Mark

The Resurrection (Mt 28.1-8; Lk 24.1-12; Jn 20.1-10)

16 Pu nasuṅwintalöṅnit aṅ ayo ruhpakq, Mary Magdalene-niqw, pu James yuat Mary-niqw, pu Salome, puma hīhihta kwaṅwáhovaqtuqat tuiya, tūamit awyeʼ, put akw Jesus lelwiyaniqe ōviyʼo. 2 Pu ōviy Sundayt aw pituqw, puma suits talavay tāwat yámaktoqw tūamit aw ökiwisa. 3 Nihqe nānami paṅqawwisa: Ya sen hak itamuṅem tūamit hötsíwat aṅqw ayo owat mūmani? 4 Nit puma aw yórikyaqw, kurs owa pay ayo mūmaniwa, pas pi qaanʼeway yahsayoqʼa. 5 Noqw puma tūamit aqw yuṅqw, kurs hak tiyo wūpat qȫtsat yuwsiʼk̇aṅw put putvaqe qatu. Noqw puma put tutwaqe pas tsātsawna. 6 Noqw pam hak pumuy amumi paṅqawu: Uma qa tsawiniwyuṅwni. Pay uma as Jesus Nazareth aṅqw sino nahoylehtsit ep muiltiqat hepwisa. Pam ahoy tātayi, pam qa yepʼe. Kurs huvam haqam pam taviwhqat aw yórikyaa. 7 Noqw yupave, uma put aw nánatuwnayaqamuy-nik̇aṅw pu Peter, pumuy amumi yan tuawwisni: Pam umuhsavo Galilee aqwni. Ason pep uma put aw yórikyani. Pay ura umumi paṅqawu. 8 Noqw puma paṅqw nöṅaṅayku; nihqe hin unaṅwtotiqe, tururutiʼk̇ahk̇aṅw watqa. Pas pi puma tsawiniwyuṅqe, ōviy qa hakiy haqam aw hiṅqaqwa.

Jesus Appears to Mary Magdalene (Mt 28.9-10; Jn 20.11-18)

9 Noqw Sundayt aw pituqw, suits talavay Jesus ahoy tātayhqe, mohti Mary Magdalene aw namtakna. Ura pam put aṅqw tsaṅeʼ nukpanhihikwsimuy ipwa. 10 Noqw pam ahpiynihqe, Jesus ámumyaṅwuqamuy put āawna, pumuy qahahlayyak̇ahk̇aṅw tsaykitaqʼö. 11 Noqw yaw pam piw qátuhqe, pu Maryt aw namtaknaqat puma nanaptak̇aṅw qa tūtuptsiwa.

Jesus Appears to Two Disciples (Lk 24.13-35)

12 Pantaqat atsve puʼ pumuy amuṅaqw haqawat lȫyöm haqami tutskwamiq waymaqw, pam piw pas hinwat hink̇aṅw pumuy amumi namtakna. 13 Noqw puma ahoy kīminihqe, mímuywatuy put āawna. Noqw pay piw puma pumuy lavayiyamuy qa tūtuptsiwa.

Jesus Appears to the Eleven (Mt 28.16-20; Lk 24.36-49; Jn 20.19-23; Acts 1.6-8)

14 Pantaqat atsva puʼ pakwt sūkw sihk̇ayʼtaqamuy nōnovaqw, Jesus amumi namtaknaqe, pumuy qatūtuptsiwaqat, pu aʼnö unaṅwayamuy ep qöhqöya, puma put ahoy tātayhqat aw yórikyaqamuy lavayiyamuy qa tūtuptsiwaqw ōviyʼo. 15 Pu pam pumuy amumi paṅqawu: Uma tūwaqatsit aṅ ahsupoq nankwusani. Pu uma sohsokmuy sinmuy amumi lomatuawit yuaatotani. 16 Lomatuawit qa tuptsiwhqa hapi maskimiq tūviwtaniqw, pam put eṅem yukiwni. Nīkaṅw tuptsiwht, kūyit akw tuvoylatiqa hapi ayo yámakiwtani. 17 Pu īi himu tuawiʼyuṅqa aṅ tuptsiwniʼyuṅqamuy amumi énaṅhtini: Puma inatṅwaniy aw yank̇ahk̇aṅw nukpanhihikwsimuy nuhtuṅaqw ipwanwisni; pu piw himuhkwa yuaatotani. 18 Kurs puma tsūtsuʼtuy ṅuayeʼ, pu sen kurs puma hihta qöyanpit hikwyeʼ, pas soon put akw hinhtotini. Puma tūtuyyaqamuy amumi hintsatsnaqw, puma qalaptuyamantani.

Jesus is Taken up to Heaven (Lk 24.50-53; Acts 1.9-11)

19 Noqw Tutuyqawhqa pumuy amumi yan yuaaykut, ōmi wīkiwa; nihqe God putvaqe qatuptu. 20 Noqw puma paṅqw nankwusaqe, sohsovik yuaatinumyaqw, Tutuyqawhqa pumuy amumum tumalayʼk̇aṅw, k̇ātatayhpit hihta tuawiʼtaqat akw lavayit öqalanma. Yantani.