Hedibagani Dadaraia Totona Ita Gima Noho

1-2. (a) Iesu ese ena hahediba taudia dekenai dahaka ia hadibaia? (b) Dahaka dainai hahediba taudia be Iesu idia rakatania? (Laulau itaia danu.)

“MOMOKANI, lalona be ia ura, to tauanina be ia manoka.” (Mat. 26:41b) Unai hereva amo Iesu ia hahedinaraia, ia laloparara ita be goevadae lasi bona kerere do ita karaia. To danu, ena hereva ese ita ia hadibaia, namona be ita laloa lasi ita be goada bona hanaihanai kara maorona do ita karaia. Iesu ese unai hereva ia do gwauraia lasi neganai, hora haida gunanai ena hahediba taudia idia gwauhamata ia do idia rakatania lasi. (Mat. 26:35) Idia ura kara maorona idia karaia. To, idia laloparara lasi hekwakwanai badana ta ia vara neganai, kara haraga kerere do idia karaia. Unai dainai, Iesu ese idia ia hadibaia: “Umui gima noho bona umui guriguri noho, unai amo hedibagani lalonai do umui moru lasi.”—Mat. 26:41a.

² To madi, hahediba taudia be idia gima lasi. Iesu idia dogoatao neganai, idia be ia ida idia noho eiava idia gari dainai idia heau boio, a? Hahediba taudia be idia gima lasi dainai, edia gwauhamata idia badinaia lasi bona Iesu idia rakatania.—Mat. 26:56.

3. (a) Iehova ita badinaia noho totona, dahaka dainai ita laloa lasi hanaihanai kara maorona do ita karaia? (b) Inai atikol ai dahaka do ita herevalaia?

³ Namo lasi ita laloa ita be hanaihanai ita goada bona kara maorona do ita karaia. Iseda lalona ita hadaia Iehova ese ia moalelaia lasi gauna ta do ita karaia lasi. To, ita be goevadae lasi dainai karaharaga hedibagani lalonai ita moru diba. (Roma 5:12; 7:21-23) Bema ita gima lasi, kerere do ita karaia. Iehova bona ena natuna ita badinaia noho totona namona be Iesu ena sisiba ita badinaia, unai amo hedibagani ita dadaraia totona ita gima noho diba. Inai atikol ese ita do ia durua unai ita karaia totona. Ginigunana be, dahaka gaudia dekenai ita gima noho, iharuana be, hedibagani ita dadaraia dalana, bona dokona, ita gima noho dalana do ita herevalaia.

EMU MANOKA GAUDIA DEKENAI OI GIMA NOHO

4-5. Dahaka dainai kerere maragidia ita karaia lasi be namo?

⁴ Nega haida kerere maragidia ita karaia, to unai ese Iehova ida iseda hetura karana ia hadikaia diba. Danu, ita ia hakaua diba kara dika badadia ita karaia totona.

⁵ Ita ibounai be hedibagani ita davaria neganai, kara dika ita karaia diba. To ita ta ta be mai iseda manoka gaudia, unai dainai gau haida ese ita idia tohoa diba kerere ita karaia totona. Hegeregere, ta be reana ia hekwarahi noho matabodaga karadia ia dadaraia totona. Ma ta be ia hekwarahi noho kara mirodia hegeregere, sibona ena tauanina gadaralaia karana eiava ponografi laulau itaia karana ia dadaraia totona. To danu, reana ma ta be taunimanima gari henia karana, sibona ena lalohadai badinaia karana, badu haraga karana eiava gau ma ta dadaraia totona ia hekwarahi noho. Unai dainai Iamesi ia gwau, “ta be sibona ena ura ese ia tohoa, unai ura ese ena lalona ia veria bona ia koia.”—Iam. 1:14.

6. Mai momokani ida dahaka ita karaia be namo?

⁶ Nega momo oi idia tohoa haraga gaudia oi diba, a? Namo lasi iseda manoka gaudia ita laloa maragi eiava ita laloa ita hegeregere, kara dika ta ita dadaraia totona. (1 Ioa. 1:8) Laloatao, Paulo ia gwau, bema “lo Keristani taudia” be idia naria namonamo lasi hedibagani lalonai do idia moru. (Gal. 6:1) Namona be mai momokani ida ita hahedinaraia ita be mai iseda manoka gaudia.—2 Kor. 13:5.

7. Dahaka gaudia totona ita gima noho be namo? Haheitalai gwauraia.

⁷ Nega momo ita idia tohoa haraga gaudia ita diba neganai, dahaka ita karaia be namo? Ita gaukara goada, unai hahetoho hanaia dalana ita hanamoa! Haheitalai ta be, Baibel negadiai siti ta ena magu ia goada lasi kahana be ena geiti. Unai dainai, gadi taudia momo be geiti idia gimaia. Unai hegeregerena, namona be iseda manoka gaudia ita diba bona unai gaudia totona ita gima noho.—1 Kor. 9:27

HEDIBAGANI BONA KARA DIKA ITA DADARAIA DALANA

8-9. Aonega Herevadia karoa 7 ese ia herevalaia mero matamata be, edena dala ai kara dika ia dadaraia diba? (Aonega Herevadia 7:8, 9, 13, 14, 21)

⁸ Edena dala ai hedibagani bona kara dika ita dadaraia diba? Mani Aonega Herevadia karoa 7 ese ia herevalaia mero matamata ena haheitalai ita herevalaia. Unai mero be matabodaga hahinena ida ia mahuta hebou. Siri 22 ia gwau unai mero matamata be unai hahine murinai ia lao “haraga.” To siri ginigunadia ese idia hahedinaraia, ia be abia hidi kereredia ia karaia dainai, unai ese metairametaira ia hakaua kara dika ia karaia totona.

⁹ Unai mero matamata be dahaka gaudia ia karaia dainai, kara dika ia karaia? Ginigunana be, adorahi ai, matabodaga hahinena “ena dala dekenai ia raka lao.” Bena, hahine ena ruma dekenai ia raka lao. (Aonega Herevadia 7:8, 9 duahia.) Gabeai, mero ese hahine ia itaia neganai, ia raka siri lasi. To, unai hahine ese ia kisi henia bona ia henia maino karaia boubouna ia herevalaia neganai, mero ia kamonai noho, reana unai amo do ia laloa ia be hahine namona. (Aonega Herevadia 7:13, 14, 21 duahia.) Bema mero matamata be abia hidi kereredia ia karaia lasi, hedibagani do ia dadaraia bona ia kara dika lasi.

10. Edena dala ai ta be unai mero matamata bamona kerere badana ia karaia?

¹⁰ Inai sivarai ese ia hahedinaraia, Iehova idia tomadiho henia taudia be hedibagani idia davaria bona kara dika idia karaia diba. Reana ta be kara dika badana ta ia karaia murinai, do ia mamia gau ibounai idia vara “haraga.” Eiava reana do ia gwau, “Lau laloa lasi unai do ia vara.” To bema ia vara gauna ia laloa namonamo, do ia laloparara ia be abia hidi kereredia ia karaia dainai, kara dika badana ia karaia. Reana ia be Iehova idia tura henia lasi taudia ia bamoa, moale kererena ia abia hidi, bona gabu eiava websait kereredia dekenai ia lao. Danu reana guriguri karana, Baibel duahiduahi, hebou lao henia karana, eiava haroro gaukara ia hadokoa. Aonega Herevadia bukana ese ia herevalaia mero matamata bamona, ia be kara dika ia karaia “haraga” lasi, to abia hidi kereredia ia karaia murinai, kara dika badana ia karaia.

11. Kara dika ita karaia lasi totona, dahaka ita karaia be namo?

¹¹ Dahaka ita dibaia? Kara dika ita dadaraia sibona lasi, to ita idia hakaua dala kereredia ita dadaraia be namo. Solomona ese mero matamata bona matabodaga hahinena dekenai ia vara gauna ia herevalaia murinai, inai sisiba ia henia. Hahine ia herevalaia neganai, ia gwau: “Namo lasi ena dala ai oi raka.” (Aon. 7:25) Ma ia gwau: “Unai bamona hahine amo oi noho daudau, iena ruma ena iduara kahirakahira oi lao lasi.” (Aon. 5:3, 8) Kara dika amo sibona ita gimaia totona, namona be ita do idia hakaua kerere daladia ita dadaraia.a Unai ena anina be, ena be Keristani taudia ese idia karaia gaudia haida be kerere lasi, to bema ita diba unai ese ita do ia tohoa, namona be ita karaia lasi.—Mat. 5:29, 30.

12. Iobu be dahaka abia hidi ia karaia, bona edena dala ai unai ese ia durua hedibagani ia dadaraia totona? (Iobu 31:1)

¹² Kara dika idia havaraia daladia ita dadaraia totona, namona be abia hidi maorodia ita karaia. Iobu be unai bamona ia karaia. Ia ese ‘ena matana ida gwauhamata ta ia karaia,’ ura dikadia ida hahine ma haida do ia raraia lasi. (Iobu 31:1 duahia.) Unai ia badinaia neganai, matabodaga karana ia dadaraia diba. Ita danu abia hidi maorodia ita karaia neganai, hedibagani ia havaraia gaudia do ita dadaraia.

13. Dahaka dainai iseda laloa dalana ita gimaia be namo? (Laulau itaia danu.)

¹³ Namona be iseda laloa dalana ita gimaia. (Eso. 20:17) Haida idia abia dae, lalohadai kereredia abia karana be kerere lasi, badina unai kara dika idia karaia lasi. To unai bamona lalohadai be kerere. Bema tau ta be lalohadai kereredia ia abia, do ia ura unai ia karaia. Unai bamona ia karaia neganai, do ia auka kerere ia dadaraia totona. Momokani, nega haida lalohadai kereredia do ita abia. Unai ia vara neganai, gau badana be karaharaga lalohadai kereredia ita dadaraia bona lalohadai namodia ita abia. Unai bamona ita karaia neganai, lalohadai dikadia ese ia havaraia ura dikadia do ita dadaraia bona unai ese ita do ia gimaia kara dika badana ta ita karaia lasi totona.—Fili. 4:8; Kol. 3:2; Iam. 1:13-15.

14. Dahaka gauna ma ta ese ita do ia durua hedibagani amo sibona ita gimaia totona?

¹⁴ Dahaka gauna ma ta ita karaia diba, hedibagani amo sibona ita gimaia totona? Namona be ita abia dae momokani, Iehova ena taravatu badinaia karana ese hanaihanai ita do ia durua. Nega haida do ia auka Iehova ena ura dalana ai iseda lalohadai bona hemami ita biagua totona, to bema ita gaukara goada bona unai ita karaia, do ita moale bada.

15. Edena dala ai lalohadai maorodia abia karana ese ita do ia durua, hedibagani ita dadaraia totona?

¹⁵ Namona be lalohadai maorodia ita abia. Bema ‘kara dika ita inai henia, bona kara namo ita ura henia,’ unai ese ita do ia hagoadaia, kara maorona ita karaia bona hedibagani ia havaraia gaudia do ita dadaraia. (Amo. 5:15) Danu lalohadai maorodia ita abia neganai, ena be hahetoho badadia ita davaria, to mai ura ida do ita dadaraia.

16. Edena dala ai Iehova tomadiho henia karadia ese ita do ia durua ita gima noho totona? (Laulau itaia danu.)

¹⁶ Edena dala ai lalohadai maorodia do ita abia? Namona be Iehova ena hesiai gaukara idauidau dekenai ita bisi. Keristani heboudia eiava haroro gaukara totona ita lao neganai, do ita ura Iehova ita hamoalea bona hedibagani do ita dadaraia. (Mat. 28:19, 20; Heb. 10:24, 25) Dirava ena Hereva ita duahia, stadilaia, bona laloa dobu neganai, ita do ia hagoadaia kara maorona ita ura henia bona kara dika ita inai henia totona. (Ios. 1:8; Sal. 1:2, 3; 119:97, 101) Laloatao, Iesu ese ena hahediba taudia ia hamaoroa: “Umui guriguri noho, unai amo hedibagani lalonai do umui moru lasi.” (Mat. 26:41) Iseda guba Tamana ita guriguri henia neganai, iena dala ita kehoa ita do ia durua bona iseda lalona ita hadaia ia ita hamoalea totona.—Iam. 4:8.

ITA GIMA NOHO

17. Petero dekenai edena manoka gauna ia vara loulou?

¹⁷ Iseda manoka gaudia haida ita rakatania momokani diba. To iseda manoka gaudia haida be nega daudau lalonai do ita hekwarahi ita hanaia totona. Mani aposetolo Petero ena haheitalai ita laloa. Ia be taunimanima dekenai ia gari dainai nega toi ia gwau Iesu ia diba lasi. (Mat. 26:69-75) Gabeai, Petero be Sanhedrin vairanai, mai gari lasi ida Iesu ia harorolaia neganai, ia hahedinaraia ena manoka gauna ia hanaia. (Kara 5:27-29) To lagani haida murinai, ia be “kopina utua taudia dekenai ia gari” dainai, Idau bese Keristani taudia ida aniani hebou karana ia hadokoa. (Gal. 2:11, 12) Momokani, Petero ena manoka gauna ia giroa lou. Reana ia be unai kara ia rakatania momokani lasi.

18. Lalohadai kereredia dainai dahaka ia vara diba?

¹⁸ Petero bamona nega haida ita dadaraia vadaeni manoka gaudia ita davaria lou bona ita hekwarahi unai ita hanaia totona. Hegeregere, tadikaka ta ia gwau: “Lau be lagani ten lalonai ponografi itaia karana lau rakatania bona lau laloa unai do lau karaia lou lasi. To nega haida, ponografi itaia urana lau abia lou.” Ita moale badina iseda tadikaka be ia hesiku lasi. Bona ia laloparara dina ta ta ai, iena manoka gauna ia hanaia totona ia gaukara goada be namo, bona toana be unai bamona do ia karaia noho ela bona inai tanobada dikana ia ore. Ena adavana bona kongrigeisen elda taudia edia heduru amo, ia gaukara goada noho ponografi itaia karana ia dadaraia totona.

19. Edena dala ai, ia vara loulou manoka gauna ita dadaraia diba?

¹⁹ Dahaka ita karaia diba ia vara loulou manoka gauna ese ita ia hakaua lasi, kerere ita karaia totona? Iesu ena sisiba ita badinaia, ia gwau: “Umui gima noho.” Ena be oi laloa emu abidadama ia goada noho, to namona be oi gaukara goada hedibagani do ia havaraia gaudia oi dadaraia totona. (1 Kor. 10:12) Oi idia durua emu manoka gaudia oi hanaia dalana oi badinaia noho. Aonega Herevadia 28:14 ia gwau: “Nega ibounai ena kara ia naria tauna be ia moale.”—2 Pet. 3:14.

ITA GIMA NOHO ENA NAMO

20-21. (a) Hedibagani dadaraia totona ita gima noho neganai, dahaka hahenamo do ita moalelaia? (b) Bema ita gaukara goada hedibagani ita dadaraia, Iehova be dahaka do ia karaia? (2 Korinto 4:7)

²⁰ Namona be ita abia dae hedibagani ita dadaraia totona, ita gima noho be namo. ‘Kara dika ena moale, be nega sisina do ia noho gauna’ to Iehova ena taravatu ita badinaia karana ese moale korikorina do ia havaraia. (Heb. 11:25; Sal. 19:8) Unai ena badina be Iehova ese ita ia karaia iena ura ita badinaia totona. (Gen. 1:27) Iehova ese ia moalelaia dalana ita badinaia neganai, iseda lalomamina do ia goeva bona mauri hanaihanai do ita abia.—1 Tim. 6:12; 2 Tim. 1:3; Iuda 20, 21.

²¹ Momokani, “tauanina be ia manoka.” To unai ese ia hahedinaraia lasi iseda manoka gaudia ita hanaia diba lasi. Iehova be ia noho hegaegae ita dekenai goada ia henia totona. (2 Korinto 4:7 duahia.) Laloatao, Dirava ese ia henia siahuna be taunimanima edia siahu ia hereaia. To namona be ita gaukara goada hedibagani ita dadaraia totona. Bema unai ita karaia, ita diba momokani Iehova be iseda guriguri do ia haerelaia bona goada do ia henia. (1 Kor. 10:13) Oibe, Iehova ena heduru amo, do ita gima noho bona hedibagani ita dadaraia diba.