Portugal Dekenai Basileia Ena Uhe Ginigunadia Idia Hadoa Dalana

ATLANTIC ena hurehure ese bouti ia botaia bona Europe dekenai ia lao noho lalonai, pasendia ta ladana George Young, be mai moale ida Brazila ai ia karaia Basileia gaukarana ia laloa. To, Tadikaka Young be ena laolao lalonai, ena asainmen matamatana​—idia do haroro lasi Spain bona Portugal edia teritori badadia unai​—ia laloa. Ia ginidae neganai, dala ia karaia Tadikaka J.F.Rutherford ese Baibel tok idauidau do ia henia totona bona pepapepa ibounai 300,000 do ia hariharilaia!

Tadikaka Young be lagani 1925 ai, Lisbon dekenai ia lao neganai, gau haida idia idau. Hegeregere, lagani 1910 ai gavamani ese guna idia lohia taudia edia gaukara idia hadokoa dainai Katolik dubu edia gaukara ena siahu ia ore. Unai nega ai taunimanima be taravatu ta ese ia guia lasi, to unai tano ai tuari be ia ore lasi.

Tadikaka Young be tadikaka Rutherford ena tok do ia henia totona dala ia karaia noho lalonai, gavamani ese ami amo taravatu ia atoa, badina ami haida idia ura gavamani taudia idia hamorua toho. Unai dainai British and Foreign Bible Society ena seketere ese Tadikaka Young ia hadibaia dagedage do ia davaria, to Tadikaka Young be mai gari lasi ida ena gaukara ia karaia, ena be bomu amo ia idia hagaria danu. Ia be Camões Secondary School ena eksasais ruma badana totona ia noinoi, bona gwaumaoro idia henia ia gaukaralaia totona.

Bena, May 13​—Tadikaka Rutherford ese tok do ia henia dinana ia ginidae. Momo be idia moale bada! Kadi bona niuspepa amo pablik tok ena sinado “Tanobada Dekenai Do Oi Noho Hanaihanai Dalana” idia halasia. Tomadiho idia dagedage henia taudia be kara haraga edia niuspepa ai atikol ta idia halasia edia duahia taudia idia hadibaia “peroveta koikoi tauna” ta ia ginidae. Sikuli ena eksasais rumana vairanai, unai dagedage taudia be Tadikaka Rutherford ese ia hadibaia gaudia idia hakoikoia totona, buklet ta be taunimanima tausen momo dekenai idia hariharilaia.

To, taunimanima 2,000 bamona ese unai ruma idia hahonua, bona 2,000 bamona be idia vareai lasi badina gabu ia honu. Unai sivarai idia ura kamonai taudia haida be eksasais ruma ena saidi ai idia noho varo amo idia karaia vada dekenai idia helai; ma haida be eksasais kohudia latanai idia helai. Haida idia mai badina idia laloa Tadikaka Rutherford be mauri hanaihanai ena mejik ranu ia hoihoilaia!

Gau haida idia heau namonamo lasi. Dagedage taudia be mai boiboi ida helai gaudia idia hadikaia. To, Tadikaka Rutherford be ia haheauka bona mai manau ida teibolo ataiai ia daekau unai amo ia henia tok be ibounai idia kamonai diba. Iena tok murinai​—hanuaboi 12 oklok bamona ai​—kamonai taudia 1,200 mai kahana be Baibel bukadia idia abia totona edia ladana bona adres idia henia. Unai dina murinai, O Século niuspepa ena atikol ta ai, Tadikaka Rutherford ena Pablik tok idia halasia.

September 1925 ai, Portugal dekenai, Portuguese gado ai idia hahanaia Gima Kohorona idia halasia matamaia. (Guna, Portuguese-gado gauna be Brazil ai idia halasia.) Unai nega ai, Brazil ai ia noho Baibel stiuden ta, Virgílio Ferguson, be palani ia karaia Portugal dekenai do ia lao, Basileia gaukarana ia durua totona. Guna, ia be Tadikaka Young ida Brazil ai, Bible Student taudia edia brens ofesi dekenai idia gaukara. Daudau lasi murinai, Virgílio be ena hahine Lizzie ida idia lao, Tadikaka Young idia bamoa lou totona. Tadikaka Ferguson be nega maorona ia ginidae, badina Tadikaka Young be daudau lasi gabu ma haida dekenai do ia lao haroro totona, idia ta be Soviet Union.

Portugal ai ami taudia ese gavamani aukana ta idia haginia neganai, unai tano taudia be nega aukadia idia davaria bona iseda haroro gaukara idia koua toho. Tadikaka Ferguson be ia gini goada bona Baibel Stiuden taudia edia orea maragina ia gimaia bona idia ia hagoadaia edia gaukara idia karaia totona. Ia ura gwaumaoro do ia abia unai amo ena ruma ai hanaihanai hebou do idia abia. Bona October 1927 ai, gwaumaoro idia henia.

Unai gavamani aukana ena nega lalonai, Portugal ai taunimanima 450 bamona be The Watch Tower idia durua. Danu, pepapepa bona buklet idauidau amo hereva momokani be Portuguese Gavamani henunai idia noho daudau gabudia​—Angola, Azores, Cape Verde, East Timor, Goa, Madeira, bona Mozambique​—dekenai ia lao.

Lagani 1920 lalodiai, Portuguese ai uma karaia tauna, Manuel da Silva Jordão, be Lisbon dekenai ia mai. Brazil ai ia noho lalonai, Tadikaka Young ese ia henia tok ta ia kamonai. Bona ia abia dae unai be hereva momokani, bona ia ura dikadika Tadikaka Ferguson ia durua haroro gaukara idia habadaia totona. Unai dainai, Manuel be kolpota (hari idia gwauraia painia) gaukara ia karaia. Baibel bukadia idia printaia bona hariharilaia karana dainai, Lisbon ai kongrigeisen matamatana be ia goada matamaia!

Lagani 1934 ai, Tadikaka bona Taihu Ferguson be Brazil dekenai idia giroa lou. To, hereva momokani ena uhe idia hadoa vadaeni. Ena be Europe ai, Spain taudia idia tuari heheni bona Tanobada Tuarina Iharuana ia vara, to Portugal ai idia noho abidadama taudia be Iehova idia badinaia noho. Nega sisina lalonai idia be ia araia noho lahi gida bamona idia noho, to lagani 1947 ai misinari ginigunana John Cooke, ia ginidae neganai, inai orea maragina ia goada lou, lahi ia hururu lou bamona. Unai murinai, Basileia harorolaia taudia edia namba ia tubu daekau. Danu lagani 1962 ai, gavamani taudia be Iehova ena Witnes taudia edia gaukara idia koua, to pablisa taudia edia namba ia bada ia lao. December 1974 ai, Iehova ena Witnes taudia be orea idia rejista neganai, unai tano ai pablisa taudia 13,000 bamona idia noho.

Hari, pablisa 50,000 mai kahana be Portugal ai, Portuguese gado idia hereva motumotu haida, Azores bona Madeira dekenai danu, Dirava ena Basileia ena sivarai namona idia harorolaia noho. Unai pablisa taudia huanai hari idia noho pablisa haida be lagani 1925 ai Tadikaka Rutherford ena tok idia kamonai taudia edia bese amo idia mai.

Namona be Iehova bona abidadama tadikaka bona taihu ginigunadia ita tanikiu henia, badina mai boga-auka ida ‘Keriso Iesu ena hesiai taudia’ ai idia lao bona unai gaukara idia gunalaia.​—Rom. 15:15, 16.​—Orea ena Histori​—Portugal ai.