Matthew
The Resurrection (Mr 16.1-10; Lk 24.1-12; Jn 20.1-10)
28 Noqw nasuṅwintalöṅnit aṅ ruhpakq, Sundayt aw pituqw, nāt qöyaṅwnuptsiwtaqwhaqam Mary Magdalene, sukwat Maryt amum tūamit aw kuyvato. 2 Noqw meh, pas tutskwa aʼnö tayayayku; pi Tutuyqawhqat hoṅviayaat ōṅaqw hawhqe, hötsíwat aṅqw owat ayo mūmat, atsveq qatuptu. 3 Noqw pas taywaat talwihpikit anta; pu pas yuwsiat nūvat an qȫtsa. 4 Noqw tūtuwalaqam put mamqasyaqe, pavan tururuykuyaqe, pas soʼqey panhtoti. 5 Noqw hoṅviaya lavayhtiqe, wuhtituy amumi paṅqawu: Uma qa tsawiniwtani. Pay nu navotiʼtaqw, uma Jesus ura nahoylehtsit aw muiltiqat hepnuma. 6 Pam qa yepʼe; pi pam ahoy tātayi, ura pan lavayhti. Kurs huvam pewnen, Tutuyqawhqat as haqeʼ qatsqat uma aw yórikni. 7 Nen uma yaṅqw k̇aktayeʼ, pam mokiwuy aṅqw ahoy tātayhqat put aw nánatuwnayaqamuy āawnani; Noqw meh, pay pam hapi aṅwu umupyeve Galileet aqwni. Ason pepeq uma aw tātayyani. Meh, nu hapi umuy āawna, kita. 8 Noqw puma tsawiniwk̇aṅw, piw pas hahlayk̇aṅw, tūamit aṅqw ahpiy k̇aktayhqe, put aw nánatuwnayaqamuy amumi tūawmaqe wari. 9 Noqw puma paṅsoniqw pi meh, Jesus pas nāp pumuy amuhsawvaqe paṅqawu: Hakim hahlayṅwu. Noqw puma put awnihqe, hok̇ayat mavoqtat, aw naokiwhta. 10 Pahsat pu Jesus amumi paṅqawu: Uma qa tsawiniwtani. Uma yahpiynen, itupkomuy amumi paṅqawhq, puma Galileet aqwyani; nen ason pepeq inumi yórikyani.
The Report of the Guard
11 Noqw puma nāto paṅsoniqw, meh, haqawat tūtuwalaqam kīve ökihqe, hin hiniwhtiqat God awwat mohpeq momṅwituy sohsok āawnaya. 12 Noqw puma wukwʼaʼyatuy amumum tsovaltiqe, hinhtotiniqey yuaatota; nihqe nihtiwtaqat sīvat solāwamuy huytota, 13 Paṅqawk̇ahk̇aṅwo: Uma hapi kitotani: Itamuy tokq, put aw nánatuwnayaqam mihikq ökihqe, put tokoyat haqami ūuyiʼwisa. 14 Noqw ason kurs tutskwat aw moṅwi it navotq, itam aw tūtuyqawveʼ, umuṅem qeniʼtotani. 15 Noqw ōviy puma sīvat ömahtotaqe, amumi hin tutaptotaqat anhtoti. Noqw iʼ yan lavayi nāt Jew-sinmuy amuhpaʼ yuaatiwa pewhaqami pahsavoo.
Jesus Appears to His Disciples (Mr 16.14-18; Lk 24.36-49; Jn 20.19-23; Acts 1.6-8)
16 Pahsat pu pakwt sūkw sihk̇ayʼtaqam Jesus aw nánatuwnayaqam Galileet aqwya, haqam tsomot Jesus pumuy amumi tutaptaqat paṅsoqʼa. 17 Noqw Jesus pumuy amumi pituqw, puma put aw yórikyaqe pas hihtatota. Noqw pay haqawat soq pēvewinhtoti. Noqw pam amumi paṅqawu: Ina sohosk hihta ōveqatsit ep-nik̇aṅw pu tūwaqatsit epnihqat aw nuy moṅwtavi. 18 See 28:17 19 Noqw ōviy uma aṅqeʼ nankwuseʼ, sopk̇awtaqamuy sinmuy tutuqaynayani, pu kūyit akw pumuy tuvoylatiwisni, Inay, pu Tiyat, pu Qahováriwtaqat Hikwsit, pumuy natṅwaniyamuy aqwʼa. 20 Nen puma itutavoy aṅ ahsupoq aṅ hinwisniqat uma pumuy tutuqaynayani. Noqw nuʼ hapi yūmosa umumum hinmani, yep qatsísoʼṅwamiqhaqamii. Okiw antani.