“Tanobada Ibounai Ena Kota Biaguna” be Hanaihanai Kara Maoromaoro Ia Karaia

1. Aberahamo be Iehova dekenai dahaka ia diba momokani? (Laulau ginigunana herevalaia.)

“Tanobada ibounai ena kota biaguna be kara maoromaoro do ia karaia lasi, a?” (Gen. 18:25) Aberahamo be unai bamona ia henanadai, badina ia diba Iehova be Sodoma bona Gomora dekenai hahemaoro maoromaoro do ia karaia. Danu, ia diba Iehova be nega ta do ia kara gageva lasi, ia ese “kara maoromaoro taudia bona kara dika taudia be nega tamona do [ia] alaia lasi.” Oibe, Aberahamo ia diba Iehova be unai bamona do ia karaia lasi. Lagani 400 bamona murinai, Iehova be sibona ia gwauraia: “Ia be Nadi Badana, iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.”​—Deu. 31:19; 32:4.

2. Dahaka dainai ita gwau diba Iehova be ia kara gageva diba lasi?

² Dahaka dainai Aberahamo ia abia dae momokani Iehova ena hahemaoro karana be hanaihanai ia maoromaoro? Badina Iehova be kara maoromaoro Diravana. Oibe, Iehova be kara maoromaoro Diravana dainai, iena hahemaoro karana be nega ibounai ia maoro. Baibel ia gwau ia be “kara maoromaoro, bona kota maorona ia ura henia noho.”​—⁠Sal. 33:5.

3. Inai tanobada ai ia vara kara gagevana ta mani oi herevalaia.

³ Ena be inai tanobada ai kara gageva be bada, to kudou-maoro taudia idia moale, badina Iehova ena hahemaoro karana be hanaihanai ia maoro. Unai dainai kara maoromaoro taudia be nega haida idia kara dika henia. Hegeregere, haida be idia samania koikoi dainai, dibura ruma ai idia atodia. To teknoloji ia namo ia lao dainai haida be dibura ruma amo idia ruhadia, badina idia davaria idia be idia karaia lasi kereredia dainai lagani momo dibura ruma ai idia noho. Idia hahemaoro henidia kerere dainai, momo idia lalohisihisi bona badu. Keristani taudia dekenai unai bamona ia vara danu.

KONGRIGEISEN LALONAI

4. Dahaka ese Keristani tauna ena abidadama ia tohoa diba?

⁴ Keristani taudia be kongrigeisen murimuri amo kara gageva idia mamia danu. To bema kongrigeisen lalonai kara gageva ta ita itaia eiava mamia, unai ese iseda abidadama ia tohoa diba. Bema kongrigeisen lalonai o oi bona tadikaka ta huanai kerere ta ia vara, dahaka do oi karaia? Unai kara ese oi do ia hahekwakwanaia, a?

5. Bema kongrigeisen lalonai ta ia kara gageva, dahaka dainai ita hoa lasi be namo?

⁵ Ita ibounai be goevadae lasi dainai, kongrigeisen lalonai ta ese ita ia kara dika henia diba, eiava ita ese ma ta ita kara dika henia diba. (1 Ioa. 1:8) Ena be unai ia vara momo lasi, to ta ia kara gageva neganai, unai ese abidadama Keristani tauna do ia hahekwakwanaia lasi. Iehova ese Baibel lalonai sisiba namodia ia torea, unai amo iseda abidadama ita dogoatao noho diba, herevana iseda tadikaka ese ita idia kara dika henia.​—Sal. 55:12-14.

6, 7. Tadikaka ta dekenai dahaka ia vara, bona ia be dahaka ia karaia?

⁶ Mani Willi Diehl ena sivarai ita laloa. Lagani 1931 amo, Tadikaka Diehl be Bern, Switzerland, ena Betele ai ia gaukara. Lagani 1946 ai, ia be New York, U.S.A dekenai idia karaia Gilead Sikulina ena klas namba 8 dekenai ia lao. Gradueisen murinai, ia be Switzerland ai sekit gaukara ia karaia. Iena mauri sivaraina ai, Tadikaka Diehl ia gwau: “May 1949 ai, Bern ena hedikwota lau hadibaia lau ura headava.” Bern ena brens ofesi ena haere be dahaka? “Hahenamo ma haida do oi abia lasi, to do oi regula painia sibona.” Tadikaka Diehl ia gwau: “Lau be tok lau henia diba lasi . . . Tadikaka momo be ai idia hanamoa lasi, ai be orea amo idia atoa siri taudia bamona idia kara henia.”

⁷ Unai dainai Tadikaka Diehl be dahaka ia karaia? Ia gwau: “Ai diba Baibel ese headava ia taravatua lasi, unai dainai heduru totona ai guriguri, bona Iehova ai abidadama henia.” Daudau lasi, tadikaka ese edia lalohadai kererena headava dekenai idia hamaoromaoroa, bona Tadikaka Diehl be ena hesiai gaukara ena hahenamo ia abia lou. Iena badinaia karana dainai Iehova ese ia hanamoa.a Namona be sibona ita nanadaia, ‘Bema lau dekenai unai ia vara, do lau haheauka bona naria Iehova ese unai ia hamaoromaoroa totona, a? Eiava lau sibona ese unai do lau hamaoromaoroa?’​—Aon. 11:2; Mika 7:7 duahia.

8. Dahaka dainai nega haida lalohadai kererena ita abia diba?

⁸ Bema oi laloa kongrigeisen lalonai kara gagevana ia vara noho, reana oi be lalohadai kererena oi abia. Reana unai ia vara diba badina ita be goevadae lasi bona ia vara gauna dainai lalohadai kererena ita abia eiava badina ia vara gauna ita diba namonamo lasi. Ena be ia vara gauna dainai iseda lalohadai be ia maoro eiava kerere, to namona be mai guriguri ida Iehova dekenai ita tabekau, bona ia ita abidadama henia, unai amo Iehova do ita “badu henia noho” lasi.​—Aonega Herevadia 19:3.

9. Inai stadi bona stadi gabena ai, dahaka do ita herevalaia?

⁹ Baibel negadiai Iehova ena taunimanima dekenai ia vara kara gagevana mani ita laloa. Inai stadi ai, ita ese Aberahamo ena tubuna, Iosepa, do ita herevalaia, bona iena tadikaka dainai ia davaria hisihisina danu. Stadi gabena ai, ita be Iehova ese Israela ena king Ahaba ia kara henia dalana bona aposetolo Petero ese Suria Antioka ai ia davaria hekwakwanai do ita herevalaia. Unai sivaraidia ita herevalaia neganai, inai oi laloa, bema ta ese oi dekenai kara gageva ta ia karaia, dahaka do oi karaia Iehova oi abidadama henia noho bona emu hetura karana ia ida oi hagoadaia totona?

IOSEPA​—KARA GAGEVA IA MAMIA

10, 11. (a) Iosepa dekenai dahaka ia vara? (b) Iosepa be dibura ruma ai ia noho neganai, dahaka ia vara?

¹⁰ Iosepa, Iehova ia abidadama henia tauna, be kara gageva ia mamia, idau taudia sibona amo lasi, to iena tadikaka amo danu. Iosepa be mero matamata neganai, iena tadikaka ese ia idia dogoatao bona igui hesiai tauna bamona idia hoihoilaia. Bena Aigupito dekenai ia idia abia lao. (Gen. 37:23-28; 42:21) Gabeai, unai idau tanona ai, ia idia samania koikoi, idia gwau ia be ia ura hahine ta ia reipia, unai dainai dibura ruma ai idia atoa. (Gen. 39:17-20) Iosepa be lagani 13 lalonai igui hesiai gaukara ia karaia bona dibura ruma ai ia noho. Bema iseda tadikaka ta ese ita ia kara namo henia lasi, Iosepa ena kara amo dahaka ita dibaia?

¹¹ Dala ia kehoa neganai, Iosepa ese ena sivarai be dibura ruma ai ia noho tauna dekenai ia gwauraia. Unai dibura tauna be Farao ena wain bubu tauna. Unai wain bubua tauna bona Iosepa be dibura ruma ai idia noho neganai, ia be nihi ta ia abia bona Iosepa ese unai nihi ena anina ia gwauraia hedinarai. Ia hahedinaraia Farao ese unai wain bubua tauna dekenai ena gaukara do ia henia lou. Iosepa ese Dirava ena heduru amo unai nihi ena anina ia gwauraia neganai, iena sivarai ia gwauraia danu. Iosepa ese ia gwauraia herevadia bona ia gwauraia lasi herevadia amo diba ita abia.​—Gen. 40:5-13.

12, 13. (a) Edena bamona ita diba Iosepa be ia dekenai ia vara gauna dainai kara ta ia karaia? (b) Iosepa be wain bubu tauna dekenai dahaka ia herevalaia lasi?

¹² Genese 40:14, 15 duahia. Iosepa sibona ia gwau ia idia “henaoa.” Momokani, ia be unai kara gagevana ia mamia. Danu, ia gwau ia be kerere ta ia karaia lasi bona dibura ruma dekenai idia atoa. Unai dainai wain bubua tauna ia hamaoroa Farao dekenai iena sivarai do ia gwauraia. Dahaka dainai? Ia gwau: “Inai dibura ruma dekena amo lau do oi hakaua murimuri dekenai.”

¹³ Iosepa be dibura ruma ai ia noho neganai, ia be gau ta ia karaia lasi, a? Lasi, ia diba idia be ia dekenai kara maoromaoro idia karaia lasi. Ia ese wain bubua tauna dekenai iena sivarai ia gwauraia, bona ia diba ia ese ia do ia durua. To laloatao, Baibel ia gwau lasi Iosepa ese Farao eiava ma ta dekenai iena tadikaka ese idia karaia karana ia sivarailaia. Oibe, Iosepa ena tadikaka be Aigupito dekenai idia mai bona ia ida maino idia karaia neganai, Farao ese idia ia abia dae bona ia hamaorodia Aigupito ai do idia noho bona unai tano ena “kohu namodia dohore [idia] abia.”​—Gen. 45:16-20.

14. Ma ta ena ladana ita hadikaia lasi totona, dahaka ese ita do ia gimaia?

¹⁴ Bema Keristani tauna ta ia mamia haida ese ia idia kara namo henia lasi, namo lasi ma haida dekenai unai ia sivarailaia. Momokani, bema tadikaka ta be kerere badana ta ia karaia, elda taudia edia heduru ia tahua be namo. (Lev. 5:1) To, bema ia vara gauna be kerere maragina sibona, idia rua sibona ese unai idia hamaoromaoroa be namo, ma ta eiava elda taudia do idia hadibaia lasi. (Mataio 5:23, 24; 18:15 duahia.) Namona be Baibel ena hakaua herevadia hegeregerena unai bamona hekwakwanai ita hamaoromaoroa. Bona nega haida do ita laloparara iseda lalohadai be kerere. Bena do ita moale badina iseda Keristani tadikaka eiava taihu ena ladana ita hadikaia lasi! Laloatao, herevana ita be maoro eiava kerere, to ma ta maumauraia karana ese hekwakwanai do ia hamaoromaoroa lasi. Iehova bona iseda tadikaka badinaia karana ese ita ia gimaia diba. Salamo torea tauna ese “Dirava ia kamonai henia” tauna ia herevalaia neganai, ia gwau: “Ia ese iena hereva dekenai, haida ia hadikaia lasi, bona iena turana dekenai, hadikaia kara ta ia karaia lasi. Bona iena badibadinai ia noho tauna totona, hadikaia hereva ta ia gwauraia lasi.”​—Sal. 15:2, 3; Iam. 3:5.

MAI ANINA BADA HETURA KARANA

15. Iosepa be Iehova ia tura henia dainai, dahaka hahenamo ia abia?

¹⁵ Iosepa amo mai anina bada gauna ma ta ita dibaia. Lagani 13 lalonai dibura ruma ai ia noho neganai, ia be Iehova ena lalohadai hegeregerena gau ia karaia. (Gen. 45:5-8) Ia dekenai ia vara gauna dainai Iehova ia badu henia lasi. Ena be ia dekenai idia karaia karadia ia laloaboio lasi, to unai ia vara dainai ia badu lasi. Mai anina bada gauna be inai, ma haida edia kerere ese iena hetura karana Iehova ida ia hadikaia lasi. Iosepa be Iehova ia badinaia dainai, Iehova ese unai hekwakwanai ia hamaoromaoroa dalana bona ia bona ena famili ia hanamoa dalana ia itaia.

16. Hekwakwanai ia vara neganai, dahaka dainai Iehova kahirakahira ita lao be namo?

¹⁶ Unai hegeregerena, iseda hetura karana Iehova ida ita gimaia be namo. Namo lasi iseda tadikaka edia kara kereredia ese ita lalokau henia bona tomadiho henia Diravana amo ita ia hapararaia. (Roma 8:38, 39) To, bema tadikaka o taihu ta ese ita ia kara namo henia lasi, namona be Iosepa ita tohotohoa bona Iehova kahirakahira ita lao bona iena lalohadai hegeregerena gau ita karaia. Baibel ena hakaua hereva hegeregerena hekwakwanai ita hamaoromaoroa neganai, namona be Iehova ena imana dekenai ita rakatania bona ita abia dae momokani iena nega korikori ai gau ibounai do ia hamaoromaoroa.

“TANOBADA IBOUNAI ENA KOTA BIAGUNA” ABIDADAMA HENIA

17. Edena bamona do ita hahedinaraia “tanobada ibounai ena kota biaguna” ita abidadama henia?

¹⁷ Inai tanobada dikana lalonai ita noho neganai, kara gageva do ita mamia. Nega haida, reana oi eiava oi diba tauna ta be kongrigeisen lalonai kara gagevana ta ia itaia. Namo lasi unai ese oi ia hahekwakwanaia. (Sal. 119:165) Ita be Dirava ena abidadama hesiai taudia dainai, namona be ia ita badinaia, heduru totona ia ita guriguri henia, bona ia dekenai ita tabekau. Ma danu, mai manau ida ita gwauraia hedinarai ita be ia vara gauna ena sivarai ibounai ita diba lasi. Bona ita laloparara, ita be goevadae lasi dainai, lalohadai kererena ita abia. Iosepa ena kara hegeregerena, ita ura lasi ita maumau, badina unai bamona kara ese hekwakwanai ia habadaia diba. Laloatao, namo lasi ia vara hekwakwanai be ita sibona ese ita hamaoromaoroa, to namona be Iehova ita badinaia bona mai haheauka ida ia ita naria unai hekwakwanai ia hamaoromaoroa totona. Bema unai ita karaia, Iehova ese ita do ia lalonamo henia bona hanamoa, Iosepa dekenai ia karaia bamona. Oibe, ita abia dae momokani Iehova, “tanobada ibounai ena kota biaguna” be hanaihanai kara maoromaorona do ia karaia, badina “iena dala ibounai be maoro, bona iena kota be momokani.”​—Gen. 18:25; Deu. 32:4.

18. Stadi gabena ai dahaka do ita herevalaia?

¹⁸ Stadi gabena ai, ita ese Baibel negadiai Iehova ena taunimanima dekenai ia vara kara gagevana do ita herevalaia. Unai sivarai rua ese ita do ia durua manau karana ita hahedinaraia bona mai ura bada ida dika ita gwauatao totona, unai amo Iehova ena kara maoromaoro ita tohotohoa.