Mark

The Man with a Crippled Hand (Mt 12.9-14; Lk 6.6-11)

3 Pu piw pam tsotsvalkimi paki; noqw hak tāqa lakput mayʼtaqa pep nuhtuma. 2 Noqw mātaqpi kurs Jesus nasuṅwintalöṅnit ep put qalaptsinaniqat ōviy momṅwit put aw tunatyawyuṅwa, puma as hihta ep put nēveltoynayaniqe ōviyʼo. 3 Noqw pam lakput mayʼtaqat aw paṅqawu: Kurs nuhtutpik wunuptuu, kita. 4 Pahsat pu pam pumuy amumi paṅqawu: Ya hak nasuṅwintalöṅnit ep lolmat hinhtiniqw pam súanta, sen qalolmat hinhtiniqöʼ? sen qatsit ayo táviniqöʼ? sen nīnaniqö? Noqw puma qa hiṅqaqwa. 5 Pu pam hin unaṅwtiqe, pumuy aʼnö unaṅwayamuy ep kwaṅwáitsivutiqe, amuhpaʼ yorkit, tāqat aw paṅqawu: Uhmay tsihkwaa. Noqw pam put tsihkwa; noqw māat ayaṅqwat māyat an pās powalti. 6 Pahsat pu Pharisee-sinom aṅqw ahpiyyaqe, āpiy pay Herod aṅk wīsiwtaqamuy amumum hin as put nīnayaniqey put ankiwakw yuaatota.

A Crowd by the Lake

7 Noqw pay Jesus put aw nánatuwnayaqamuy amumum sinmuy amuṅaqw ahpiynihqe, wuhkovatuphat aqwʼa. Noqw sinom qaanʼewakw hintaqam put aṅkya, Galilee-tutskwat aṅqʼö, pu Judea-tutskwat aṅqʼö, 8 Pu Jerusalem-kitsókit aṅqʼö, pu Idumaea-tutskwat aṅqʼö, pu pāyut Jordan yupqöyṅaqʼö, pu ima Tyre-nik̇aṅw pu Sidon-kitsókit aṅqeʼ yesqam pīwu. Puma put k̇ātumaltaqat nanaptaqe, aw öki. 9 Noqw pam put aw nánatuwnayaqamuy amumi paṅqawhq, puma put eṅem tsākw pākihut mask̇atota, taq nāp hisat sinom qaanʼewakw hinhteʼ, put aw hūrs hómikmani. 10 Pi pam k̇aysiwhqamuy sinmuy qalatsintaqw, ōviy sohsoyam hihta akw tūtuyyaqam put aw tóṅokyaniqey put aw nānaqasya. 11 Noqw aṅsakis tuyoyʼeʼwayom hīhikwsim put aw tātayyaqe atpipo nawhitotak̇ahk̇aṅw, k̇ēew paṅqaqwa: Um hapi God Tíata. 12 Noqw puma put tunvotnayaniqw, pam pumuy tusoqmewa.

Jesus Chooses the Twelve Apostles (Mt 10.1-4; Lk 6.12-16)

13 Pu pam tsomomiqnihqe, hakimuy namorstat, pumuy wáṅwayi. Noqw puma put awya. 14 Noqw pam pakwt löq sihk̇ayʼtaqamuy namorsta, puma put amum hinnumyaniqat ōviyʼo, pu pam pumuy aṅqeʼ lomatuawit yuaatinumyaniqat ayataniqee. 15 Pu puma hīhihta akw tūtuyyaqamuy qalaptsintiwisniqat aw öqalat pam pumuy pasiwna, pu nuhtuṅaqw nukpanhihikwsimuy ayo ipwanwisniqat awʼi. 16 Pam imuy tavi: Simon, pam piw Peter yan put tuṅwa. 17 Pu Zebedeet tiyat James-nit, pu tupkoyat John, pumuy pīwu. Pam piw Boanerges yan pumuy tuṅwa; pam Yoyʼumukit antaqamu, iʼnihqe pamʼi. 18 Pu Andrewt, pu Philip, pu Bartholomewt, pu Matthewt, pu Thomas, pu Alphaeus tiyat James, pu Thaddaeus, pu Simon sinomuy amuṅem qa nātusiʼtaqata, 19 Pu momṅwituy amumi put mātapniqat hakiy Judas Iscariot pīwu. Noqw puma haqam kīve öki.

Jesus and Beelzebul (Mt 12.22-32; Lk 11.14-23; 12.10)

20 Noqw pay piw sinom qaanʼewakw hintaqam amumi tsovaltiqw, ōviy soon kurs puma ṅasʼew nȫnösani. 21 Noqw Jesus sinomat put nanaptaqe, put ṅuayaniqe awya paṅqawk̇ahk̇aṅwo: Pam okiw qanavótiʼnuma. 22 Noqw hakim tutavot tutuqaynayaqam Jerusalem aṅqw ökihqe paṅqaqwa: Pam Beelzebub akw tuyqawiwta. Pam nukpanhihikwsimuy moṅwiyamuy aw yank̇aṅw nuhtuṅaqw nukpanhihikwsimuy ipwanta. 23 Noqw pam sinmuy wáṅwayhqe, tūwutsit hihta tuawiʼtaqat akw pumuy amumi paṅqawu: Ya sen Satan Satan ayo hóroknani? 24 Haqam moṅwtunatya nehpewhteʼ, pas soon wúnuni. 25 Pu kurs haqam kīvit nehpewhtoteʼ soon hoṅni. 26 Noqw kurs Satan nāp nāmi mamk̇eʼ, pu nātsik̇eʼ, soon pam wúnuni; panis pi pam sohtini. 27 Soon hak hakiy aʼnö hoṅvit kīyat aw pak̇eʼ, hihta himuyat put aṅqw nawhkini, hal pas mohti put someʼ-saa, nen pahsat pu pam put kīyat kīqötani. 28 Nu umumi pas antsa paṅqawni: Hak hihta ep qaanhtiniqw, sen nuhtumiq hiṅqawniqw, pam pantaqa put ahpiy ayo yukiwmantani. 29 Nīk̇aṅw hak haqam Qahováriwtaqat Hikwsit aqw hiṅqawniqw, pam pantaqa pas soon hisat put ahpiy ayo yukiwni. Panhtiqa pas sūs tūviwniqey aqw nāvitsinani. 30 Ura puma paṅqaqwa: Pam tuyoyʼewakw hikwsit akw tuyqawiwta, kitotaqw, ōviy pam yan lavayhti.

Jesusʼ Mother and Brothers (Mt 12.46-50; Lk 8.19-21)

31 Noqw pahsat pu put tupkomat, yuy amum, put aw ökihqe, ihpaq hoṅk̇ahk̇aṅw, put aw hakiy ayatotaqe, put wáṅwayya. 32 Noqw sinom k̇aysiwhqam put aqlap yesqam put aw paṅqaqwa: Meh, uhtupkom, uṅuy amum, ihpaq uṅ wáṅwayya. 33 Noqw pam lavayhtiqe, amumi paṅqawu: Ya hak íṅuu? Pu ya hakim itupkomya? 34 Pu pam put aqleʼ yesqamuy amuhpaʼ yorikt, paṅqawu: Kurs iṅuy, pu itupkomuy amumi yórikyaa. 35 Pi hak haqam God tunatyayat aṅ hinmaqa hapi itupko, isiwa, pu íṅuu.