“Edia Ura Bona Lalokau Ia Habadaia, Guna Bamona Lasi”

SEPTEMBER 1922 ena Friday daba ai, taunimanima 8,000 be ruma badana ta dekenai idia haboua. Bena seamani ese idia haboua taudia ia hamaoroa, unai mai anina bada negana ai, bema ta ia ura gabu ia rakatania, ia lao diba, to ia be do ia vareai lou lasi.

“Praise Service” ena hebouhebouna hamatamaia anena idia abia murinai, Joseph F. Rutherford be podium kahirakahira ia lao. Idia helai taudia momo be idia ura dikadika do ia gwauraia herevana idia kamonai. To haida be idia laloa momo dainai idia lao mai. Bena tadikaka ese idia ia hamaoroa do idia helai bona hereva do idia kamonai. Tok ia matamaia neganai, idia lokua namonamo bona guhi dekenai idia tauadae dabuana be ta ese ia itaia, a?

Tadikaka Rutherford ena tok ena hereva kwarana be “Guba basileiana be ia kahirakahira.” Hora ta mai kahana lalonai, ia ese mai gado bada ida idaunegai peroveta taudia ese mai gari lasi ida Basileia idia harorolaia dalana ia gwauraia. Iena tok dokonai, ia henanadai, “Oi abia dae Pavapava mai hairaina be ia lohia matamaia vadaeni, a?” Idia helai taudia ibounai idia boiboi idia gwau: “Oibe!”

Bena Tadikaka Rutherford be mai gado bada ida ia gwau: “Ataiai momokani Diravana ena natudia e, umui lao haroro! Itaia, Pavapava ia lohia vadaeni! Umui be iena gwaukau taudia. Unai dainai umui haroro, haroro, haroro.”

Unai nega ai idia tauadae dabuana idia hadihoa, ia latanai inai hereva ia noho: “Pavapava bona iena Basileia umui harorolaia.”

Ray Bopp ia gwau: “Idia helai taudia be idia hoa bada.” Bona Anna Gardner ia gwau: “Hutuma ese edia imana idia patapataia badabada dainai, guhi dogoatao audia idia mareremarere danu.” Bona Fred Twarosh ia gwau: “Helai taudia ibounai be idia gini tore.” Evangelos Scouffas ia gwau: “Ia be hegeregere siahu bada gauna ta ese emai sea amo ai ia abia isi, bona ai gini tore bona emai mata ranu idia diho.”

Unai hebouhebou ai idia noho taudia momo be Basileia ena sivarai namona harorolaia taudia. To, idia kamonai herevana ese idia ia hagoadaia bada. Ethel Bennecoff ia gwau, unai ese Bible Student taudia “edia ura bona lalokau ia habadaia, guna bamona lasi.” Taihu Odessa Tuck, unai nega ai ena mauri lagani be 18, be hebouhebou ia rakatania neganai, ia ese inai boiboi herevana, “Daika do ia lao?,” ia abia dae. Ia gwau: “Lau diba lasi edeseni o edena bamona o dahaka do lau karaia. To lau diba gauna be lau ura Isaia ena kara lau tohotohoa, ia gwau: ‘Lau be inai, do lau lao! Lau do oi siaia!’” (Isa. 6:8) Ralph Leffler ia gwau: “Unai be moale dinana, badina unai dina ai Basileia harorolaia gaukarana ai karaia matamaia, bona hari unai gaukara be tanobada ibounai ai ita karaia noho.”

Tiokratik histori ai, lagani 1922, Cedar Point, Ohio, dekenai idia karaia hebouhebouna be mai anina bada! George Gangas ia gwau: “Unai hebouhebou ese lau ia hagoadaia hebou ta lau reaia lasi totona.” Bona momokani, ia be hebou ta ia reaia lasi. Julia Wilcox ia gwau: “Iseda pablikeisen idauidau ese lagani 1922 Cedar Point idia herevalaia neganai, lau moale bada. Nega momo lau ura gwau, ‘Iehova e, tanikiu bada, badina unai hebouhebou dekenai lau noho.’”

Momokani, reana ita danu be hebouhebou ta ita laloaboio diba lasi, badina unai hebouhebou ese iseda ura bona lalokau iseda Dirava bona ena King dekenai ia habadaia. Unai negadia ita laloa lou neganai, ita danu do ita gwau, “Iehova e, tanikiu bada, badina unai hebouhebou dekenai lau noho.”