Weda ia Senisi Karana Bona Iseda Vaira Nega—Baibel Ia Gwau

“Weda ena senisi karana ese disasta ia havaraia noho. Tanobada be mauri lasi gabuna ai ia lao vadaeni.”​—The Guardian.

Taunimanima be idia karaia gaudia dainai dika idia havaraia. Saiens taudia momo idia abia dae taunimanima ese idia karaia noho gaudia dainai tanobada ia siahu ia lao. Unai ese weda ia senisia bona idia vara disasta ese dika bada ia havaraia. Unai gaudia haida be hegeregere:

• Weda dikadia ese dina ena siahu ia habadaia, medu lasi bona lai gubana ese abata bona uda badadia dekenai lahi ia havaraia.

• Aisi badadia bona Arctic o North Pole kahanai aisi idia veve.

• Davara be ia bada daekau.

Weda ena senisi karana ese tanobada ena kahana ibounai dekenai dika ia havaraia. Tano 193 ai idia vara gaudia idia herevalaia murinai, New York Times ripoti ia gwau: “Tanobada be heduru totona ia noinoi noho.” Weda ena senisi karana ese mase bona hisihisi ia havaraia dainai, World Health Organization ia gwau unai be “dika badana taunimanima edia helt dekenai.”

To ita gwau diba ita be mai iseda helaro vaira nega totona. Hari ita itaia noho gaudia be Baibel ese ia perovetalaia vadaeni, to danu Dirava ese iseda vaira negana gimaia totona kara ta do ia karaia ena badina ia herevalaia.

Weda ia senisi karana ese Baibel ena peroveta herevana ia hagugurua, a?

Oibe. Tanobada ia siahu ia lao dainai weda ia senisi, bona dika idauidau ia havaraia, Baibel ese ia perovetalaia gaudia be iseda nega ai idia vara gaudia ida idia hegeregere.

Peroveta Hereva: “Dina gabedia ai nega aukadia do idia vara, unai ese taunimanima do idia hametaua bada. Badina taunimanima be sibona do idia laloa bada, moni do idia ura henia bada, . . . ma haida do idia badinaia lasi, . . . do idia lalotamona lasi, . . . edia turadia edia mauri hadikaia dalana do idia karaia, do idia kwara auka.”​—2 Timoteo 3:1-4.

Taunimanima edia kara ese weda senisia karana do ia havaraia, be Baibel ese ia herevalaia. Gavamani bona bisinesi taudia ese moni abia dalana idia laloa bada, bona gabeai do idia noho taudia edia namo idia laloa lasi. Ena be do idia ura gaukara hebou, to tanobada ia siahu ia lao karana koua totona do idia lalotamona lasi.

Inai peroveta herevana ese ia hahedinaraia namo lasi ita laloa taunimanima edia kara ese senisi do ia havaraia bona tanobada do ia gimaia. To, Baibel ia gwau taunimanima ese sibona laloa bada karana do idia hahedinaraia, bona “edia kara dika do idia habadaia momokani.”​—2 Timoteo 3:13.

Dirava ese kara ta do ia karaia ena badina ita diba

Baibel ia gwau Iehovaa Dirava, iseda Havaraia Tauna ese iseda planeti bona taunimanima ia lalodia bada. Dirava be kara ta do ia karaia be inai Baibel siri toi ese idia herevalaia.

1. 1. Dirava ese tanobada “Ia karaia kava lasi, to taunimanima ese idia noholaia totona ia karaia.”​—Isaia 45:18.

   Dirava ese iena ura tanobada totona do ia hagugurua. (Isaia 55:11) Do ia rakatania lasi taunimanima ese idia hadikaia totona eiava mauri lasi gabuna ai do ia lao lasi.

2. 2. “Manau taudia ese tanobada do idia abia, bona do idia moale bada, badina gabu ibounai dekenai maino do ia noho. Kara maoromaoro taudia be tanobada do idia abia, bona tanobada ai do idia noho ela bona hanaihanai.”​—Salamo 37:11, 29.

   Dirava ia gwauhamata taunimanima be tanobada ai do idia noho mai maino ida ela bona hanaihanai.

3. 3. “Dirava ese tanobada dekenai kara dika taudia do ia hadikaia ore.”​—Aonega Herevadia 2:22.

   Dirava ia gwauhamata kara dika idia karaia bona tanobada idia hadikaia taudia be do ia hadikaia ore.

Dirava ese iseda vaira nega totona do ia karaia gaudia

Edena dala ai Dirava ese iena gwauhamata tanobada totona do ia hagurugura? Ia ese iena gavamani, idia gwauraia Dirava ena Basileia, amo unai do ia karaia. (Mataio 6:10) Unai Basileia be guba amo do ia lohia. Ia be taunimanima edia gavamani ida do ia gaukara hebou lasi tanobada ena hekwakwanai bona hadikaia karadia haorea totona. Dirava ena Basileia ese taunimanima edia gavamani ibounai do ia hadikaia ore.​—Daniela 2:44.

Dirava ena Basileia be sivarai namona taunimanima bona tanobada ibounai totona. (Salamo 96:10-13) Iehova Dirava ese iena Basileia amo do ia karaia gaudia mani laloa.

• Tanobada ena gabu ibounai do ia hanamoa

  Baibel ia gwau: “Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.”​—Isaia 35:1.

  Unai ena anina be dahaka iseda vaira negana totona: Iehova ese planeti do ia hanamoa, taunimanima ese idia hadikaia gabudia danu.

• Weda do ia biagua

  Baibel ia gwau: “[Iehova] ese lai gubana ia hadokoa, davara ena hurehure ena regena ia ore.”​—Salamo 107:29.

  Unai ena anina be dahaka iseda vaira negana totona: Iehova be mai ena siahu weda ia biagua totona. Taunimanima be weda dikadia dainai hisihisi do idia davaria lou lasi.

• Dirava ese taunimanima dekenai tanobada naria dalana do ia hadibaia

  Baibel ia gwau: “Lau ese oi dekenai aonega do lau henia bona emu raka dalana be oi do lau hadibaia.”​—Salamo 32:8.

  Unai ena anina be dahaka iseda vaira negana totona: Iehova ese taunimanima dekenai gaukara ia henia tanobada idia naria totona. (Genese 1:28; 2:15) Ita dekenai iena havaraia gaudia naria dalana bona tanobada ai gabu hadikaia lasi karana do ia hadibaia.