Matthew

The Death of John the Baptist (Mr 6.14-29; Lk 9.7-9)

14 Noqw ephaqam Moṅwi Herod Jesus hihta hintsakqat navota; 2 Nihqe tumalʼaymuy amumi paṅqawu: Iʼ John kūyit akw tūtuvoylalawṅwuqa. Pas hapi pay pam hakton mokiwuy aṅqw ahoy tātayi; nihqe ōviy k̇ātatayhpit hintsaki. 3 Herod pi nȫmay Herodias unaṅwve hinhtiniqe, hakimuy ayataqw, puma John ṅuayaqe somyat, sivikimi panaya. Ura Herod tupkoy Philip nömanawhki. 4 Noqw John Herod aw paṅqawu: Soon as um uhtupkoy nömanawhkinik̇aṅwo. 5 Noqw pam as put nīnaniqey anhtik̇aṅw, piw sinmuy maqasti; puma put Tutuyqawhqat lavayʼayayatnihqat pan aw tāyuṅqw ōviyʼo. 6 Noqw Herod tihtiwhpuyat aw pituqw, pam nōviwhqat aw k̇aysiwhqamuy sinmuy tūtsama. Noqw pumuy nōnovaqw, Herodias tiat māna ep pákihqe, pumuy amuhpewi wunimaqw, Herod put aw nahyoṅwa. 7 Noqw ōviy pam pas öqalat pasiwniy akw put aw paṅqawhqe, pam nāp hihta ōviy tūviṅtaqw put máqaniqey aw paṅqawu. 8 Noqw pam yuy tutavoyatnihqe put aw paṅqawu: Um kūyit akw tūtuvoylalawhqat John qötöyat tsaqaptat ep íniwtaqat nuy máqani. 9 Noqw pas as Moṅwi qahahlayhtik̇aṅw, pay nuṅwu pas aw qaöwílvayhtiqe, nawus put máqaniqey paṅqawu, ispi k̇aysiwhqam sinom put amum yesqam lavayiyat nanaptaqʼö. 10 Nihqe hakiy ayataqw, pam sivikiminihqe, John qötöyat ayo tuku; 11 Nihqe put qötöyat tsaqaptat ep íniwtaqat kwusivaqe, mānat aw tavi; noqw pam put yuy aw yawma. 12 Noqw put aw nánatuwnayaqam ökihqe, tokoyat haqami amwisa; nit ahpiyyaqe, Jesus āawnaya.

Jesus Feeds the Five Thousand (Mr 6.30-44; Lk 9.10-17; Jn 6.1-14)

13 Noqw Jesus put navotqe, pay nāla pākihut akw haqamii, haqam pas qa hak waynumqat paṅsoo. Noqw sinom put nanaptaqe hāhaqaqw kitsókit aṅqw nāp put aṅkya. 14 Noqw Jesus paṅqw yámakqe, qaanʼewakw hintaqamuy sinmuy tuwa; nihqe pumuy ōkwatuwhqe, pumuy amuṅaqw tūtuyyaqamuy qalaptsina. 15 Noqw tapkiwmaqw, put aw nánatuwnayaqam put awyaqe aw paṅqaqwa: Yep qayēsiwhq, pas hapi hísatniqwti. Um as sinmuy hōnaqw, puma aṅqeʼ kitsókiva nankwuseʼ, nenṅem hihta tunöstuyʼyani. 16 Noqw pay Jesus pumuy amumi paṅqawu: Soon as puma ahpiyyani. Uma nopnayani. 17 Noqw puma put aw paṅqaqwa: Itam panis tsivot pölavikiʼyuṅwa, pu lȫqmuy pākiwhtuyu. 18 Noqw pam paṅqawu: Pew kiwisaa. 19 Pu sinom tūsaqat aṅ yesvaniqat pam amumi paṅqawu, nit pu pam tsivot pölavikit ömahtat, pu pākiwhtuy kwusut, pu ōmiq tayk̇aṅw, put ep God aw hahlayhti; nit yōṅoytat, put aw nánatuwnayaqamuy amumi put oya; noqw puma sinmuy amuhpaʼ oʼya. 20 Noqw puma sohsoyam nȫnösaqe ȫöya; noqw puma akwsiṅwqat yōṅoyhput pölavikit tsovalayaqe, pakwt lȫq sihk̇ayʼtaqat hoaput aṅ opomnaya. 21 Noqw nȫnösaqam tsivót-sikip sōmorit pahsaʼhaqam tahtaqtya, noqw pu momoyam-niqw pu tsātsayom pīwu.

Jesus Walks on the Water (Mr 6.45-52; Jn 6.15-21)

22 Pahsat pay Jesus put aw nánatuwnayaqamuy pākihut aqw yuñeʼ, pay ahsavo wuhkovatuphat ayoqwatyaniqat pumuy tusoqʼayata nāto pam sinmuy nimanʼayalawhqee. 23 Noqw pam sinmuy hōnat, nāwaknaniqe nāla tsomomiqʼa; nihqe mihikq, pam pepeq súnalaa. 24 Noqw pahsat pākihu wuhkovatuphat nāsaveq hinnumk̇aṅw, pāhut wuṅwnuptuqat akw wawaöklawu, amuhpewi hūhukq ōviyʼo. 25 Noqw talhahayiṅqw, Jesus pāvaqe waymak̇aṅw pumuy amumii. 26 Noqw put aw nánatuwnayaqam put pāvaqe waymaqw tutwaqe, tsātsawnaqe paṅqaqwa: Pam tualaṅwʼu, kitota; nihqe tsātsawnaqe aʼnö hiṅqaqwa. 27 Noqw pahsat pay Jesus pumuy amumi lavayhtiqe, paṅqawu: Uma qa hin unaṅwayʼyuṅwni; pay nūu; uma qa tsawiniwyuṅwni. 28 Noqw Peter lavayhtiqe aw paṅqawu: Tutuyqawhqa, kurs pay pas umnen, nuy pāvaqe ūminiqat um paṅqawni. 29 Noqw pam paṅqawu: Pewʼi. Pahsat pu Peter pākihut aṅqw yámakqe, Jesus aw pāvaqe wayma. 30 Nit pas aʼnö hūhukq pam navotqe pahsat pay tsawna, nihqe pakitoqe aʼnö paṅqawu: Tutuyqawhqa, nuy ayo távii. 31 Noqw Jesus pahsat pay put aw māvuyaltiqe ṅuat, aw paṅqawu: Is okiw um öwituptsiwniʼtaqa, ya um hinoqw pēvewinhti? 32 Noqw puma pākihut aqw pakiqw, hūk̇aṅw qeʼti. 33 Noqw ima pākihut aṅqw taṅawtaqam Jesus aw ökihqe, pas hihtatotaqe aw paṅqaqwa: Kurs um pas antsa God Tíata.

Jesus Heals the Sick in Gennesaret (Mr 6.53-56)

34 Pu puma ayoqwat nöṅakqe, haqam tutskwat Gennesaret aw öki. 35 Noqw pep sinom put pituqw nanaptaqe, pep aṅqeʼ tutskwat aṅ ahsupoq hakimuy ayatotaqe, sohsokmuy tūtuyyaqamuy put aw tsamvaya; 36 Nihqe pay ṅasʼew puma put yuwsiyat qalavaqe nömökput aw tóṅokyaniqey put aw nānawakna, noqw hakim hihsaʼnihqam put aw tóṅokyaqam pās qalaptuya.