAI OI LALOA
◼ Edena dala ai oi hahedinaraia oi sibona oi matauraia diba?
◼ Edena dala ai oi hahedinaraia oi be kekeni ta ena lalohadai bona hemami oi matauraia?
[Picture on page 27]
Kara namodia be dabua bamona lasi, ma haida edia lalona veria totona oi hahedokilaia bona ruma dekenai oi giroa lou neganai oi kokia