Iehova Ena Orea Lalonai Gaukara Idauidau Lau Karaia

Vernon Zubko ese ia sivarailaia

LAU be Stenen hanua dekenai lau tubu daekau. Unai hanua be Saskatchewan ena provinsi, Canada dekenai ia noho. Egu tamana Fred bona sinana Adella, be idia gaukara goada lau bona egu kakana Aurellia bona tadidia, Alvin, Allegra bona Daryl be tauanina dalanai idia naria bona Iehova ena kara be ai dekenai idia hadibaia. Ema bona hari, emai tama sina ai tanikiu henia badina ai dekenai hereva momokani idia hadibaia.

Egu tamana be horoa tauna bona mai gari lasi ida haroro gaukara ia karaia. Ena be mauri durua gaudia abia totona moni gaukara ia karaia, to ia ura taunimanima ibounai idia diba ia be Witnes tauna ta. Ia be hanaihanai hereva momokani ia harorolaia. Iena goada bona gari lasi karana lau laloaboio diba lasi. Nega momo lau ia hamaoroa: “Iehova ena orea lalonai gaukara idauidau oi karaia bona hekwakwanai momo oi hanaia diba.”

Stenen ai, nega momo ai be dala haroro ai karaia bona dekena taudia ai haroro henia. Lau dekenai unai be ia auka, badina taoni ta ta ai dagedage taudia idia noho bona idia be ai matamata taudia dekenai idia mai bona ai idia kirikirilaia. Egu mauri lagani be eit neganai, nega ta lau be dala ena kahana ta dekenai lau gini bona Gima Kohorona bona Awake! lau dogoatao, unai negai memero haida be lau idia hagegea. Idia ese egu kwarana amo kwara gauna idia kokia oho bona au ta dekenai idia atoa. Lau ida ai gaukara hebou tadikaka be lau dekenai ia vara gauna ia itaia. Ia mai bona lau ia nanadaia, “Vern, gau ta ia vara, a?” Memero be karaharaga idia heau. Ena be lau dekenai ia vara gauna dainai lau lalohisihisi, to lau dibaia gauna be, dala haroro lau karaia neganai, gabu tamona dekenai lau gini sibona lasi, to lau raka loaloa be namo. Lau tubu daekau lalonai, lau dibaia gaudia ese lau ia durua mai gari lasi ida ruma-ta-ruma-ta gaukara lau karaia totona.

Lau bona Alvin be May 1951 ai bapatiso ai abia. Unai neganai egu mauri lagani be 13. Lau laloatao bapatiso tok ia henia tadikaka, Jack Nathan, be ai ia hagoadaia hanaihanai Iehova ai herevalaia totona.a Emai ruma bese lalonai, nega momo ai laloa painia gaukara be gaukara hereadaena. Unai dainai lagani 1958 ai, sikuli lau haorea murinai, lau be Winnipeg, Manitoba dekenai lau lao painia gaukara lau karaia totona. Ena be egu Tamana ia moale badina emai ruma bese ena bisinesi​—⁠au utua gaukarana⁠​—⁠​dekenai ia lau durua, to ia bona egu Sinana be lau idia hagoadaia ful-taim hesiai gaukara lau karaia bona lau idia durua Winnipeg ai lau painia totona.

Gabu Matamatana Bona Turana Matamatana

Lagani 1959 ai, brens opesi ese haida ia boiria Quebec ai haroro taudia be momo lasi gabuna dekenai idia lao totona. Lau be Montreal dekenai lau lao painia gaukara lau karaia totona. Gau haida idia idau! Lau be French gado do lau dibaia bona unai gabu ena noho dalana do lau manadalaia. Sekit naria tauna be lau ia hamaoroa: “Oi gwau lasi, ‘egu gabu dekenai danu be unai bamona ai karaia.’ ” Unai be sisiba namona.​—⁠1 Kor. 9:​22, 23.

Quebec dekenai lau noho neganai, egu painia turana ta be lasi. To, February 1961 ai Shirley Turcotte lau adavaia, bona egu painia turana ai ia lao, ia be guna Winnipeg dekenai lau hedavari henia. Iena ruma bese danu be Iehova idia lalokau henia taudia. Unai negai lau laloparara lasi ia be lagani momo lalonai lau do ia hagoadaia bona durua.

Gaspé Tanona Ibounai Dekenai Ai Haroro

Ai headava bona lagani rua murinai ai idia siaia Rimouski, Quebec ai spesel painia gaukara ai karaia totona. Siahu negana ia matamaia neganai, brens opesi ese ai ia noia Gaspé Peninsula ena tano ibounai bona Canada ena ist kone kahanai ai haroro totona. Emai gaukara be unuseniai hereva momokani ena uhe momo do ai hadoa. (Had. 11:⁠6) Emai motuka ai magasin 1,000 mai kahana bona buka 400 bamona ai udaia, danu aniani bona dabua haida ai abia, bona hua tamona lalonai haroro gaukara karaia totona ai lao. Gaspé ena hanua maragidia ibounai dekenai ai haroro. Unai gabu ena reidio steisen ta be taunimanima idia hadibaia Witnes taudia do idia mai, bona idia hamaoroa iseda buka bona magasin do idia abia dae lasi. To, unai gabu taudia momo be unai hadibaia hereva idia lalopararalaia lasi bona idia laloa unai hereva amo iseda buka bona magasin idia hahedinaraia dainai, iseda buka bona magasin idia abia dae.

Unai lagani lalodiai, Quebec ena tano haida dekenai haroro gaukara ai karaia diba, bona pulisi taudia be unai gaukara idia koua lasi. Siti ta dekenai ai be kahirakahira ruma ibounai dekenai buka bona magasin ai hariharilaia. Pulisi tauna ta be ai ia hamaoroa ia ida pulisi steiseni dekenai ai lao, bona ai be unai bamona ai karaia. Lau kamonai unai siti ena loea be oda ta ia henia ai haroro lasi totona. Unai dina ai pulisi ena tau badana be ia noho lasi dainai, lau ese loea tauna dekenai Toronto ena brens opesi amo ai abia revarevana lau hahedinaraia, unai revareva ese haroro gaukara ai karaia diba ena maoro ia herevalaia. Loea tauna ese unai revareva ia duahia murinai, karaharaga ia gwau: “Lau ura lasi hekwakwanai ta ia vara. To pris tauna ese lau ia hamaoroa umui lau koua totona.” Ai ura taunimanima idia laloparara emai gaukara be taravatu ta ese ia koua lasi, unai dainai maoromaoro ai giroa lou bona pulisi tauna ese ai ia koua gabuna dekenai haroro gaukara ai karaia lou.

Daba ia rere neganai, ai be pulisi ena tau badana itaia totona ai lao, ia ese emai gaukara idia koua sivaraina ia kamonai neganai ia lalohisihisi. Ia be telefon amo loea ia hereva henia mai badu ida. Pulisi tauna ese ai ia hamaoroa, bema ai dekenai hekwakwanai ta ia vara, ia do ai hadibaia bona ia ese unai hekwakwanai do ia hamaoromaoroa. Ena be ai be idau tano taudia bona French gado ai diba namonamo lasi, to taunimanima be ai dekenai kara namo bona heabidae karana idia hahedinaraia. To ai laloa, ‘Idia be hereva momokani do idia diba, a?’ Lagani haida murinai Gaspé dekenai Kingdom Hall haida haginia totona ai giroa lou neganai, unai henanadai ena haere ia hedinarai. Ai davaria guna ai haroro henia taudia momo be hari emai tadikaka bona taihu. Momokani, Iehova sibona ese ita hadoa gauna ia hatubua.​—⁠1 Kor. 3:​6, 7.

Ai Abia Harihari Gauna Ta

Lagani 1970 ai, emai natuna kekeni Lisa ia vara. Iehova amo unai harihari gauna ai abia dainai ai moale bada. Shirley bona Lisa be Kingdom Hall haginia gaukaradia dekenai lau idia durua. Lisa be ena sikuli ia haorea murinai, ia gwau: “Egu Tamana bona Sinana e, lau vara neganai lau umui naria totona emui ful-taim hesiai gaukara umui rakatania, unai dainai hari lau ura painia gaukara lau karaia.” Lagani 20 idia hanaia vadaeni, Lisa be painia gaukara ia karaia noho, to hari be ena adavana Sylvain ida Intenesenel konstraksen gaukaradia idia karaia. Emai ruma bese lalonai ai ura gau momo ai tahua lasi bona sibona ai henia Iehova ena hesiai gaukara ai karaia totona. Lisa ese painia gaukara ia hamatamaia neganai, ia gwauraia herevana lau laloaboio lasi. Momokani, ena hereva ese lau ia hagoadaia dainai, lagani 2001 ai ful-taim hesiai gaukara lau karaia lou, bona ema bona hari lau do painia noho. Painia gaukara ese lau ia hadibaia lau karaia gaudia ibounai lalonai Iehova lau abidadama henia, bona egu mauri ai gau momo lau tahua lasi dainai lau moale.

Haginia Gaukara Dekenai Lalokau Bona Abidadama Hahedinaraia

Iehova ese lau ia hadibaia gaudia amo lau laloparara, bema sibona ita henia Iena gaukara idauidau ita karaia totona, vadaeni hahenamo momo do ita abia. Regional Building Committee dekenai lau gaukara bona egu tadikaka taihu ida Quebec bona tano ma haida dekenai haginia gaukara lau karaia be hahenamo badana.

Ena be tadikaka taihu haida be reana platfom amo tok namodia idia henia diba lasi, to Kingdom Hall haginia gaukaradia dekenai gaukara namodia idia karaia. Idia be mai edia kudouna ibounai ida edia gaukara idia karaia, bona edia diba idia gaukaralaia. Unai dainai Iehova tomadiho henia ruma namo hereadia idia haginia.

Lau idia nanadaia, “Bema ta ia ura Kingdom Hall haginia gaukara ia karaia, dahaka ia karaia be mai anina bada?” Ginigunana be inai, ta ese Iehova, ena Natuna bona tadikaka oreana ia lalokau henia. (1 Kor. 16:14) Iharuana be, abidadama ia hahedinaraia. Bema gau haida be iseda ura hegeregerena idia vara lasi, to abidadama tauna be tiokratik dalana ia badinaia noho, bona unai ese ia do ia durua vaira negai Kingdom Hall haginia gaukara ia karaia totona.

Iehova Lau Tanikiu Henia

Ena be lagani 1985 ai egu tamana ia mase, to iena sisiba​—⁠Iehova ena orea lalonai gaukara idauidau do lau karaia sisibana​—⁠lau laloatao noho. Ma haida hegeregerena, egu tamana be Iehova ena guba oreana lalonai gaukara ia abia dainai, lau diba ia bisi bada. (Apok. 14:13) Egu sinana ena mauri lagani be 97. Stroke gorere ia abia dainai, ia hereva namonamo lasi guna bamona; to Baibel ena hereva ia diba. Ena revareva lalodiai siri haida ia torea bona ai ia hagoadaia Iehova ai hesiai henia noho totona. Emai lalokau tama sina ese ai idia naria namonamo dainai, ai moale bada.

Iehova lau tanikiu henia badina Shirley be egu adavana bona turana namona ai ia lao. Ia be ena sinana ese ia hamaoroa herevana ia laloatao: “Vern be hereva momokani lalonai gaukara idauidau do ia karaia, bona oi ese ia oi durua ma haida umui haroro henia totona.” Lagani 49 gunanai ai headava neganai, emai lalona ai hadaia Iehova do ai hesiai henia ela bona ai buruka, bona inai nega ena dokona amo ai roho mauri neganai, do ai matamata lou bona Iehova do ai hesiai henia ela bona hanaihanai. Oibe, ai be ‘Lohiabada ena gaukara idauidau lalonai ai bisi.’ (1 Kor. 15:​58, NW ) Iehova be ai ia naria bona gau namodia momo ia henia.

[Footnote]

[Picture on page 31]

“Emai ruma bese lalonai ai ura gau momo ai tahua lasi bona sibona ai henia Iehova ena hesiai gaukara ai karaia totona”