Matamata Taudia E, Bapatiso Murinai Lo Taudia ai Umui Lao

1. Matamata taudia momo ese dahaka gau namodia idia hagugurua vadaeni?

LAGANI ta ta ai, matamata taudia tausen momo be bapatiso idia abia. Oi danu oi bapatiso, a? Bema oibe, emu kongrigeisen ai tadikaka taihu idia moale, bona Iehova ia moale danu! (Aon. 27:11) Nega sisina lalonai oi hagugurua vadaeni gau namodia mani oi laloa. Hegeregere, lagani haida lalonai Baibel oi stadilaia goadagoada. Emu stadi karana amo oi abia dae momokani Baibel be Dirava ena Hereva. Bona mai anina bada gauna be, Baibel ia torea Tauna oi diba bona lalokau henia. Iehova dekenai emu lalokau ia goada dainai, oi ura Ia oi hesiai henia bona bapatiso oi abia. Oi be abia hidi namona oi karaia!

2. Inai atikol ai dahaka do ita herevalaia?

² Oi do bapatiso lasi neganai, emu abidadama idia tohoa gaudia momo oi davaria dainai, ia auka Iehova oi badinaia noho totona. To emu mauri lagani ia bada ia lao noho lalonai, hahetoho ma haida do oi davaria. Satani be dala do ia tahua emu lalokau Iehova dekenai ia hamanokaia bona emu hesiai gaukara do oi hadokoa. (Efe. 4:14) Oi dekenai unai ia vara lasi be namo. Dahaka ese oi do ia durua Iehova oi badinaia noho bona oi karaia gwauhamata oi hagugurua totona? Namona be oi “hekwarahi noho” lo tauna ai oi lao totona. (Heb. 6:1) To, edena dala ai unai oi karaia diba? Inai atikol ai unai gaudia do ita herevalaia.

LO TAUNA AI OI LAO DALANA

3. Keristani taudia idia bapatiso murinai, dahaka idia karaia be namo?

³ Bapatiso murinai, aposetolo Paulo ese Efeso Keristani taudia dekenai ia henia sisiba ita badinaia be namo. Ia ese idia ia hagoadaia ‘lo taudia’ ai idia lao totona. (Efe. 4:13; ftn.) Anina be idia gaukara goada noho be gau badana. Paulo ese lo tauna ai ita lao karana be natuna ena tubu dalana ida ia hahegeregerea. Ia vara matamata beibi be ena tama sina ese idia lalokau henia bona ia dainai idia moale. To ia be beibi maragina bamona do ia noho hanaihanai lasi. Nega ia hanaia lalonai, do ia tubu daekau bona “maragina ena kara” ia rakatania. (1 Kor. 13:11) Keristani taudia danu be unai bamona. Bapatiso murinai, ita gaukara goada noho lo taudia ai ita lao totona. Unai bamona ita karaia totona, heduru daladia haida mani ita herevalaia.

4. Edena kara ese oi ia durua lo Keristani tauna ai oi lao totona? Herevalaia. (Filipi 1:9)

⁴ Iehova oi lalokau henia noho. Oi ese Iehova dekenai emu lalokau oi habadaia vadaeni. To unai lalokau oi hagoadaia noho. Edena dala ai? Filipi 1:9 ai aposetolo Paulo ese dala ta ia herevalaia. (Duahia.) Paulo ia guriguri Filipi taudia edia lalokau “ia bada ia lao noho” totona. Unai dainai Iehova ita lalokau henia noho be namo. Edena dala ai unai bamona ita karaia? Unai ita karaia totona, “diba maoromaoro bona laloparara bada” ita abia noho be namo. Iehova ita dibaia noho lalonai, iseda lalokau ia dekenai do ia bada bona iena kara namodia ita laloa bada. Ita ura bada Ia ita hamoalea dainai, ita ura lasi ena lalona ita hahisia. Bona ita gaukara goada Iehova ena ura ita dibaia bona ita badinaia dalana ita lalopararalaia totona.

5-6. Edena dala ai, Iehova ita lalokau henia noho? Herevalaia.

⁵ Iesu be ena tamana ena kara ia hahedinaraia goevagoeva. Unai dainai, ia ita diba namonamo neganai, Iehova do ita lalokau henia bada. (Heb. 1:3) Evanelia bukadia 4 ita stadilaia karana amo Iesu do ita diba namonamo. Bema dina ta ta ai Baibel oi duahia lasi, hari be nega namona unai oi karaia totona. Bona Iesu ena sivarai oi duahia lalonai, ena kara namodia oi laloa dobu. Taunimanima idia ura ia kahirakahira idia noho bona idia hereva henia. Bona mai lalokau ida natu maragidia ia kara henia. (Mar. 10:13-16) Iesu be tura namona bona ia kara auka lasi, bona ena hahediba taudia idia gari lasi ia dekenai edia hemami idia gwauraia totona. (Mat. 16:22) Unai dala amo, Iesu be ena guba Tamana ia tohotohoa. Iehova be tura namona ta bamona ita hereva henia danu. Guriguri amo Ia ita hereva henia diba. Ita guriguri neganai, iseda lalona ai idia noho gaudia ibounai ita gwauraia. Ita diba momokani Ia ese ita do ia gwau henia lasi. Ia be ita ia lalokau henia bona laloa bada.​—1 Pet. 5:7.

⁶ Iesu be taunimanima ia hebogahisi henia. Aposetolo Mataio ia gwau: “Hutuma ia itaia neganai, ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Bona Iehova ena hemami be edena bamona? Iesu ia gwau: “Egu Tamana guba dekenai ia noho be ia ura lasi inai ladana maragi tauna ta ia boio.” (Mat. 18:14) Unai hereva ese ita ia hagoadaia bada! Iesu ita diba namonamo neganai, Iehova ita lalokau henia noho.

7. Lo taudia oi diba namonamo neganai, edena dala ai oi do ia durua?

⁷ Nega oi atoa kongrigeisen ai lo taudia oi diba namonamo neganai, unai ese oi ia durua Iehova oi lalokau henia bada bona lo tauna ai oi lao diba. Idia moale noho dalana oi itaia. Bona Iehova hesiai henia totona idia karaia disisen dainai idia lalohisihisi lasi. Idia oi nanadaia edia hesiai gaukara lalonai idia davaria ekspiriens haida idia gwauraia totona. Oi ura mai anina bada disisen oi karaia neganai, idia dekenai heduru oi tahua. Namona be oi laloatao, “sisiba taudia be momo neganai, taunimanima idia kwalimu diba.”​—Aon. 11:14.

8. Bema Baibel ena hereva dekenai oi daradara, dahaka oi karaia be namo?

⁸ Oi daradaralaia gaudia oi hanaia diba. Paragraf 2 ai ita herevalaia bamona, Satani do ia gaukara goada emu abidadama bona Iehova kahirakahira oi lao karana ia hadikaia totona. Satani ese unai ia karaia dalana ta be, Baibel ai oi dibaia gaudia dekenai daradara ia havaraia diba. Hegeregere, haida idia ura do oi abia dae Dirava ese ita ia havaraia lasi, to ita be evolusen amo ita vara. Oi maragi neganai reana unai bamona oi laloa lasi, to hari oi bada neganai sikuli dekenai unai oi dibaia. Reana do oi laloa emu tisa ese evolusen ia herevalaia dalana be maoro. To, reana hamomokania gaudia idia tahua lasi, Havaraia Tauna ia noho idia diba totona. Aonega Herevadia 18:17 dekenai inai hakaua herevana ita laloatao, ia gwau: “Toana be kota ai ia hereva tauna ginigunana ena hereva be maoro, ela bona ma ta ia mai bona ena hereva ia tahua namonamo.” Namo lasi sikuli dekenai oi dibaia gaudia ibounai oi abia dae, to namona be Baibel ena hereva momokanidia oi stadilaia namonamo. Iseda pablikeisen dekenai tahua gaukara oi karaia. Guna evolusen herevana idia abia dae tadikaka taihu oi hereva henia. Idia oi nanadaia dahaka dainai idia abia dae ita ia lalokau henia Havaraia Tauna ia noho. Unai bamona herevahereva karana ese oi ia durua, Havaraia Tauna ia noho ena hamomokania gaudia oi tahua totona.

9. Melisa ena ekspiriens amo dahaka oi dibaia?

⁹ Taihu ta ladana Melisa be havaraia gaudia totona tahua gaukara ia karaia, bona unai ese ia durua bada.b Ia gwau: “Sikuli ai, tisa ese evolusen idia herevalaia dalana dainai do oi laloa unai be momokani. Matamanai, lau ura lasi tahua gaukara lau karaia, badina lau laloa bema unai lau karaia do lau davaria evolusen lalohadaina be momokani. To lau laloparara Iehova ia ura badina maorodia dainai Ia ita hesiai henia be namo. Unai dainai tahua gaukara lau karaia matamaia. Lau ese inai buka, Is There a Creator Who Cares About You? bona buklet rua, Was Life Created? bona The Origin of Life​—Five Questions Worth Asking lau duahia. Unai ese lau ia durua bada. Lau laloa bema matamanai unai lau karaia be namo.”   

10-11. Dahaka ese oi ia durua lalohadai dikadia oi dadaraia totona? (1 Tesalonika 4:3, 4)

¹⁰ Kara dika dadaraia. Oi matamata neganai, mahuta hebou urana be ia goada, bona reana haida ese oi idia doria matabodaga karadia oi karaia totona. Satani ia ura unai bamona oi karaia. Dahaka ese oi ia durua unai hahetoho oi dadaraia totona? (1 Tesalonika 4:3, 4 duahia.) Iehova oi guriguri henia neganai, emu hemami oi gwauraia, bona oi noia oi ia hagoadaia totona. (Mat. 6:13) Laloatao Iehova ia ura oi ia durua, to oi do ia gwau henia lasi. (Sal. 103:13, 14) Danu Baibel amo heduru oi abia diba. Matamanai ita herevalaia taihu, Melisa, be ia hekwarahi lalohadai dikadia ia dadaraia totona. Ia gwau: “Nega ibounai Baibel duahia karana ese lau ia durua ura dikadia lau dadaraia noho totona. Danu Baibel lau duahia neganai, lau ia hadibaia lau be Iehova ena bona lau ura ia lau hesiai henia.”​—Sal. 119:9.

¹¹ Namo lasi oi davaria hekwakwanai be sibona ese oi hamaoromaoroa. Emu tama sina dekenai unai oi herevalaia be namo. Oibe, ma haida dekenai iseda hekwakwanai ita herevalaia be auka, to unai ita karaia be mai anina bada. Melisa ia gwau: “Lalogoada abia totona lau guriguri, bena egu tamana dekenai egu hekwakwanai lau herevalaia. Unai murinai, egu hemami ia namo. Lau diba Iehova be lau dekenai ia moale bada.”

12. Edena dala ai disisen namodia oi karaia diba?

¹² Baibel ena hereva ese ita ia hakaua. Oi tubu daekau noho lalonai, oi sibona ese disisen do oi karaia. To gau momo oi do diba lasi. Iehova ida emu hetura karana oi hadikaia lasi totona, dahaka oi karaia diba? (Aon. 22:3) Taihu ta ladana Kari ese disisen namodia ia karaia dalana ia herevalaia. Ia laloparara lo Keristani tauna ese ena mauri ai do ia karaia gaudia ibounai dekenai taravatu momo ia atoa be anina lasi. Kari ia gwau: “Baibel ena taravatu lau badinaia sibona lasi, to ena hakaua herevadia lau lalopararalaia be namo.” Baibel oi duahia neganai, sibona oi nanadaia: ‘Lau duahia sivaraina dekenai Iehova ena lalohadai be dahaka? Unai sivarai lalonai idia noho hakaua herevadia ese lau ia durua kara maorona lau karaia totona, a? Bema oibe, unai hakaua herevadia lau badinaia neganai, dahaka namo do lau davaria?’ (Sal. 19:7; Isa. 48:17, 18) Baibel oi duahia bona laloa dobu neganai, do ia auka lasi Iehova ia hamoalea disisen oi karaia totona. Oi gaukara goada lo tauna ai oi lao noho lalonai, Iehova ena laloa dalana oi lalopararalaia dainai, do oi itaia gau ibounai dekenai taravatu ta ta oi badinaia be anina lasi.

13. Edena dala ai tura namodia ese oi do idia durua? (Aonega Herevadia 13:20)

¹³ Iehova idia lalokau henia taudia oi tura henia. Matamanai ita herevalaia bamona, oi abia hidi tura namodia ese oi idia durua lo tauna ai oi lao totona. (Aonega Herevadia 13:20 duahia.) Taihu ta ladana Sara be ia abia moalena ia haboioa. Bena ia vara gauna ese ia durua ia moale lou totona. Sara ia gwau: “Nega maorona ai tura namodia lau davaria. Lau bona taihu matamata ta be wiki ta ta ai Gima Kohorona ai stadilaia. Egu turana ma ta be lau ia durua hebou dekenai lau haere matamaia totona. Egu turadia edia heduru dainai, sibona egu stadi bona guriguri karana lau laloa bada matamaia. Iehova ida egu hetura karana lau hagoadaia matamaia, bona lau haboioa moalena lau abia lou.”

14. Edena dala ai John be tura namodia ia davaria?

¹⁴ Edena dala ai, oi idia durua diba tura namodia oi davaria? Elda ta ladana John ia gwau: “Lau matamata neganai, ai haroro hebou taudia be egu tura namodia ai idia lao diba. Idia be hesiai gaukara idia goadalaia, bona lau idia durua haroro gaukara lau moalelaia totona. Lau ese ful-taim hesiai gaukara be tahua gauna ai lau halaoa. Danu lau laloparara lau be mauri lagani tamona taudia sibona lau bamoa dainai, tura namodia momo lau davaria lasi. Gabeai, Betele dekenai tura namodia lau davaria danu. Edia haheitalai ese lau ia durua moale karadia lau abia hidi namonamo, bona unai ese egu hetura karana Iehova ida ia hagoadaia.”

15. Timoteo ena hebamo karana ia naria namonamo totona, Paulo be dahaka ia gwau? (2 Timoteo 2:20-22)

¹⁵ Bema oi laloparara, kongrigeisen ai oi bamoa tauna ese emu hetura karana Iehova ida ia hadikaia diba, dahaka do oi karaia? Paulo ia diba Keristani taudia ginigunadia edia nega ai, kongrigeisen lalonai haida edia lalohadai bona kara be Keristani taudia bamona lasi, unai dainai Timoteo ia hamaoroa idia amo ia raka siri totona. (2 Timoteo 2:20-22 duahia.) Iehova ida iseda hetura karana be mai anina bada. Ita gaukara goada iseda hetura karana eda guba Tamana ida ita hagoadaia, unai dainai namo lasi ita bamoa taudia ese unai hetura karana idia hadikaia.​—Sal. 26:4.   

LO TAUNA AI OI LAO TOTONA TAHUA GAUDIA ATOA

16. Edena tahua gaudia oi abia hidi be namo?

¹⁶ Mai anina bada tahua gaudia atoa. Emu abidadama do ia hagoadaia bona oi ia durua tahua gaudia oi abia hidi. (Efe. 3:16) Hegeregere, oi hekwarahi sibona emu stadi bona Baibel duahiduahi karana oi hanamoa totona. (Sal. 1:2, 3) Eiava nega ibounai oi guriguri bona mai kudouna ibounai ida unai oi karaia. Reana moale karadia oi abia hidi karana bona emu nega oi gaukaralaia dalana dekenai oi naria namonamo. (Efe. 5:15, 16) Iehova ia itaia oi gaukara goada noho lo tauna ai oi lao neganai, do ia moale.

17. Ma haida oi durua neganai, dahaka namo do oi davaria?

¹⁷ Ma haida oi durua neganai, lo tauna ai do oi lao. Iesu ia gwau: “Henia kara ena moale be bada, to abia kara ena moale be maragi.” (Kara 20:35) Emu nega bona goada oi gaukaralaia ma haida oi durua neganai, namo bada do oi davaria. Hegeregere, tahua gauna oi atoa emu kongrigeisen ai buruka bona gorere taudia oi durua totona. Reana sitoa dekenai edia ura gaudia oi hoia eiava idia dekenai fon gaukaralaia dalana oi hadibaia. Bema oi be tadikaka, tahua gauna oi atoa hesiai tauna ai oi lao, unai amo emu tadikaka taihu oi durua noho. (Fili. 2:4) Ma haida dekenai Basileia ena sivarai namona oi harorolaia karana amo lalokau oi hahedinaraia danu. (Mat. 9:36, 37) Bema hegeregere, tahua gauna oi atoa ful-taim hesiai gaukara oi karaia totona.

18. Edena dala ai, ful-taim hesiai gaukara ese oi ia durua Iehova kahirakahira oi lao totona?

¹⁸ Ful-taim hesiai gaukara ese dala momo ia kehoa Iehova kahirakahira oi lao totona. Bema oi be regula painia ta, reana unai ese dala do ia kehoa Basileia Evanelia Sikuli dekenai oi lao totona. Reana Betele eiava konstraksen gaukara oi karaia danu. Painia taihu matamata ladana Kaitlyn ia gwau: “Lau bapatiso murinai, haroro gaukara dekenai lo taudia lau bamoa karana ese lau ia durua Iehova kahirakahira lau noho totona. Bona edia haheitalai ese lau ia hagoadaia, Baibel dekenai egu diba lau habadaia bona egu hadibaia dalana lau hanamoa totona.”

19. Lo tauna ai oi lao totona oi gaukara goada neganai, dahaka hahenamo do oi davaria?

¹⁹ Bema lo tauna ai oi lao totona oi gaukara goada, hahenamo momo do oi moalelaia. Anina lasi gaudia dekenai emu nega bona goada do oi haorea kava lasi. (1 Ioa. 2:17) Disisen kereredia dainai idia vara hisihisi do oi mamia lasi. To, oi karaia gaudia ibounai dekenai do oi kwalimu bona moale. (Aon. 16:3) Emu haheitalai namona ese tadikaka bona taihu do ia hagoadaia. (1 Tim. 4:12) Bona mai anina bada gauna be, Iehova oi hamoalea bona oi tura henia namonamo dainai, maino ai do oi noho bona do oi moale.​—Aon. 23:15, 16.