INAI OI DIBA, A?

Baibel negadiai, lahi be edena bamona idia abia loaloa?

GENESE 22:6 ai ia noho sivaraina ese ia hahedinaraia, Aberahamo ese daudau tanona dekenai boubou gauna ia henia totona, ia ese “lahi boubou ena au ia henia iena natuna Isako dekenai, do ia huaia lao totona. To Aberahamo sibona ese lahi bona kaia iena imana dekenai ia abia lao. Idia ruaosi idia raka hamatamaia hebou.”

Baibel negadiai, lahi idia hamatamaia dalana be Baibel ese ia herevalaia lasi. To toretore tauna ta ia gwau, Aberahamo bona Isako edia laolao lalonai, reana idia abia lao lahina be “ia ara maragimaragi ela bona idia ginidae.” Reana ia be lahi hamatamaia totona idia gaukaralaia gauna ia herevalaia.

Ma haida idia gwau, Baibel negadiai, lahi hamatamaia totona be mai ena hekwarahi. To bema edia dekena taudia amo lahi gida sisina idia abia, do ia auka lasi lahi idia hamatamaia totona. Diba bada taudia ma haida idia gwau, Aberahamo be unai laolao ia karaia neganai, ia ese hodu ta ia huaia, unai hodu ena imana be reana seini amo idia karaia, bona ia lalonai idia ara noho lahi gida o au idia atoa, unai be hanuaboi ai haida ese idia karaia lahi amo idia abia. (Isa. 30:​14, NWT) Unai dala amo idia ara noho lahi gida o au idia abia lao neganai, do ia auka lasi edia laolao lalonai lahi idia hamatamaia totona.