Mark

Jesus Feeds the Four Thousand (Mt 15.32-39)

8 Noqw ephaqam sinom wukotsovawk̇aṅw, qa hihta nitk̇ayʼyuṅqw, Jesus put aw nánatuwnayaqamuy wáṅwayhqe, amumi paṅqawu: 2 Pas nu sinmuy ōkwatuwa, puʼ pāyis tēvep inumumyak̇ahk̇aṅw, okiw kurs hihta nōnovani. 3 Noqw nu pumuy qa ȫyiwyuṅqamuy kīkiyamuy aṅqeʼ hōnaqw, soon puma qa māmaṅuani, pi pētu yāvaqhaqaqw öki. 4 Noqw put aw nánatuwnayaqam lavayhtotiqe put aw paṅqaqwa: Puyaw sen hak haqam nȫsiwhqatnen imuy sinmuy yep qayēsiwhpuve haqam öynani? 5 Noqw pam pumuy tūviṅta: Ya uma hihsaʼhaqam pölavikiʼyuṅwa? Noqw puma paṅqaqwa: Tsáṅee. 6 Pu pam sinmuy tutskwava yesvaniqat amumi paṅqawu. Nit pu pam tsaṅeʼ pölavikit ömahtat, put ep hahlayhti, nit put yōṅoyhtat, pu put aw nánatuwnayaqamuy amumi put oya, sinmuy nopnayaniqat ōviyʼo. Noqw puma panhtoti. 7 Noqw puma hikikw hiṅsakwmuy pāvakiwhtuy kinumya. Noqw pam pumuy ep hahlayhtit, pu put aw nánatuwnayaqam sinmuy piw nopnayaniqat amumi paṅqawu. 8 Pu ōviy puma nȫnösaqe ȫöya. Noqw puma yóṅoyhput akwsiṅqat tsovalayaqe, tsaṅeʼ hoaput aṅ opomnaya. 9 Noqw ima nȫnösaqam nālöp sōmorit pahsaʼhaqamo. Noqw pam pumuy aṅqeʼ hōna. 10 Nit pahsat pay pam put aw nánatuwnayaqamuy amumum pākihut aqw pakit, Dalmanutha-tutskwat ep pitu.

The Pharisees Ask for a Miracle (Mt 16.1-4)

11 Noqw hakim Pharisee-sinom put aw ö́kihqe, amum nāṅwuyʼyuṅqe, put aw tuwantota; nihqe as pam ōṅaqw k̇ātatayhpit hihta tuawiʼtaqat mahtaknaniqat put aw öʼqalya. 12 Noqw pam unaṅwpeq öykitat paṅqawu: Ya hinoqw puʼ qatsívaptsiwyuṅqam k̇ātatayhpi hihta tuawiʼtaqat aw yórikyaniqey-sa nānawakna? Pas antsa nu umumi paṅqawni: Pay soon k̇ātatayhpi hihta tuawiʼtaqa puʼ qatsívaptsiwyuṅqamuy amumi mahtakiwni. 13 Pu pam pumuy amuṅaqw nakwsut, pākihut aqw piw paki, wuhkovatuphat yupqöymiq yámakniqee.

The Yeast of the Pharisees and of Herod (Mt 16.5-12)

14 Noqw put aw nánatuwnayaqam kurs pölavikit suhtokya; pay puma pākihut aṅqw pas panis sūkw pölavikiʼyuṅwa. 15 Noqw pam pumuy uʼnanaqe, amumi paṅqawu: Uma tunatyaltoteʼ, Pharisee-sinmuy pēk̇eniyamuy ep qa ūnaiwyuṅwni, pu Herod pēk̇eniyat epʼe. 16 Noqw puma nānami paṅqaqwa: Itam qa nitk̇ayʼwisq, ōviy paṅqawu. 17 Noqw Jesus put navotqe, pumuy amumi paṅqawu: Ya uma hinoqw qa pölavikiʼwisqey lavayta? Puyaw uma nāt aʼnö unaṅwayʼyuṅwa? 18 Ya uma pōsiʼk̇ahk̇aṅw qa tāyuṅwa, piw naqvuyʼk̇ahk̇aṅw, qa nanvotya? Ya uma qa uʼniʼyuṅwa? 19 Ura nu tsivót-sikip sōmorit pahsaʼnihqamuy tahtaqtuy amuhpaʼ tsivot pölavikit yóṅoyhtaqw, uma akwsiṅqat tsovalayaqe, hihsakip hoaput opomnaya? Noqw puma put aw paṅqaqwa: Pakwt löq sihk̇ayʼtaqata. 20 Pu ura nu nālöp sōmorit pahsaʼnihqamuy sinmuy amuhpaʼ tsaṅeʼ pölavikit yóṅoyhtaqw, uma akwsiṅqat tsovalayaqe, hihsakip hoaput opomnaya? Noqw puma paṅqaqwa: Tsáṅee. 21 Noqw pam pumuy amumi paṅqawu: Noqw ya hintaqw ōviy uma nāto qa māmatsya?

Jesus Heals a Blind Man at Bethsaida

22 Pu pam Bethsaidat ep pitu. Noqw hakim hakiy qapostalqat put aw wikvayaqe, pam put aw hintsanniqat aw nānawakna. 23 Noqw pam qapostalqat māyat ṅuat, kīṅaqw qalavo put wīki; nit put posmiq töhakt, pu lȫvaqw may akw put aw toṅokt, sen pam hihta túwahqat tūviṅta. 24 Noqw pam kwuhpukt, paṅqawu: Pay nu sinmuy himutsotskit anyuṅqamuy yaktaqw tuwa. 25 Noqw pahsat pu piw pam put posmiq lȫvaqw may akw hintsanqw, put pōsiat tālawva. Noqw pam powaltiqe, pas suyan sohsokmuy tuwa. 26 Pu Jesus put kīyat aw hōna paṅqawk̇aṅwo: Um qa kīmini; piw um qa hakiy kīve it āawnani.

Peterʼs Declaration about Jesus (Mt 16.13-20; Lk 9.18-21)

27 Pu Jesus put aw nánatuwnayaqamuy amumum paṅqw ahpiynihqe, Caesarea Philippi aṅ kitsókinawit nakwsu. Noqw pumuy paṅsoyaqw, pam put aw nánatuwnayaqamuy tūviṅtaqe amumi paṅqawu: Ya sinom nuy hákiynihqat paṅqaqwa? 28 Noqw puma paṅqaqwa: Yaw um kūyit kw tūtuvoylalawhqa John-nihqat paṅqaqwa. Pu yaw um Elias-nihqat pētu paṅqaqwa. Pu haqawatuyniqw yaw um himuwa God lavayʼayaata. 29 Pahsat pu pam pumuy amumi paṅqawu: Noqw úmuyniqw nu hakʼi? Noqw Peter huʼwaqe, put aw paṅqawu: Um hapi Christ, (God ahpiy moṅwʼasiʼtaqa). 30 Noqw pam pumuy pās mēwaqe, puma put pantaqat qa hakiy āawnayaniqat amumi paṅqawu.

Jesus Speaks about His Suffering and Death (Mt 16.21-28; Lk 9.22-27)

31 Pahsat pu pam yuaativaqe, pumuy amumi paṅqawu: Pas nuʼ Sinot Tiat kurs hin hīhihta aṅ qa k̇ānavotni. Noqw ima wukwʼaʼyat-niqw, pu God awwat mohpeq momṅwit-niqw, pu tutavot tutuqaynayaqam nuy tūvayani, piw nuy nīnayani. Noqw pāyis talq nu ahoy tātayni. 32 Noqw pam it pas suyan paṅqawhq, ōviy Peter put qalavo láṅaknat mēwa. 33 Noqw pam namtökqe, put aw nánatuwnayaqamuy amuhpaʼ tātayht, Peter uʼnanaqe aw paṅqawu: Inuhkwayñavoo, Satan! taq um qa God tunatyayat wūwantat, tuwat soq sinmuy tunatyayamuyu. 34 Pu pam sinmuy put aw nánatuwnayaqamuy enaṅ wáṅwayhqe amumi paṅqawu: Inuṅkniqey nāwaknaqa nāqahihtatat, nahoylehtsiy īkwiltat, inuṅk nakwsumantani. 35 Pi qatsiy k̇ahk̇awnaqa hapi put kwayhni; pu inuṅem tunatyat, pu lomatuawit ōviy qatsiy kwayhqa hapi put tuyqawvani. 36 Ispi puyaw as sino tūwaqatsit sohsok himuyʼvak̇aṅw nāp qatsiy kwaheʼ, hin pam put akw moṅwvastini? 37 Ya sen sino hihta akw qatsiy ahoy nāptini? 38 Paniqw hapi ōviy haqawa puʼ tusk̇apʼiwyuṅqamuy, qaanhinwisqamuy qatsívaptsiwyuṅqamuy amutpip nuy, ilavayiy enaṅ hahmanqw, nuʼ Sinot Tiat put hapi tuwat hahmanni, nu hisat ihoṅviaymuy qahováriwyuṅqamuy tsamk̇aṅw, Inay lolmat tālawṅwayat yank̇aṅw pītee.