Hebogahisi Hereadaena Dainai Hahemauri Oi Abia

1, 2. Dahaka dainai Iehova ena Witnes taudia dekenai Roma 5:12 be mai anina bada?

MANI oi laloa, oi be oi ura Iehova ena Witnes taudia ese idia diba namonamo bona idia gaukaralaia momo siridia oi torea. Roma 5:12 do oi torea guna, a? Nega hida unai siri oi duahia? Ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.”

² Baibel be Dahaka Ia Hadibaia? bukana ai, unai siri be nega momo idia gaukaralaia. Emu natudia eiava ma haida ida unai buka oi stadilaia lalonai, reana Roma 5:12 do oi duahia, bema Dirava ena ura tanobada totona, mauri davalaia boubouna, bona mase taudia dekenai ia vara gauna oi herevalaia, unai be karoa 3, 5, bona 6 ai. To emu hetura karana Iehova ida, emu kara, bona vaira nega ena hahenamo oi lalodia neganai, Roma 5:12 oi laloa, a?

3. Kara dika be edena bamona do ita laloa?

³ Momokani, ita ibounai be goevadae lasi. Nega ibounai kerere ita karaia. To, Baibel ia gwau Dirava ia diba ita be kahu amo ia karaia, bona ia ura ita dekenai hebogahisi ia hahedinaraia. (Sal. 103:13, 14) Unai dainai Iesu ena guriguri ai, inai noinoi ia noho: “Emai kara dika oi gwauatao.” (Luka 11:2-4) Oibe, namo lasi Dirava ese ia gwauatao vadaeni kereredia ita laloa noho. To, namona be Dirava ese iseda kerere ia gwauatao dalana ita laloa, unai ese ita do ia durua.

HEBOGAHISI HEREADAENA DAINAI DIKA IA GWAUATAO

4, 5. (a) Roma 5:12 amo dahaka ita dibaia? (b) Roma 3:24 eseia herevalaia“hebogahisi hereadaena” be dahaka?

⁴ Aposetolo Paulo ena hereva Roma 5:12 ai bona ena badina karoadia, hegeregere karoa 6 ai, mai anina bada gaudia ita dibaia. Unai karoadia amo Iehova ese iseda dika ia gwauatao dalana do ita lalopararalaia. Karoa 3 ai, ita duahia: “Taunimanima ibounai be idia kara dika vadaeni. . . . To Dirava ese hebogahisi hereadaena be idia dekenai ia hahedinaraia, bona Keriso Iesu ia henia mauri davana amo idia ia ruhaia bona idia ia gwauraia maoromaoro, unai be iena davana lasi harihari gauna.” (Roma 3:23, 24) Inai hereva “hebogahisi hereadaena” ena anina be dahaka? Paulo ese ia gaukaralaia Grik herevana ena anina be buka ta ese inai bamona ia herevalaia, “ta totona kara namona ta oi karaia, bona oi karaia karana dainai davana oi noia lasi.” Oibe, ia be kara ta ena davana lasi.

⁵ Diba bada tauna John Parkhurst ia gwau: “Dirava o Keriso idia herevalaia neganai, nega momo [unai Grik herevana] idia gaukaralaia, bema taunimanima ruhaia bona hamauria totona idia hahedinaraia davana lasi bona hebogahisi hereadaena idia herevalaia.” New World Translation Baibel ai, inai hereva “hebogahisi hereadaena” idia gaukaralaia be maoro. To Dirava ese edena dala ai ena hebogahisi hereadaena ia hahedinaraia? Bona ena anina be dahaka, emu hetura karana Dirava ida bona emu vaira nega dekenai? Mani ita herevalaia.

6. Edena dala ai taunimanima be Dirava ena hebogahisi hereadaena amo namo idia davaria?

⁶ “Tau tamona” Adamu amo kara dika bona mase be “tanobada dekenai ia vareai.” Momokani, unai “tau tamona ena kara dika dainai, mase be king bamona unai tau amo ia lohia.” Paulo ma ia gwau Dirava ena “hebogahisi hereadaena . . . be ia bada herea momokani” bona unai be “tau tamona Iesu Keriso amo” ia hahedinaraia. (Roma 5:12, 15, 17) Bona unai hebogahisi hereadaena dainai, taunimanima ibounai be namo idia davaria. “Tau tamona [Iesu] ena kamonai karana dainai, taunimanima momo be kara maoromaoro taudia ai do idia lao.” Oibe, Dirava ena hebogahisi hereadaena dainai, “iseda Lohiabada Iesu Keriso amo mauri hanaihanai do ia mailaia.”​—Roma 5:19, 21.

7. Dahaka dainai Dirava ese mauri davana ia henia karana be hebogahisi hereadaena?

⁷ Iehova be mai moale ida tanobada dekenai ena Natuna ia siaia, mauri davalaia boubouna ia henia totona. Danu, goevadae lasi taudia totona Dirava bona Iesu ese mauri davalaia boubouna idia henia, bona unai ese iseda dika gwauatao dalana ia kehoa. Momokani, Dirava ese iseda dika ia gwauatao bona mauri hanaihanai helarona ita abia be hebogahisi karana hereadaena. Namona be Dirava ena hebogahisi hereadaena ita laloa bada bona unai ese iseda dina ta ta maurina do ia durua.

DIRAVA ENA HEBOGAHISI HEREADAENA LALOA BADA

8. Haida be edia kara dika dainai, dahaka lalohadai kererena idia abia?

⁸ Ita be Adamu ena bese taudia dainai, nega momo ita kerere eiava ita kara dika. To bema ita laloa, Dirava ena hebogahisi hereadaena dainai, ‘ena be kerere ta​—Dirava ese ia gwauraia dika karana​—⁠lau karaia, unai do lau lalohekwarahilaia lasi. Badina Iehova ese egu dika do ia gwauatao.’ Unai be lalohadai kererena. Madi, aposetolo taudia edia negai, Keristani taudia haida danu be unai bamona idia laloa. (Iuda 4 duahia.) Reana ita be unai bamona ita laloa lasi, to unai bamona lalohadai kererena be iseda lalona ai ia tubu matamaia diba.

9, 10. Paulo bona ma haida be edena dala ai kara dika bona mase amo ia ruhaia?

⁹ Paulo ena hereva amo ia hahedinaraia namo lasi inai lalohadai ita abia: ‘Dirava be ia laloparara. Ia ese egu kara kereredia do ia laloa bada lasi.’ Dahaka dainai? Badina Paulo ia gwau Keristani taudia be “kara dika dekenai [idia] mase.” (Roma 6:1, 2 duahia.) To idia be tanobada ai idia do mauri noho dainai, dahaka dainai Baibel ia gwau idia be “kara dika dekenai [idia] mase”?

¹⁰ Mauri davalaia boubouna dainai, Dirava ese Paulo bona ena negai idia noho taudia ia hanamoa. Oibe, Dirava ese edia kara dika ia gwauatao, lauma helaga amo idia ia horoa, bona iena natudia ai ia halaodia. Bena guba helarona idia abia. Bema edia abidadama idia dogoatao noho, idia be guba ai Keriso ida do idia noho bona lohia. Unai dainai ena be tanobada ai idia do mauri bona Dirava idia hesiai henia noho, to Paulo ese idia ia herevalaia neganai, ia gwau idia be “kara dika dekenai [idia] mase vadaeni.” Ia ese Iesu ena haheitalai ia gaukaralaia, ia be taunimanima ta bamona ia mase bena guba ai lauma tauna ta bamona ia toreisi lou. Oibe, mase ese Iesu ia biagua lasi. Horoa Keristani taudia danu be unai bamona, idia laloa idia ‘be kara dika dekenai idia mase vadaeni, to Keriso Iesu amo idia be Dirava totona idia mauri noho.’ (Roma 6:9, 11) Edia mauri dalana danu be ia idau. Hari idia be edia tauanina ena ura idia badinaia lasi. Unai be hegeregere idia be edia mauri gunana idia masetania vadaeni.

11. Edena dala ai ita be “kara dika dekenai [ita] mase vadaeni” bamona?

¹¹ Ita be edena bamona? Ita be Keristani taudia ai ita do lao lasi neganai, nega momo ita kara dika, reana nega haida ita laloparara lasi Dirava ena matanai ita karaia karadia be dika. Ita be ‘kara mirodia bona kara dika edia igui hesiai taudia bamona iseda tauanina ita henia, kara dika ita karaia totona.’ Unai be hegeregere, ita be “kara dika ena igui hesiai taudia.” (Roma 6:19, 20) Bena Baibel ena hereva momokani ita dibaia, iseda mauri ita haidaua, Dirava dekenai iseda mauri ita gwauhamatalaia, bona ita bapatiso. Unai nega amo, iseda lalona ita hadaia Dirava ena hahediba herevadia bona taravatu be “mai kudouna ibounai ida [ita] badinaia” totona. Ena be iseda hereva amo ita hahedinaraia lasi, to ita be “kara dika ena igui lalonai [ita] noho lasi” bona “kara maoromaoro ena igui hesiai taudia ai [ita] lao.” (Roma 6:17, 18) Unai dainai ita danu be “kara dika dekenai [ita] mase vadaeni” bamona.

12. Ita ta ta be dahaka abia hidi ita karaia diba?

¹² Mani Paulo ena hereva oi laloa, ia gwau: “Namo lasi kara dika be king bamona emui mase diba tauanidia ia biagua, unai amo edia ura umui badinaia.” (Roma 6:12) Bema hanaihanai iseda tauanina ena ura ita badinaia, “kara dika be king bamona” ita ia biagua diba. Ita sibona ese do ita abia hidi bema ita ura kara dika ese ita ia biagua eiava kara dika do ita dadaraia, to henanadai be inai, Iseda kudouna ai dahaka ita ura? Sibona oi nanadaia: ‘Nega haida, tauanina ena ura o lalohadai dainai dala kererena lau badinaia, a? Eiava kara dika dekenai lau mase vadaeni, a? Keriso Iesu amo lau be Dirava totona lau mauri noho, a?’ Unai henanadai edia haere oi diba totona, namona be Dirava ese iseda dika ia gwauatao karana amo ia hahedinaraia hebogahisi hereadaena oi laloa bada.

OI KWALIMU DIBA

13. Dahaka ese ia hamomokania ita ese kara dika ita dadaraia diba?

¹³ Iehova ena taunimanima be guna idia karaia karadia o havaraia huahua idia dadaraia, unai amo Dirava idia diba, lalokau henia, bona hesiai henia diba. Reana edia mauri gunana ai idia karaia “gaudia dainai hari [idia] hemarai. Badina unai gaudia edia dokona be mase.” (Roma 6:21) To gabeai edia mauri idia haidaua. Paulo ese ia tore henia Korinto taudia momo be unai idia karaia. Idia haida be kaivakuku idia tomadiho henia, idia heudahanai, tatau be hahine edia kara bamona idia karaia, idia henaohenao, idia inuinu kekero, bona unai bamona kara ma haida idia karaia. To Dirava ese idia ia “hagoevaia” bona ia “hahelagaia.” (1 Kor. 6:9-11) Roma kongrigeisen taudia haida danu be unai bamona. Paulo ese idia ia tore henia, ia gwau: “Namo lasi emui tauanina be kara dika dekenai umui henia, kara maoromaoro lasi tuari gaudia bamona, to mase amo idia mauri lou taudia bamona, Dirava dekenai sibona umui henia. Bona Dirava dekenai emui tauanina umui henia, kara maoromaoro ena tuari gaudia bamona.” (Roma 6:13) Paulo ia diba idia be idia goeva noho diba bona Dirava ena hebogahisi hereadaena amo namo do idia abia.

14, 15. Sibona dekenai dahaka henanadai do ita henia?

¹⁴ Hari danu be hegeregere. Guna iseda tadikaka taihu haida edia kara be Korinto taudia bamona. To idia danu be edia mauri idia haidaua. Idia ese edia kara dikadia idia rakatania bona “Dirava ese [idia] ia hagoevaia.” Reana oi dekenai unai be momokani, to hari emu hetura karana Iehova ida be edena bamona? Dirava ena hebogahisi hereadaena dainai, ia ese iseda dika ia gwauatao, unai dainai emu lalona oi hadaia “emui tauanina be kara dika dekenai [oi] henia” lasi totona, a? “Mase amo idia mauri lou taudia bamona, Dirava dekenai sibona [oi] henia,” a?

¹⁵ Unai ita karaia totona, namona be Korinto taudia haida ese idia karaia kara dika badadia ita dadaraia. Unai be mai anina bada bema ita be Dirava ena hebogahisi hereadaena ita abia dae bona “kara dika ese [ita] ia biagua” lasi. Bona iseda lalona ita hadaia haida ese idia laloa maragi kara dikadia be “mai kudouna ibounai ida” ita dadaraia totona, a?​—Roma 6:14, 17.

16. Keristani tauna ese kara dika badadia sibona ia dadaraia be hegeregere, a? Herevalaia.

¹⁶ Mani aposetolo Paulo ita laloa. Ita diba momokani ia be 1 Korinto 6:9-11 ese ia gwauraia kara dikadia ia karaia lasi. To, ia mamia ia be “mai ena kerere.” Ia gwau: “Lau be kara dika ena igui hesiai tauna. Lau karaia karadia lau lalopararalaia lasi. Badina lau ura karaia karadia lau karaia noho lasi, to lau inai henia karadia lau karaia.” (Roma 7:14, 15) Unai ese ia hahedinaraia Paulo ia laloa ia karaia kara haida be dika, bona ia hekwarahi unai kara ia dadaraia totona. (Roma 7:21-23 duahia.) Namona be ita danu ita hekwarahi “mai kudouna ibounai ida” unai bamona karadia ita dadaraia totona.

17. Dahaka dainai oi ura hereva momokani oi gwauraia?

¹⁷ Hegeregere, hereva momokani gwauraia karana mani ita laloa. Hereva momokani gwauraia karana be Keristani taudia edia kara ta. (Aonega Herevadia 14:5; Efeso 4:25 duahia.) Satani be “koikoi ena tamana.” Bona Anania bona ena adavana be idia koikoi dainai idia mase. Ita ura lasi unai bamona taudia edia kara ita tohotohoa​—⁠hereva koikoi ita dadaraia. (Ioa. 8:44; Kara 5:1-11) To unai sibona be hegeregere, a? Momokani, bema hereva momokani ita gwauraia, ita hahedinaraia ita be Dirava ena hebogahisi hereadaena ita laloa bada.

18, 19. Hereva momokani gwauraia karana mani oi herevalaia.

¹⁸ Koikoi ena anina be ta ese ia gwauraia herevana be ia momokani lasi. Iehova be ia ura lasi iena taunimanima be koikoi herevadia idia gwauraia, to unai sibona lasi. Idaunegai Israela taudia dekenai ia gwau: “Do umui helaga, badina be lau Lohiabada, emui Dirava, lau be helaga vadaeni.” Bona idia helaga totona do idia karaia karadia haida ia herevalaia. Dirava ia gwau: “Gau ta do umui henaoa lasi. Do umui koikoi karaia lasi. Do umui hereva koikoi lasi.” (Lev. 19:2, 11) Ena be ta ia gwau ia be do ia hereva koikoi lasi, to iena kara amo ma haida ia koia diba.

¹⁹ Hegeregere, tau ta ese ena bosi eiava gaukara turadia ia hadibaia, ia be murina dinana ai do ia gaukara lasi o gaukara do ia rakatania haraga, badina ia be do ia lao “hospital.” To momokani, ia be nega kwadogina lalonai muramura abia stoa (pharmacy) dekenai do ia lao eiava doketa ena davana sibona do ia karaia. Ia gaukara lasi ena badina badana be ia ura hanua dekenai ia lao haraga eiava ena ruma bese ida kone dekenai do idia lao. Unai tauna be momokani ia lao “hospital,” to oi gwau diba ia be hereva momokani ia gwauraia, a? Eiava ia koikoi? Reana unai bamona idia karaia taudia haida oi diba. Reana unai idia karaia unai amo panisi do idia abia lasi eiava ma haida edia gaukara amo namo idia abia totona. Ena be ta ia hereva koikoi lasi, to Dirava ena hahegani, be inai: “Do umui koikoi karaia lasi.” Bona Roma 6:19 ena hereva mani oi laloa danu, ia gwau: “Umui be kara maoromaoro ena igui hesiai taudia bamona emui tauanina umui henia, kara helagadia umui karaia totona.”

20, 21. Dirava ena hebogahisi hereadaena ese ita do ia doria dahaka ita karaia totona?

²⁰ Momokani, bema Dirava ena hebogahisi hereadaena ita laloa bada, ita ese heudahanai karana, inuinu kekero karana, eiava Korinto taudia ese idia karaia kara dikadia do ita dadaraia. Danu, Dirava ena hebogahisi hereadaena abia dae karana ena anina be matabodaga karadia ita dadaraia sibona lasi, to moale kara dikadia do ita dadaraia danu. Ita be kara maoromaoro ena igui hesiai taudia dainai, unai ese inuinu kekero karana amo ita ia gimaia, to unai sibona lasi, ita ia durua inuinu ela bona ita kekero karana ita dadaraia totona. Namona be ita hekwarahi bada noho unai bamona kara kereredia ita dadaraia totona, bona ita kwalimu diba.

²¹ Iseda ura badana be kara dikadia ita dadaraia. Ena be nega haida do ia auka, to namona be Paulo bamona ita hekwarahi unai kara ita dadaraia totona. Iena tadikaka dekenai ia gwau: “Namo lasi kara dika be king bamona emui mase diba tauanidia ia biagua, unai amo edia ura umui badinaia.” (Roma 6:12; 7:18-20) Kara dikadia ita tuari henia noho lalonai, ita hahedinaraia Dirava ese Keriso amo ia hahedinaraia hebogahisi hereadaena ita laloa bada.

22. Dirava ena hebogahisi hereadaena idia laloa bada taudia be dahaka ahuna do idia abia?

²² Dirava ena hebogahisi hereadaena dainai, ia ese iseda kara dika ia gwauatao bona do ia gwauatao noho. Unai dainai ma haida ese idia laloa maragi kereredia ita dadaraia be namo. Paulo ese do ita abia ahuna ia herevalaia, ia gwau: “Hari umui be kara dika ena igui lalonai umui noho lasi, to umui be Dirava ena igui hesiai taudia ai umui lao, bona umui havaraia huahua be kara helagana bona dokonai be mauri hanaihanai.”​—Roma 6:22.