Eda Haroro Gaukara Ita Karaia Namonamo Dalana—Baibel Stiuden Durua Baibel Stadilaia Karana Ia Manadalaia Totona

Dahaka Dainai mai Anina Bada: Baibel stiuden be lo Keristani tauna ai ia lao totona, namona be ena lalona bona kudouna ia hegaegaelaia bona Baibel ena hereva dobudia ia dibaia danu. (Heb. 5:12–6:1) Stadi totona ita hekwarahi bona nega ita atoa be gau badana. Anina be idia halasia diba matamatadia oi laloa dobu bona do oi badinaia daladia oi laloa. (Aon. 2:1-6) Bema eda Baibel stiuden taudia dekenai tahua karana ita hadibaia, Baibel henanadai haida edia haere be idia sibona ese iseda pablikeisen amo do idia tahua. Bema idia dibaia gaudia be mai kudouna ibounai ida idia badinaia, Keristani taudia ai idia lao neganai, do idia davaria hahetoho idia haheaukalaia diba.—Luka 6:47, 48.

Karaia Dalana:

Baibel stiuden hagoadaia ena stadi negadia ta ta ai, Iehova ena heduru ia noia guna be mai anina bada.—Ioa. 14:26; 1 Kor. 2:10.
Gau ginigunana be Baibel stiuden tauna oi hagoadaia ena stadi totona ia hegaegae guna. Emu buka oi hahedinaraia bona iena buka dekenai paragraf eiava hereva badadia do ia makaia dalana oi hadibaia.
Emu stiuden durua sibona ena hereva amo henanadai ia haerelaia totona. Namo lasi henanadai ita henia bona stiuden be buka dekenai ena haere ia duahia sibona.
Emu Baibel stiuden oi hagoadaia dina ta ta ai Baibel ia duahia totona. Ia dekenai jw.org ai ia noho Baibel duahiduahi ena sediual oi hahedinaraia bona do ia badinaia dalana oi hadibaia. Ita hekwarahi dina ta ta Baibel ita duahia totona, badina unai ese namo ia havaraia diba.—Sal. 1:2, 3.
Emu Baibel stiuden dekenai Watchtower Library eiava Watchtower ONLINE LIBRARY amo Baibel henanadai edia haere ia davaria dalana oi hadibaia. Ia oi durua hanaihanai kongrigeisen heboudia ai idia gaukaralaia pablikeisen, leta rua ai idia torea gaudia ia dibaia totona, hegeregere fg be Dirava Ena Sivarai Namona buklet ia herevalaia.

Hari Hua Oi Tohoa Gauna be Inai:

Hereva kwarana maragina o karoa ta ena dokona dekenai, Baibel stiuden tauna oi noia ia dibaia gaudia ena point badadia ia herevalaia sisina. Bema oi be ta oi stadi henia lasi, Baibel ena karoa ta o Gima Kohorona ena paragraf ta ai point badadia oi gwauraia lou, unai ese emu duahiduahi karana do ia hanamoa.