Edena Bamona Emu Guriguri Do Ia Kamonai Henia?

Iehova Dirava be “guriguri kamonai Diravana.” (Salamo 65:2) Ia ita hereva henia diba, gabu bona nega idauidau ai bona ita gwauraia badabada eiava iseda lalona ai. Iehova ia ura ia ita gwauraia “Tamana.” Ia be iseda Tamana hereadaena. (Mataio 6:9) Iehova ese mai lalokau ida, ita dekenai guriguri dalana ia hadibaia bona ita do ia kamonai henia.

IESU LADANA AI IEHOVA DIRAVA ITA GURIGURI HENIA

“Bema egu ladanai Tamana dekenai gau ta umui noia, umui dekenai do ia henia.”—Ioane 16:23.

Iesu ena hereva amo ia hahedinaraia goevagoeva, Iehova ia ura Iesu Keriso ena ladana ai Ia ita guriguri henia, to kaivakuku, seint, aneru, eiava idia mase taudia edia amo lasi. Iesu ena ladana ai Dirava ita guriguri henia neganai ita hahedinaria Iesu ena dagi ita matauraia. Iesu ia gwau “Lau sibona amo tau ta be Tamana dekenai ia mai diba.”—Ioane 14:6.

MAI LALONA IBOUNAI IDA ITA HEREVA

“Ia dekenai umui laloa gaudia ibounai umui gwauraia.”—Salamo 62:8.

Iehova ita guriguri henia neganai, iseda lalokau bada tamana ta ita hereva henia hegeregerena ia ita hereva henia be namo. Buka ta amo ita duahia lasi bona hereva ita gwauraia loulou lasi, to mai hemataurai ida bona iseda kudouna amo ita hereva.

DIRAVA ENA URA HEGEREGERENA ITA GURIGURI

“Herevana dahaka ita gurigurilaia, bema unai be Dirava ena ura hegeregerena, ia ese ita do ia kamonai henia.”—1 Ioane 5:14.

Baibel lalonai, Iehova Dirava ese ita totona do ia karaia gaudia ia gwauraia, bona ena ura ia totona do ita karaia gaudia ia gwauraia hedinarai danu. Dirava ese iseda guriguri ia abia dae totona, namona be iseda guriguri be ‘iena ura hegeregerena.’ Unai ita karaia totona, Baibel ita stadilaia, badina unai amo ia do ita dibaia namonamo. Bema unai ita karaia Dirava ese iseda guriguri do ia moalelaia.

DAHAKA TOTONA ITA GURIGURI DIBA?

Ruma bese ta be aniani idia do abia lasi neganai idia guriguri hebou.

Emu Dabu Gaudia Totona Oi Guriguri. Dirava dekenai dina ta ta ai iseda mauri durua gaudia, hegeregere—aniani, dabua, bona noho gabuna totona ita guriguri be namo. Aonega ita noia, disisen namodia ita karaia bona goada ita noia hahetoho gaudia ita haheaukalaia totona. Dirava amo abidadama, iseda kara dika ia gwauatao bona ena heduru ita noia diba.—Luka 11:3, 4, 13; Iamesi 1:5, 17.

Hospital ai tau ta be bedi badinai iena gorere hahine ida ia guriguri.

Ma Haida Totona Oi Guriguri. Tama sina be edia natudia idia lalokau heheni neganai idia moale. Unai hegeregerena, Iehova ena ura be ena natudia tanobada dekenai idia laloa bada heheni. Iseda adavana, natudia, bese taudia bona tura namodia totona ita guriguri be namo. Hahediba tauna Iamesi ese ia torea hegeregerena, ia gwau, “ta ta totona do umui guriguri.”—Iamesi 5:16.

Dina ia diho noho neganai tau ta be uma gabuna dekenai ia raka.

Tanikiu Herevana Oi Gwauraia. Ita ia Havaraia Tauna ia herevalaia neganai, Baibel ia gwau: “Umui dekenai medu bona aniani momo negadia ia henia, vadaeni aniani momo umui abia bona emui kudouna ia hamoalea.” (Kara 14:17) Dirava ese ita totona ia karaia gaudia ibounai ita laloa neganai, ita ura iseda guriguri amo ia ita taniku henia. Danu, iseda mauri dalana amo Dirava dekenai iseda tanikiu karana ita hahedinaraia.—Kolose 3:15.

MAI HAHEAUKA IDA OI GURIGURI HANAIHANAI

Reana nega haida ita lalohekwarahi badina iseda guriguri ena haere ita abia haraga lasi. To ita laloa Dirava be ita ia laloa lasi, a? Lasi! Namona be ita guriguri noho. Mani ekspiriens haida ita laloa.

Atikol ginigunana lalonai ia noho tauna ladana Steve, ia gwau, “Bema guriguri be lasi neganai, idau nega egu mauri lau hadokoa.” Badina be dahaka ena lalohadai ia haidaua? Baibel ia stadilaia matamaia, danu guriguri ena namo bona nega ibounai guriguri noho karana ia dibaia. Steve ia gwau, “Dirava lau guriguri henia bona egu tura namodia edia lalokau bona heduru dainai lau tanikiu henia. Hari egu moale be bada herea guna bamona lasi.”

Jenny be edena bamona? Ia laloa ena kara dika dainai Dirava ese ena guriguri do ia kamonai henia lasi. Ia gwau, “Lau lalohekwarahi bada neganai, Dirava lau noia lau ia durua totona, lau ura lau diba, dahaka dainai lau mamia egu mauri be anina lasi?” Heduru ia abia, a? “Dirava lau hereva henia dainai laloparara lau abia. Lau diba, ena be egu kudouna ese lau ia gwauraia dika to Ia ese lau ia gwauraia dika lasi. Unai heduru dainai lau haheauka noho.” Dahaka ia vara? “Guriguri ese lau ia durua dainai hari lau diba Iehova be momokani, mai ena lalokau bona hebogahisi bada Diravana, Tamana bona Turana, hanaihanai ia noho hegaegae lau ia durua totona bema lau gaukara goada iena ura do lau karaia noho.”

Isabel be ena tau bona natuna ida. — Ena natuna Gerard ia itaia, ena be ena tauanina be mai ena dika, to ena mauri ia moalelaia noho, Isabel ia gwau, “lau diba ia be egu guriguri ena haere namo hereana momokani.”

Isabel ena sivarai mani ita laloa danu. Ia rogorogo neganai ena doketa tauna ia gwau bema ena beibi ia vara, ena tauanina be mai ena dika. Ia lalohisihisi bada herea. Haida idia laloa ena beibi ia hamasea be namo. “Egu kudouna be ia hisihisi bada dainai lau laloa do lau mase.” Dahaka ia karaia? Ia gwau, “Dirava lau guriguri henia hanaihanai ena heduru totona.” Vadaeni, natuna mero ta ia havaraia, ladana Gerard, ena tauanina be mai ena dika. To Isabel be ia laloa Dirava ese ena guriguri ia haerelaia, a? Oibe! Edena bamona? Isabel ia gwau, “hari egu natuna ena mauri lagani be 14, lau itaia ena be ena tauanina be mai ena dika, to ena mauri ia moalelaia noho. Lau diba ia be egu guriguri ena haere namo hereana momokani, ia be Iehova Dirava ena hahenamo hereadaena lau dekenai.”

Edia kudouna amo idia mai hereva namodia dainai salamo ia torea tauna ena hereva ita laloa. Ia gwau: “To Iehova e, oi ese manau taudia edia noinoi do oi kamonai. Oi ese edia lalona do oi hagoadaia bona idia oi kamonai henia namonamo.” (Salamo 10:17) Unai badina hereadaena dainai mai haheauka ida do ita guriguri noho.

Iesu ena guriguri momo be Baibel lalonai idia noho. Taunimanima momo idia diba gurigurina be ena hahediba taudia dekenai ia hadibaia gauna. Unai guriguri amo dahaka do ita dibaia?

Iesu ese Guriguri Dalana Ia Hadibaia

Ororo Harorona ai, Iesu ese ena hahediba taudia dekenai do idia badinaia guriguri ia gwauraia, unai guriguri idia gwauraia Lohiabada Ena Guriguri. (Mataio 6:9-13; danu Luka 11:2-4 itaia.) Lagani momo idia hanaia vadaeni, taunimanima momo ese unai guriguri idia laloatao bona ena hereva ta ta idia gwauraia loulou diba. Iesu ese unai guriguri ia hadibaia ena badina be unai, a? Guna Iesu ia haroro neganai, ena hahediba taudia ia hadibaia idia guriguri neganai, namo lasi gau tamona idia gwauraia loulou. (Mataio 6:7) Oibe, Iesu be ena hahediba taudia dekenai guriguri dalana ia hadibaia bona dahaka totona idia guriguri be namo. Mani ita itaia unai guriguri amo dahaka ita dibaia.

“Aiemai Tamana guba dekenai oi noho”

Namona be Dirava sibona ita guriguri henia.

“Namona be ibounai ese emu ladana idia hahelagaia”

Dirava ena ladana Iehova, ita hanamoa bona hahelagaia be namo.

“Oiemu Basileia ia mai be namo”

Dirava ena Basileia be guba gavamani bona Iesu be King, kahirakahira tanobada ibounai do ia lohiaia.

“Emu ura gauna tanobada dekenai ia vara be namo, guba dekenai ia vara bamona”

Dirava ia ura taunimanima do idia mauri hanaihanai, tanobada ai mai maino ida, bona noho namona do idia abia.

“Mani ai dekenai hari dina ena aniani oi henia”

Iehova sibona ese iseda mauri durua gaudia ia henia.

“Mani emai kara dika oi gwauatao”

Ita ibounai be kerere momo ita karaia bona ita ura iseda dika ia gwauatao.

Unai point ta ta oi lalodia neganai unai ese oi do ia durua mai kudouna ibounai ida guriguri oi gwauraia totona.