Keristani Heboudia ai Ma Haida Oi Hagoadaia, A?

“Umui hebou neganai, . . . namona be gau ibounai umui karaia kongrigeisen umui hagoadaia totona.”​—⁠1 KOR. 14:​26, NW.

1. Korinto ginigunana karoa 14 ena hereva bamona, Keristani heboudia ita karaia ena badina badana be dahaka?

‘UNAI be hebou namona!’ Kingdom Hall ai hebou ia ore murinai, nega haida unai bamona oi hereva, a? Oibe! Kongrigeisen heboudia ese ita idia hagoadaia bada. Keristani taudia ginigunadia edia negai bamona, hari inai negai hebou ita karaia ena badina badana be kongrigeisen taudia ibounai ita hagoadaia. Aposetolo Paulo ese Korinto taudia dekenai ena revareva ginigunana ia siaia neganai, Keristani heboudia idia karaia ena badina ia herevalaia dalana mani ita laloa. Karoa 14 ai Paulo be nega momo ia gwau, namona be hebou ai kahana ta ta idia karaia ena badina tamona be kongrigeisen “do idia hagoadaia.”​—⁠1 Korinto 14:​3, 12, 26 duahia.a

2. (a) Dahaka dainai hebou amo goada ita abia? (b) Dahaka henanadai do ita laloa?

² Ita diba Dirava ena lauma helaga ese hebou ia hakaua dainai, unai hebou amo goada bona diba ita abia. Unai dainai, kongrigeisen heboudia ita do hamatamaia lasi neganai, guriguri amo Iehova ita noia ena lauma helaga amo iseda hebou ia hanamoa totona. To, ita diba kongrigeisen ai tadikaka taihu ese hebou ena kahana idauidau idia durua neganai, ma haida idia hagoadaia diba. Vadaeni, Kingdom Hall ai wiki ta ta ita karaia heboudia amo goada ita abia totona, ita ta ta ese dahaka gau haida ita karaia be namo?

3. Dahaka dainai Keristani heboudia be mai anina bada?

³ Haere ita diba totona, namona be hebou idia hakaua taudia ese idia karaia gaudia haida ita laloa. Danu, do ita itaia edena dala ai kongrigeisen taudia ibounai ese hebou be hagoadaia negadia ai idia halaoa. Inai stadi ita laloa bada be namo, badina iseda hebou be helaga. Momokani, hebou ibounai ita lao henia bona ena kahana idauidau ita durua karana be mai anina bada, badina unai be Iehova tomadiho henia ena kahana badana.​—⁠Sal. 26:12; 111:1; Isa. 66:​22, 23.

Hebou Ita Karaia Ena Badina be Baibel Stadilaia Totona

4, 5. Gima Kohorona Stadi ita karaia ena badina badana be dahaka?

⁴ Ita ibounai ita ura wiki ta ta ena Gima Kohorona Stadi amo namo ita abia. Unai dainai, hebou ena badina badana ita lalopararalaia namonamo totona, Gima Kohorona dekenai idia haidaua gaudia haida ita riviulaia be namo.

⁵ January 15, 2008 ena Gima Kohorona, stadi gauna, ena vairana dekenai be mai anina bada gauna ta ia noho. Unai oi itaia, a? Oi dogoatao magasin ena vairana kahana mani oi itaia. Kohoro ena henunai be ia kehoa Baibel ta ena laulau ia noho. Unai ese Gima Kohorona ita stadilaia ena badina ia hahedinaraia. Inai magasin ena heduru amo ita be Baibel ita stadilaia. Oibe, iseda wiki ta ta ena Gima Kohorona Stadi ai, Dirava ena Hereva idia “duahia hedinarai,” bona ena ‘anina idia gwauraia’ hedinarai, Nehemia ena negai bamona.​—⁠Neh. 8:​8, BHğ; Isa. 54:⁠13.

6. (a) Gima Kohorona Stadi ai dahaka gau haida idia haidaua? (b) “Duahia” siridia dekenai dahaka ita laloatao be namo?

⁶ Baibel be ita gaukaralaia buka badana dainai, Gima Kohorona Stadi ai gau haida idia haidaua. Siri haida edia badinai be inai hereva, “duahia,” do oi itaia. Unai ese ita ibounai ia hagoadaia hebou lalonai duahia siridia be sibona eda Baibel amo ita duahia totona. (Kara 17:11) Dahaka dainai? Sibona eda Baibel amo Dirava ena sisiba ita itaia neganai, ita ia durua bada. (Heb. 4:12) Unai dainai, unai bamona “duahia” siri ita do duahia hedinarai lasi neganai, namona be stadi naria tadikaka ese nega ia henia tadikaka taihu be edia Baibel idia kehoa bona idia duahia siridia idia badinaia.

Nega Bada Ia Noho Eda Abidadama Ita Gwauraia Hedinarai Totona

7. Gima Kohorona Stadi lalonai nega bada ia noho dahaka ita karaia totona?

⁷ Vanegai lagani lalodiai, idia haidaua gauna ma ta be inai: Gima Kohorona stadi edia paragraf be momo lasi. Unai dainai, nega bada ia noho Gima Kohorona Stadi lalonai haere idauidau ita henia totona. Kongrigeisen ai momo be edia abidadama idia gwauraia hedinarai totona, henanadai ta idia haerelaia, siri ta ena anina idia gwauraia, o ekspiriens kwadogina ta amo hakaua herevadia badinaia ena namo idia herevalaia. Danu, nega haida Gima Kohorona ai idia noho laulau idia herevalaia.​—⁠Salamo 22:22; 35:18; 40:9 duahia.

8, 9. Gima Kohorona Stadi naria tadikaka ena gaukara be dahaka?

⁸ To, bema Gima Kohorona Stadi lalonai haere be kwadogi bona naria tadikaka be hereva momo ia gwauraia lasi, vadaeni nega ia noho haere idauidau ita henia totona. Vadaeni, dahaka ese Gima Kohorona naria tadikaka do ia durua iena hereva bona tadikaka taihu edia haere amo kongrigeisen taudia ibounai ia hagoadaia?

⁹ Unai ita haerelaia totona, mani inai haheitalai oi laloa. Gima Kohorona Stadi hakaua namonamo karana be flaoa mai edia kala idauidau oi kwatua hebou bamona. Flaoa be idauidau hegeregerena, Gima Kohorona Stadi lalonai haere be idauidau. Flaoa ta ta edia lata bona kala be idauidau, unai hegeregerena hebou ai tadikaka taihu edia haere dalana bona haere ena lata be idauidau. Gima Kohorona naria tadikaka ena gaukara be dahaka? Namona be ia hereva momo lasi​—⁠rau grinidia haida be oi kwatua hebou flaoa idauidau ida oi atoa hebou bamona. Ena be rau grinidia be momo lasi, to ia ese flaoa ena hairai ia durua. Unai hegeregerena, stadi naria tadikaka ia laloatao iena gaukara be, ia hereva momo lasi, to tadikaka taihu edia haere idauidau dainai do ia hanamodia. Oibe, tadikaka taihu edia haere idauidau bona stadi naria tadikaka ese ia henia hanamoa herevadia ese kongrigeisen taudia ibounai do ia hagoadaia bada.

Hanaihanai “Dirava Do Ita Hanamoa”

10. Keristani taudia ginigunadia ese kongrigeisen heboudia be edena bamona idia laloa?

¹⁰ Korinto Ginigunana 14:​26-33 ai, Paulo be aposetolo edia negai Keristani heboudia idia karaia dalana ia herevalaia. Unai siridia dekenai, Baibel ia diba bada tauna ta ia gwau: “Idaunegai Dubu gaukaradia totona idia lao taudia idia mamia hebou dekenai hahenamo idia abia bona edia maduna be ma haida do idia durua. Hebou ia lao tauna ta be ia kamonai bona diba ia abia sibona lasi, to heduru ia henia danu.” Momokani, Keristani taudia ginigunadia idia laloa kongrigeisen heboudia ese dala ia kehoa edia abidadama idia gwauraia hedinarai totona.​—⁠Roma 10:⁠10.

11. (a) Hebou ai dahaka ita karaia, bona dahaka dainai? (b) Hebou ai haere henia karana ita hanamoa totona, edena heduru herevadia ita badinaia? (Futnout itaia.)

¹¹ Hebou dekenai iseda abidadama ita gwauraia hedinarai karana amo kongrigeisen ‘ita hagoadaia’ bada. Ita diba herevana ita be lagani momo lalodiai hebou ita lao henia, to tadikaka taihu ese idia henia haere idauidau ita kamonai neganai, ita moale bada. Abidadama tadikaka o taihu burukana ta ena haere namona ese ita ia hagoadaia; elda ta ese ia dibaia gauna ia herevalaia karana amo ita ia hagoadaia; natu ta be haere ia henia amo ena lalokau Iehova dekenai ia hahedinaraia neganai, ita moale. Unai ese ia hahedinaraia goevagoeva, Keristani heboudia ai haere ita henia karana amo ma haida ita hagoadaia.b

12. (a) Mose bona Ieremia edia haheitalai amo dahaka ita dibaia? (b) Guriguri karana ese edena dala ai ita ia durua haere ita henia totona?

¹² To, haere henia totona idia gari taudia dekenai haere henia karana be auka. Bema oi be unai bamona, vadaeni namona be oi laloatao ma haida danu be unai bamona hemami idia abia. Oibe, Dirava ena hesiai taudia haida, hegeregere Mose bona Ieremia idia laloa idia be hegeregere lasi taunimanima edia vairanai idia hereva totona. (Eso. 4:10; Ier. 1:⁠6) To, Iehova ese unai hesiai taudia ia durua taunimanima edia vairanai Ia idia hanamoa hegeregerena, Ia ese oi do ia durua Ia oi hanamoa totona. (Heberu 13:15 duahia.) Haere henia karana dekenai oi gari lasi totona, edena dala ai Iehova ena heduru oi abia be namo? Ginigunana be, hebou totona oi hegaegae namonamo. Iharuana be, Kingdom Hall oi do lao lasi neganai, guriguri amo Iehova oi noia goada ia henia hebou ai oi haere totona. (Fili. 4:⁠6) Oi noia gauna be Iehova ena “ura hegeregerena” dainai, oi diba momokani Ia ese emu guriguri do ia haerelaia.​—⁠1 Ioa. 5:14; Aon. 15:⁠29.

Hebou ese Ita Ia ‘Hagoadaia Bona Eda Lalona Ia Hanamoa’

13. (a) Kongrigeisen heboudia edia badina badana be dahaka? (b) Elda taudia dekenai edena henanadai be mai anina bada?

¹³ Paulo ia gwau kongrigeisen heboudia edia badina badana be, hebou idia lao taudia ia ‘hagoadaia bona edia lalona ia hanamoa.’c (1 Kor. 14:⁠3) Hari inai negai, elda taudia be edena dala ai hebou ena kahana idauidau amo tadikaka taihu idia hagoadaia bona edia lalona idia hanamoa? Unai ita haerelaia totona, Iesu ia toreisi lou murinai ia karaia hebou ta mani ita laloa.

14. (a) Iesu ia karaia hebouna ai dahaka gaudia idia vara? (b) Iesu be aposetolo taudia “dekenai ia lao, bona ia hereva henidia” neganai, dahaka dainai unai ese edia lalona ia hagoadaia?

¹⁴ Iesu ia karaia hebouna ai idia vara gaudia ita laloa guna. Iesu ena mase negana be kahirakahira neganai, aposetolo taudia ese ia “idia rakatania, idia heau” bona peroveta herevana hegeregerena, idia be ‘ta ta edia gabu dekenai idia lao.’ (Mar. 14:50; Ioa. 16:32) Bena ia toreisi lou murinai, Iesu ese lalometau aposetolo taudia be hebou namona ta dekenai ia boiridia.d Vadaeni, “hahediba taudia 11 be Galilea dekenai idia vareai, bona Iesu ese ia gwauraia ororona dekenai idia lao.” Idia ginidae neganai, “Iesu be idia dekenai ia lao, bona ia hereva henidia.” (Mat. 28:​10, 16, 18, NW ) Mani oi laloa, Iesu be unai bamona ia karaia neganai edia lalona ia hagoadaia! Iesu be dahaka ia herevalaia?

15. (a) Iesu be dahaka gaudia ia herevalaia, to dahaka ia karaia lasi? (b) Iesu ena hereva ese aposetolo taudia be edena bamona ia durua?

¹⁵ Hebou ena matamanai Iesu be hadibaia hereva ta ia gwauraia: “Dirava ese lau dekenai siahu ia henia.” Bena idia dekenai maduna ta ia henia: “Umui lao, bese ibounai taudia be hahediba taudia ai umui halaoa.” Unai murinai idia ia hagoadaia: “Lau be dina iboudiai umui ida do lau noho.” (Mat. 28:​18-20, NW ) To Iesu be dahaka ia karaia lasi? Ia ese ena aposetolo taudia ia gwau henia lasi, o unai hebou ai edia kerere ena badina ia henanadailaia lasi, o edia manoka gaudia ia herevalaia lasi, edia hemami ia hadikaia garina. To maduna badana ta ia henidia karana amo, ia bona ena Tamana edia lalokau ia hahedinaraia. Iesu ena hereva ese aposetolo taudia be edena bamona ia durua? Idia ia ‘hagoadaia bona edia lalona ia hanamoa’ dainai, daudau lasi murinai, idia be “taunimanima idia hadibaia noho, bona . . . Sivarai Namona idia gwauraia noho.”​—⁠Kara 5:⁠42.

16. Edena dala ai elda taudia be hebou idia hakaua neganai Iesu idia tohotohoa, unai amo tadikaka taihu idia hagoadaia?

¹⁶ Hari inai negai, elda taudia ese Iesu idia tohotohoa totona, namona be idia itaia hebou negadia ese dala ia kehoa tadikaka taihu idia hagoadaia, unai amo do idia diba Iehova be idia ia lalokau henia. (Roma 8:​38, 39) Unai dainai, elda taudia be hebou ai edia kahana idia karaia neganai, edia tadikaka taihu idia hagoadaia diba gaudia sibona idia laloa, to edia manoka gaudia lasi. Tadikaka taihu edia kerere ena badina idia henanadailaia lasi. To, edia hereva amo idia hahedinaraia, edia tadikaka taihu ta ta be Iehova idia lalokau henia bona idia ura kara maorona idia karaia. (1 Tes. 4:​1, 9-12) Momokani, reana nega haida elda taudia be kongrigeisen taudia ibounai idia sisiba henia, to bema ta idia durua ena kerere hamaoromaoroa totona, vadaeni ia sibona idia sisiba henia be namo. (Gal. 6:1; 2 Tim. 2:​24-26) Elda taudia be kongrigeisen taudia ibounai idia hereva henia neganai, hanamoa hereva idia henia be namo. (Isa. 32:⁠2) Elda taudia idia hekwarahi unai bamona hereva amo kongrigeisen taudia idia hagoadaia neganai, idia ese hebou do idia moalelaia.​—⁠Mat. 11:28; Kara 15:⁠32.

Hebou ese Ita Idia Hagoadaia

17. (a) Dahaka dainai iseda Keristani heboudia be ita idia hagoadaia gabuna? (b) Dahaka do oi karaia hebou ai ma haida oi hagoadaia totona? (Maua ladana, “Hebou Dekenai Oi Bona Ma Haida Hagoadaia Daladia Ten” itaia.)

¹⁷ Satani ena tanobada be ia dika ia lao noho dainai, namona be ita diba iseda Keristani heboudia be ita idia hagoadaia gabuna. (1 Tes. 5:11) Lagani haida gunanai taihu ta bona ena adavana be hahetoho badana ta idia haheaukalaia karana idia laloa lou. Idia gwau: “Kingdom Hall dekenai ai lao neganai, ai mamia Iehova ese ena imana amo ai ia dogoatao bamona. Unuseniai emai tadikaka taihu ida ai noho, bona ai mamia emai lalohekwarahi gaudia be Iehova dekenai ai atoa, unai ese lalomaino ia henia.” (Sal. 55:22) Iseda hebou dekenai idia mai taudia ibounai ita hagoadaia bona edia lalona ita hanamoa be namo. Unai ia vara diba, bema Keristani heboudia ai ma haida ita hagoadaia noho.

[Footnotes]

Edena Bamona Do Oi Haere?

• Edena dala ai Keristani heboudia be mai anina bada?

• Dahaka dainai hebou dekenai haere ita henia karana amo kongrigeisen ‘ita hagoadaia’?

• Iesu be ena hahediba taudia ida ia karaia hebouna amo dahaka ita dibaia?

[Box/​Pictures on page 22, 23]

HEBOU DEKENAI OI BONA MA HAIDA HAGOADAIA DALADIA TEN

Hegaegae guna. Kingdom Hall ai do ita herevalaia gaudia oi stadilaia guna neganai, hebou karana ese emu ura do ia habadaia bona emu lalona do ia veria.

Hebou lao henia hanaihanai. Hebou dekenai taunimanima momo idia lao neganai, hebou ai idia noho taudia ia hagoadaia, unai dainai hebou dekenai oi noho be mai anina bada.

Nega korikori ai ginidae. Hebou ia do matamaia lasi lalonai oi helai neganai, oi be hebou kehoa ane bona guriguri do oi reaia lasi, badina unai be Iehova ita tomadiho henia ena kahana ta.

Gau ibounai abia hegaegae. Iseda Baibel bona hebou lalonai idia gaukaralaia bukadia ita abia lao, unai amo hereva idia henia neganai ita ese iseda buka ita itaia diba bona idia herevalaia gaudia do ita lalopararalaia namonamo.

Lalona veria gaudia dadaraia. Hegeregere, hebou lalonai mobael fon ai teks mesiji oi itaia lasi, to hebou ia ore murinai oi itaia diba. Unai dala amo, oi ura karaia gaudia be edia gabu maorona ai oi atoa diba.

Hebou dekenai oi haere. Momo be edia haere amo edia abidadama idia gwauraia hedinarai neganai, unai ese ma haida ia hagoadaia bona durua.

Haere kwadogidia henia. Unai ese dala ia kehoa momo idia haere totona.

Ita idia henia gaukaradia ita karaia guguru. Bema oi be Tiokratik Haroro Sikuli ai hereva ta do oi henia o Hesiai Hebou ai kahana ta do oi karaia, namona be oi hegaegae namonamo, emu kahana oi tohoa guna, bona emu kahana oi reaia lasi.

Haere bona hereva idia henia taudia hanamoa. Hebou ai kahana idia karaia o haere idia henia taudia oi hamaoroa edia hekwarahi oi laloa bada.

Hagoadaia heheni. Hebou ia do matamaia lasi bona ia ore murinai, mai hemataurai ida ta ta ita hanamoa bona hagoadaia, unai amo iseda hebou lao henia karana ena moale bona ena namo ia habadaia.