Oi Hegaegae ‘Tanobada Do Oi Abia’ Totona, A?

ITA IBOUNAI be Iesu ena gwauhamata do ia guguru negana ita naria noho: “Manau taudia be idia moale, badina idia ese tanobada do idia abia.” (Mat. 5:5) Horoa taudia be guba ai Iesu ida idia lohia neganai, tanobada do idia abia. (Apok. 5:10; 20:6) Hari Keristani momokani taudia edia helaro be tanobada ai do idia noho ela bona hanaihanai. Do idia goevadae, moale bona maino ai do idia noho. Unai idia moalelaia totona, gaukara haida do idia karaia. Hegeregere, tanobada be paradaiso ai do idia halaoa, toreisi lou taudia edia dabu gaudia do idia henia, bona do idia hadibadia. Danu, hari edena dala ai oi hahedinaraia diba oi ura Paradaiso ai unai gaukara oi karaia?

OI HEGAEGAE TANOBADA BE PARADAISO AI DO OI HALAOA

Iehova ese taunimanima ia hagania ‘tanobada do idia hahonua bona idia biagua’ neganai, ia ura tanobada ibounai be paradaiso ai do idia halaoa. (Gen. 1:28) Tanobada do idia abia taudia ese unai oda herevana do idia badinaia. Eden umana be ia boio dainai, tanobada be paradaiso lasi. To Aramagedono murinai, gaukara badana do ita karaia idia hadikaia gabudia ita hagoevaia totona!

Unai ita duahia neganai, Israela taudia be Babulonia amo idia giroa lou bona idia karaia gaukarana ita laloa. Edia tano be lagani 70 lalonai tau ta ese ia noholaia lasi. To Isaia ia peroveta Iehova ena heduru amo edia tano be gabu hairaina ai do idia halaoa. Ia gwau: “Ena tano kaukaudia be Eden umana bamona do ia halaoa bona tano kaukau palaka gabudia be Iehova ena uma gabu ai do ia halaoa.” (Isa. 51:3) Oibe, edia tano be gabu hairaina ai idia halaoa. Unai hegeregerena, tanobada do idia abia taudia ese Iehova ena heduru amo tanobada be gabu hairaina ai do idia halaoa. Hari, oi hahedinaraia diba oi ura unai gaukara oi durua.

Dala ta be emu ruma lalona bona murimurina oi hagoevaia bona hanamoa. Unai oi karaia diba ena be emu dekena taudia be edia gabu idia hagoevaia lasi. Danu, Kingdom Hall bona Assembly Hall hagoevaia bona hanamoa gaukara oi durua diba. Bema oi dekenai ia hegeregere, aplikeisen oi atoa diba disasta negadia ai ma haida oi durua totona. Unai amo oi hahedinaraia oi be oi hegaegae tadikaka taihu oi durua totona. Sibona oi nanadaia, ‘Gaukara karaia daladia haida lau diba be namo, unai amo tanobada lau abia neganai gaukara idauidau lau karaia diba, a?’

Tadikaka taihu haida be Kingdom Hall idia hagoevaia bona hanamoa.

OI HEGAEGAE TOREISI LOU TAUDIA DO OI DURUA

Iesu ese Iairo ena natuna kekeni ia hatorea isi lou neganai, maoromaoro ia hamaorodia kekeni dekenai gau ta idia henia ia ania totona. (Mar. 5:42, 43) Unai mauri lagani 12 kekenina dekenai aniani idia henia be gaukara aukana lasi. To, Iesu ena gwauhamata “gara gabudia ai idia noho taudia ibounai ese ena gadona do idia kamonai bona do idia raka-lasi” ia guguru negana mani oi laloa. (Ioa. 5:28, 29) Ena be Baibel ese gau momo ia hahedinaraia lasi, to ita diba toreisi lou taudia be aniani, ruma bona dabua do idia ura. Hari oi hahedinaraia diba oi hegaegae ma haida oi durua totona, a? Mani inai henanadai haida oi laloa.

Hari edena dala ai do oi hahedinaraia oi hegaegae tanobada oi abia totona?

Tadikaka bona taihu haida be mai moale ida intanesinol hebouhebou ena delegate taudia idia welkam henia.

Sekit naria tauna be emu kongrigeisen ia vadivadi neganai, emu ruma ai ia aniani totona oi boiria, a? Bema ful-taim hesiai taudia be Betele idia rakatania bona emu kongrigeisen dekenai idia mai, o sekit ovasia be ena asainmen ia rakatania, oi durudia diba edia noho gabuna oi tahua totona, a? Bema emu gabu ai riginol o spesol hebouhebou ta idia karaia, hebouhebou ia do matamaia lasi eiava murinai gaukara totona oi volantia diba, eiava hebouhebou idia mai taudia oi welkam henidia totona, a?

OI HEGAEGAE TOREISI LOU TAUDIA OI HADIBAIA TOTONA, A?

Kara 24:15 ena hereva hegeregerena, ita diba taunimanima bilioni momo do idia toreisi lou. Idia momo be guna dala lasi Iehova idia dibaia totona. To, idia toreisi lou murinai unai idia karaia diba.a Dirava ena abidadama hesiai taudia be unai hadibaia gaukara do idia karaia. (Isa. 11:9) Charlotte, be Europe, South America, bona Africa ai ia haroro bona ia be mai moale ida vaira nega ai do ia haroro negana ia naria noho. Mai moale ida ia gwau: “Lau be toreisi lou taudia hadibaia negana lau naria noho. Guna idia noho taudia edia sivarai lau duahia neganai, nega momo lau laloa: ‘Bema inai tauna be Iehova ia diba, iena mauri do namo herea.’ Lau ura toreisi lou taudia dekenai Iehova ena kara lau hadibaia bona lau hamaorodia bema Iehova idia tomadiho henia edia mauri be do ia namo herea.”

Iesu be tanobada ai ia do mai lasi neganai, guna Iehova idia hesiai henia abidadama taudia dekenai gau momo do idia dibaia danu. Mani oi laloa Daniela be ia torea peroveta herevadia edia guguru dalana ia diba lasi, so mai moale ida ia do ita hadibaia. (Dan. 12:8) Eiava Ruta bona Naomi ita hadibadia Mesia be edia bese amo ia vara. Unai nega ai, mai moale ida tanobada hegegemadai hadibaia gaukarana do ita karaia, badina inai tanobada dikana ena hekwakwanai bona lalona veria gaudia be lasi!

Laundry gabuna dekenai taihu ta ese hahine ta dekenai pepapepa ta ia hariharilaia.

Hari edena dala ai oi hahedinaraia oi ura unai hadibaia gaukara do oi durua? Dala ta be oi gaukara goada emu haroro dalana oi hanamoa totona bona hanaihanai tanobada hegegemadai idia karaia haroro gaukara oi durua. (Mat. 24:14) Ena be oi buruka o gau haida dainai oi haroro lasi, to oi karaia gaudia ese do idia hahedinaraia oi hegaegae noho toreisi lou taudia oi hadibaia totona.

Oibe, henanadai badana be, mai ura ida tanobada do oi abia negana oi naria noho, a? Oi be mai moale ida tanobada be gabu hairaina ai do oi halaoa, toreisi lou taudia do oi durua bona hadibaia negana oi naria noho, a? Hari gau idauidau oi karaia diba unai amo oi hahedinaraia oi hegaegae noho tanobada ai oi noho hanaihanai neganai, unai bamona do oi karaia!

a September 2022 ena Gima Kohorona “Kara Maoromaoro Dalana ai Momo Idia Hakaua Mai” itaia.