Tanobada Hegegemadai Mentol Helt Gorerena Ia Bada Noho
“Ena be sibona daiutu ai lau noho, to hanaihanai lalohekwarahi haida lau mamia.”
“Lau mamia egu hemami ia namo momokani, to gabeai lau laloa momo. Lau diba ena be lau moale bada, to daudau lasi sibona dekenai lau hebogahisi.”
“Dina ta ta ai lau karaia diba gaudia sibona lau ura laloa, to nega haida gau ma haida dainai lau lalohekwarahi.”
Unai hereva idia gwauraia taudia be laloa momo gorerena idia abia. Oi eiava emu lalokau tauna ta be unai bamona umui mamia danu, a?
Namona be oi diba, oi be sibona lasi. Hari, laloa momo gorerena be taunimanima momo dekenai ia vara noho.
Momokani, ita be “nega aukadia do idia vara” negana lalonai ita noho dainai, metau momo idia vara noho. (2 Timoteo 3:1) Tahua gaukarana ta amo idia davaria, tanobada hegegemadai taunimanima 8 amo tamona be laloa momo gorerena ia abia. Lagani 2020 ai, COVID-19 gorerena dainai 26 pesen be laloa momo gorerena idia abia, bona taunimanima 28 pesen bamona be lalometau gorerena idia abia. Unai namba ese 2019 ena ia hanaia.
Gau badana be ita diba, hari inai negai taunimanima hida be lalohekwarahi bona lalometau gorerena idia abia. Danu, oi bona emu lalokau taudia emui hemami bona noho dalana lalopararalaia karana be mai anina bada.
Mentol helt ena anina be dahaka?
Mentol helt namona ese ita dekenai moale ia henia bona gaukara ita karaia namonamo diba. Dina ta ta ai idia vara hekwakwanai do ita haheaukalaia bona mauri ita moalelaia.
Laloa momo karana . . .
Be iseda manoka gaudia dainai ia vara LASI.
BE gorere ta, unai ese ta ena helt ia hadikaia, ena hemami bona ena kara ia biagua.
Unai dainai nega momo ia auka unai gorere ia abia tauna be haida ia tura henia totona, bona dina ta ta ena gaukara ia karaia namonamo lasi.
Unai gorere be mauri lagani, bese, iduhu, tomadiho, edukeisen idauidau, eiava ogogami bona taga taudia dekenai ia vara diba.
Lalohadai namona totona heduru abia
Bema oi eiava emu lalokau tauna dekenai inai gaudia idia vara. Hegeregere, oi mahuta namonamo lasi o aniani dalana ia idau, hanaihanai oi laloa momo, lalohekwarahi, eiava sibona dekenai oi hebogahisi, unai ena badina diba totona doketa ena heduru tahua be namo. To heduru totona edeseniai oi lao diba?
Mai ena aonega bada tauna, Iesu Keriso, ia gwau: “Gorere lasi taudia be doketa idia tahua lasi, to gorere taudia sibona ese idia tahua.” (Mataio 9:12) Gorere dainai idia hekwarahi noho taudia be medikol heduru bona muramura maorona idia abia neganai, unai ese edia gorere ia hamaragia bena ia durudia mauri idia moalelaia. Bema gorere ia bada eiava nega daudau ia noho vadaeni, aonega karana be medikol heduru abia haraga.a
Baibel be medikol bukana ta lasi, to ena hereva ese iseda mentol helt dekenai namo ia havaraia diba. Baibel ena hereva amo iseda laloa dalana durua karana do ita dibaia, inai atikol idauidau ese unai ia herevalaia.
a Gima Kohorona ese edena heduru do oi abia ia herevalaia lasi. To namona be ta ta ese sibona unai idia tahua namonamo bena disisen idia karaia.