Baibel Stadi Program ta Ibounai Totona

Taunimanima momo idia diba Iehova ena Witnes taudia sibona ese haroro gaukara idia karaia. To tanobada hegegemadai, ai ese Baibel stadi program ta ai karaia danu.

Tau ta be ena gaukara gabuna ai Baibel stadi ia karaia

Lagani 2014 ai, tano 240 lalonai Witnes taudia 8,000,000 mai kahana ese hua ta ta ai Baibel stadi 9,500,000 bamona idia karaia.a Tanobada hegegemadai taunimanima milioni momo be Baibel idia stadilaia noho!

Iehova ena Witnes taudia ese edia hadibaia gaukarana idia karaia totona, idia ese Baibel, buka, magasin, bona Baibel stadilaia bukadia ma haida be gado 700 mai kahana ai idia hahanaia bona kahirakahira bilioni ta mai kahana ai idia printaia. Unai hahanaia bona printaia gaukarana ese dala ia kehoa taunimanima be edia gado ai Baibel idia stadilaia totona.

“Sikuli dekenai stadi karana lau ura henia lasi, to Baibel stadilaia karana lau moalelaia. Bona lau dibaia gaudia ese lau ia hagoadaia!”—Katlego, South Africa.

“Lau karaia Baibel stadi ese egu henanadai ibounai ia haerelaia bona gau ma haida lau diba danu.”—Bertha, Mexico.

“Lau abia hidi taim ai, egu ruma dekenai Baibel stadi ai karaia. Unai be namo herea momokani!”—Eziquiel, Brazil.

“Nega haida Baibel stadi be miniti 15 o 30 lalonai ai karaia, bona nega haida ia daudau sisina, egu ura hegeregerena.”—Viniana, Australia.

“Baibel stadi be davana lasi, bona unai be namo herea!”—Aimé, Benin.

“Lau dekenai Baibel ia hadibaia hahinena be ia haheauka bona ia manau. Ai be tura namodia ai ai lao.”—Karen, Northern Ireland.

“Taunimanima momo be Baibel idia stadilaia, to Iehova ena Witnes taudia ai idia lao lasi.”—Denton, England.

BAIBEL STADI PROGRAM—HENANADAI BONA EDIA HAERE

Edena bamona Baibel stadi umui karaia?

Ai ese Baibel topik idauidau ai abia hidi bona unai topik idia herevalaia Baibel siridia ai duahia danu. Hegeregere, Baibel ese inai henanadai haida ia haerelaia: Dirava be Daika? Ia be edena bamona tauna? Ia be mai ena ladana, a? Ia be edeseni ia noho? Ia kahirakahira ita lao diba, a? Taunimanima momo idia diba lasi Baibel lalonai edeseniai edia haere idia davaria diba.

Taunimanima ai durua edia henanadai edia haere idia davaria totona, ai ese Baibel be Dahaka Ia Hadibaia?b bukana ai gaukaralaia. Unai buka idia karaia ena badina be taunimanima do ia durua Baibel ena hadibaia herevadia idia lalopararalaia namonamo totona. Unai buka ese ia herevalaia gaudia haida be: Dirava, Iesu Keriso, taunimanima edia hisihisi, toreisi lou, guriguri, bona topik ma haida danu.

Baibel stadi be edena negai bona edeseniai umui karaia?

Emu ura taim bona gabu ai Baibel stadi oi karaia diba.

Baibel stadi be miniti hida lalonai umui karaia?

Taunimanima momo be wiki ta ta ai hora ta o miniti haida lalonai Baibel idia stadilaia. To, stadi ena lata be oi sibona ese oi idia abia hidi diba, bona emu sediual hegeregerena do ai badinaia. Haida be wiki ta ta ai miniti 10 o 15 lalonai stadi idia karaia.

Baibel stadi be mai ena davana, a?

Stadi program bona stadi bukadia be davana lasi. Unai be Iesu ese ena hahediba taudia dekenai ia gwauraia herevana ida ia hegeregere, ia gwau: “Umui abia davana lasi, umui henia davana lasi.”—Mataio 10:8.

Baibel stadi be lagani hida lalonai do lau karaia?

Baibel stadi ena daudau be oi sibona emu ura hegeregerena. Baibel be Dahaka Ia Hadibaia? bukana ena karoa ibounai be 19. Bema oi ura, unai buka ena karoa ibounai o karoa haida sibona oi stadilaia diba, bona emu laloparara hegeregerena oi stadi diba.

Iehova ena Witnes tauna ta ai do lau lao, a?

Lasi. Ai laloparara taunimanima ta ta be mai edia maoro, edena hadibaia herevadia idia abia dae totona, bona unai ai matauraia. To, Baibel amo diba idia abia taudia ese abia hidi maorona idia karaia diba.

Edeseniai hereva ma haida lau abia diba?

Iehova ena Witnes taudia edia hahediba herevadia bona gaukara oi diba totona, jw.org Web sait dekenai oi itaia diba.

Edena dala ai Baibel stadi ta lau noia diba?

www.jw.org amo oi noia diba
Inai magasin ena rau 2 ai ia noho adres ta dekenai revareva oi siaia.
Emu gabu kahirakahira ai idia noho Iehova ena Witnes taudia oi hereva henia. Eiava telefon buka dekenai “Iehova ena Witnes taudia” edia namba oi tahua bona oi rini henidia.

a Baibel stadi be taunimanima ta ta ida eiava grup maragidia dekenai idia karaia.

b Unai buka be Iehova ena Witnes taudia ese idia karaia. Gado 260 mai kahana ai idia halasia bona kopi 230 milioni mai kahana ai idia printaia.

RUMA BESE DURUA TOTONA

“Egu hahine be Baibel ia stadilaia matamaia neganai, lau itaia iena kara ia haidaua. Emai ruma bese maurina ia namo ia lao. Lau ura ia dibaia gaudia lau diba dainai, lau danu be Baibel lau stadilaia matamaia. Lau dibaia gaudia ese lau ia durua egu kara lau hanamoa totona. Baibel stadilaia karana ese lau bona egu ruma bese ia hatamonaia.”—Eziquiel.

“Baibel stadi lau hamatamaia murinai, drag ania bona inuinu kekero karana lau hadokoa, bona egu badu biagua karana lau dibaia. Egu ruma ia goeva bona kohu lau atodia namonamo. Hari, egu ruma bese lau laloa bada bona idia hamoalea gaudia lau karaia. Hari, lau moale bada.”—Karen.

“Baibel lau stadilaia dainai taunimanima haida be lau idia hevasehalaia. To, egu adavana ese egu abia hidi ia matauraia, bona ia gwau: ‘Taunimanima edia hereva lau laloa bada lasi. Lau itaia gauna be emu mauri oi haidaua bona lau dekenai unai be mai anina bada. Emu stadi karana oi hadokoa lasi.’ Hari, emai ruma bese maurina be ia namo!”—Viniana.