Iehova ida Emu Hetura Karana Oi Hanamoa Lou

LAGANI ta ta ai, Dirava ese ia laloa bada mamoe momo be kongrigeisen dekenai idia giroa lou. Unai ia vara neganai, guba ai ia vara moalena mani ita laloa! (Luka 15:7, 10) Bema oi be kongrigeisen dekenai oi giroa lou, namona be oi abia dae Iesu, aneru, bona Iehova be oi dekenai idia moale bada. To, Iehova ida emu hetura karana oi hanamoa noho lalonai, hekwakwanai momo do oi davaria. Unai hekwakwanai haida be dahaka, bona dahaka ese oi do ia durua?

HEKWAKWANAI HAIDA BE DAHAKA?

Ena be tadikaka taihu momo be kongrigeisen ai idia giroa lou, to idia do lalomanoka noho. Reana King Davida ena hemami oi lalopararalaia diba. Ena be Dirava ese iena kara dika ia gwauatao, to Davida ia gwau: “Egu lalona ia manoka.” (Sal. 40:12; 65:3) Ta be Iehova dekenai ia giroa lou murinai, reana ia karaia kerere dainai lagani momo do ia lalohisihisi eiava do ia hemarai. Isabela be lagani 20 mai kahana orea murimuri ai ia noho.a Ia gwau: “Lau abia dae lasi Iehova be egu kara dika ia gwauatao diba.” Bema oi lalomanoka, Iehova ida emu hetura karana do ia dika lou. (Aon. 24:10) Namona be oi dekenai unai ia vara lasi.

Haida idia lalohisihisi, badina idia mamia Iehova ida edia hetura karana do idia hanamoa lou gaudia idia karaia diba lasi. Antony ia giroa lou murinai, ia gwau: “Lau mamia guna lau noholaia Keristani mauri dalana lau laloaboio.” Unai hemami dainai, haida be Iehova totona gau momo idia karaia diba lasi.

Mani inai haheitalai ita laloa: Bema lai gubana ese tau ta ena ruma ia hadikaia, ia haginia lou totona ena goada bona nega ia laloa neganai, ia lalohisihisi bada. Unai hegeregerena, bema kara dika badana ta oi karaia dainai emu hetura karana Iehova ida ia dika, do oi mamia gaukara badana do oi karaia emu hetura karana ia namo lou totona. To heduru abia dalana ia noho.

Iehova ese ita ia boiria: “Umui mai, ita huanai iseda hereva ita hamaoromaoroa.” (Isa. 1:18) Oi gaukara goada vadaeni Dirava ida ‘hereva umui hamaoromaoroa’ totona. Unai dainai Iehova ese oi ia lalokau henia. Mani inai oi laloa: Oi be Iehova dekenai oi giroa lou dainai, ia ese oiemu haheitalai do ia gaukaralaia Satani ena koikoi herevana ia haerelaia totona!—Aon. 27:11.

Iehova dekenai oi giroa lou karana amo, ia kahirakahira oi lao vadaeni, bona ia gwauhamata ia be oi kahirakahira do ia mai. (Iam. 4:8) Bona tadikaka taihu ese idia itaia oi be kongrigeisen dekenai oi giroa lou vadaeni, to gau haida oi karaia be namo. Gau badana be emu Tamana bona Turana, Iehova, dekenai emu lalokau oi hagoadaia noho. Edena dala ai unai oi karaia diba?

OI HAGUGURUA DIBA TAHUA GAUDIA ATOA

Namona be oi hagugurua diba tahua gaudia oi atoa. Reana oi dibaia vadaeni gaudia hegeregere, Iehova bona ia gwauhamatalaia Paradaiso oi do laloatao noho. To namona be Keristani mauri dalana oi badinaia lou, hegeregere oi haroro hanaihanai, hebou oi lao, bona emu tadikaka taihu oi bamoa. Mani tahua gaudia haida oi laloa.

Iehova guriguri henia hanaihanai. Emu Tamana ia laloparara emu kerere dainai oi lalohisihisilaia noho, bona oi guriguri henia be auka. (Roma 8:26) To, “guriguri [oi] hadokoa lasi,” bona Iehova oi hamaoroa iena hetura karana oi ura henia bada. (Roma 12:12) Andrei ia gwau “Lau karaia kerere dainai lau lalohisihisi bona hemarai noho. To nega ta ta ai Dirava lau guriguri henia murinai, egu hemami ia namo. Bona lalomaino lau abia.” Bema guriguri lalonai oi diba lasi dahaka do oi gwauraia, mani Salamo karoa 51 bona 65 dekenai King Davida ena helalo-kerehai guriguridia oi laloa.

Baibel stadilaia hanaihanai. Unai ese oi do ia durua emu abidadama oi hagoadaia bona emu lalokau Iehova dekenai do ia bada. (Sal. 19:7-11) Tadikaka Felipe ia gwau: “Baibel duahiduahi bona sibona egu stadi karaia totona sediual namona lau karaia lasi dainai, lau manoka bona Iehova ena lalona lau hahisia. Lau ura lasi unai ia vara lou dainai, lalona lau hadaia sibona egu stadi lau karaia hanaihanai totona.” Oi danu be unai bamona oi karaia diba. Bema sibona emu stadi karaia totona topik namona ta oi ura abia hidi, lo turana ta ena heduru oi tahua diba.

Tadikaka taihu oi bamoa lou. Idia giroa lou taudia haida idia lalohekwarahi badina idia laloa ma haida be idia dekenai do idia badu noho. Larisa ia gwau: “Lau hemarai momokani. Lau mamia egu tadikaka taihu edia lalona lau hahisia. Unai hemami be nega daudau lalonai ia noho.” Namona be oi diba elda taudia bona lo tadikaka taihu idia ura bada oi idia durua, emu hetura karana Iehova ida oi hanamoa lou totona. (Maua itaia: “Elda Taudia be Dahaka Do Idia Karaia?”) Oi giroa lou dainai idia moale bona idia ura oi danu do oi moale!—Aon. 17:17.

Tadikaka taihu oi tura henia namonamo totona, dahaka oi karaia? Hanaihanai hebou oi lao bona haroro gaukara ai idia oi bamoa. Edena dala ai unai ese oi do ia durua? Felix ia gwau: “Tadikaka taihu be lau giroa lou totona idia naria noho bona lau idia welkam henia. Lau mamia idia ese lau idia abia dae, Iehova ese egu kara dika ia gwauatao bona ia lau hesiai henia diba.”—Maua itaia: “Dahaka Oi Karaia Diba?”

OI HESIKU LASI!

Iehova ida emu hetura karana oi hanamoa lou lalonai, Satani be hekwakwanai idauidau do ia havaraia noho oi ia hamanokaia totona. (Luka 4:13) Hari be nega namona Iehova ida emu hetura karana oi hagoadaia totona.

Iehova be ena mamoe ia laloa bada, bona ia gwauhamata: “Ia boio mamoe do lau tahua, ia raka oho mamoe do lau abia mai, bero ia davaria mamoe do lau kumia, bona ia manoka mamoe do lau hagoadaia.” (Ese. 34:16) Iehova ese momo ia durua edia hetura karana ia ida idia hanamoa lou totona. Namona be oi diba, Iehova ia ura oi ia durua emu hetura karana ia ida oi hagoadaia noho totona.

Elda Taudia be Dahaka Do Idia Karaia?

Elda taudia be dala idauidau ai, ia giroa lou pablisa idia durua ena hetura karana Iehova ida ia hanamoa lou totona. Idia karaia diba gaudia haida be inai:

Idia umui hagoadaia. Aposetolo Paulo ia diba ia helalo-kerehai tauna be “lalohisihisi ese do ia hadikaia ore.” (2 Kor. 2:7) Nega momo do ia hemarai bona lalomanoka. Paulo ese kongrigeisen ia sisiba henia, ia gwau: “Mai hebogahisi ida ia umui gwauatao bona umui hagoadaia be namo.” Namona be idia giroa lou taudia idia diba Iehova bona tadikaka taihu ese idia lalokau henia bada. Bona elda taudia be hanaihanai idia dekenai hanamoa herevadia idia gwauraia bona idia durudia neganai, do idia goada.

Idia ida umui guriguri. “Kara maoromaoro tauna ena noinoi be mai ena siahu.” (Iam. 5:16) Matamanai ita herevalaia taihu, Larisa, ia gwau: “Elda taudia dekenai egu daradara bona gari gaudia lau gwauraia. Idia be lau ida idia guriguri, bona lau totona idia guriguri danu. Bena lau laloparara elda taudia be lau dekenai idia badu lasi. Idia ura lau idia durua egu hetura karana Iehova ida lau hanamoa lou totona.” Tadikaka Theo ia gwau: “Elda taudia edia guriguri karana ese lau ia hagoadaia bona lau laloparara Iehova ese lau ia lalokau henia bada, bona egu kara namodia ia itaia, to kara dikadia lasi.”

Edia turana ai umui lao. Kongrigeisen ai idia giroa lou taudia idia ura edia turana ai oi lao. Elda ta ladana Justin, ia gwau: “Dala oi tahua idia ida umui haroro hebou bona namona be edia ruma ai idia umui vadivadi henia. Edia turana ai umui lao be mai anina bada!” Elda ta ladana Henry, ia gwau: “Bema kongrigeisen taudia idia itaia elda taudia ese idia giroa lou taudia idia tura henia, idia danu be unai bamona do idia karaia.”

Umui durudia idia stadi totona. Lo turana ta ese ia vareai lou tauna ia durua diba sibona ena stadi sediual namona ia karaia totona. Elda ta ladana Darko, ia gwau: “Idia dekenai sibona egu stadi ai lau davaria point namodia lau herevalaia bona lau ura idia itaia Baibel stadilaia karana lau moalelaia bada. Danu dala lau karaia idia ida atikol namodia haida ai stadilaia totona.” Elda ma ta ladana Clayton, ia gwau: “Idia giroa lou taudia lau durua Baibel ai sivarai ta idia tahua, edia mauri ai ia vara gauna hegeregerena, bona unai ese idia dekenai gau haida do ia hadibaia.”

Umui naridia namonamo. Idia giroa lou taudia be idia itaia vadaeni elda taudia be diadi gaukara idia karaia. To hari, namona be mamoe naria taudia bamona do idia itaia. (Ier. 23:4) Namona be nega momo idia ida umui herevahereva. Bona edia hereva umui kamonai namonamo bona umui hanamodia. Elda ladana Marcus be mamoe vadivadi ia karaia dalana ia herevalaia neganai, ia gwau: “Idia ida Baibel siri ta ai herevalaia bona ai hanamodia. Idia ai hamaoroa idia gaukara goada idia giroa lou dainai ai moale bona Iehova ia moale danu. Emai vadivadi dokonai, do ai vadivadi lou dinana ai gwauraia.”

a Ladana haida ai haidaua.