Davida Bona Goliata Idia Tuari​—Ia Vara Momokani, A?

1 | Tau ta ena lata be momokani mita 2.9 bamona, a?

Baibel ia gwau Goliata ena “lata be mita toi bamona.” (1 Samuela 17:4). Haida idia gwau Goliata ena lata be unai bamona lasi, to mani oi laloa: Hari inai negai, ripoti haida ese idia hahedinaraia tanobada ai tau latana ena lata be mita 2.7 ia hanaia. Unai dainai, ita gwau diba Goliata be tau lata hereana, ani? Ia be Repaima tauna ta, momo idia diba idia be taunimanima latadia. Lagani 13 B.C.E. ai, Aigupito dekenai idia davaria revareva ta ia gwau Kanana ai tuari taudia goadadia haida edia lata be mita 2.4 ia hanaia. Unai dainai ita abia dae Goliata be tau latana.

2 | Davida be momokani ia noho, a?

Nega ta diba bada taudia haida idia ura hahedinaraia King Davida ena lohia sivaraina be gori ta sibona, to idia kwalimu lasi. Akioleji ese idia davaria idaunegai toretorena ta dekenai inai hereva “Davida ena ruma” ia noho. Danu, Iesu Keriso ena hereva amo ia hahedinaraia Davida be momokani ia noho. (Mataio 12:3; 22:43-45) Bese taudia edia lista rua ese idia hamomokania Iesu be Mesia, bona idia hahedinaraia Iesu be King Davida ena bese tauna ta. (Mataio 1:6-16; Luka 3:23-31) Unai ese idia hahedinaraia, Davida be momokani ia noho.

3 | Unai sivarai ese idia herevalaia gabudia be gabu korikoridia, a?

Baibel ia gwau tuari be Elaha kourana ai ia vara. To danu ma ia gwau, Pilistia taudia be Soko bona Aseka taoni edia huanai, ia noho ororo badinai idia kamepa. Israela taudia be ororo ena kahana ma ta dekenai idia kamepa. Unai be gabu korikoridia, a?

Mani turist tauna ta ena hereva oi laloa, ia gwau: “Ai ia hakaua tauna​—tomadiho tauna lasi​—ese Elaha ena koura dekenai ai ia hakaua lao. Ai daekau lao ela bona ororo ta ena ataiai ai ginidae. Koura kahana ai itaia neganai, ai ia hamaoroa 1 Samuela 17:1-3 ai duahia. Bena koura kahana ia poinia bona ia gwau: ‘Unai, emui laurina kahanai be idia hadikaia gabu ladana Soko.’ Ia giroa bona ma ia gwau, ‘Unai, emui idibana kahanai be idia hadikaia gabu ladana Aseka. Pilistia taudia be unai taoni rua huanai, ororo badinai idia kamepa. Unai dainai, ita be reana Israela taudia idia kamepa gabunai ita gini noho.’ Lau piksaia Saulo bona Davida idia gini gabunai lau gini noho. Bena ororo amo ai diho lao koura dekenai, bona ia kaukau vadaeni sinavai maragina ta ai hanaia, nadi be momo herea. Lau piksaia diba Davida be inai gabu dekenai nadi faiv ia abia, unai nadi ta amo Goliata ia hamasea.” Unai turist tauna be taunimaniama momo hegeregerena Baibel ena sivarai maorodia idia moaleaia bada.

Unai idaunegai sivaraina dekenai ita daradara be anina lasi. Ia sivarailaia taudia be momokani idia noho bona idia herevalaia gabudia be gabu korikoridia. To gau badana be, unai sivarai be Dirava ena Hereva ena kahana ta, unai dainai ia be hereva momokani Diravana amo ia mai, Ia be “ia koikoi diba lasi.”​—Tito 1:2; 2 Timoteo 3:16.