Luke
The Preaching of John the Baptist (Mt 3.1-12; Mr 1.1-8; Jn 1.19-28)
3 Noqw hak Tiberius Caesar pakwt tsivot sihk̇ayʼtaqat yahsaṅwuy aṅ moṅwʼiwtaqw, pu Pontius Pilate Judea-tutskwat ep moṅwʼiwtaqw, pu Herod Galilee-tutskwat aw moṅwʼiwtaqw, pu tupkoat Phillip Iturea-tutskwat ep sinmuy amumi-nik̇aṅw pu Trachonitis-tutskwat ep sinmuy amumi moṅwʼiwtaqw, pu Lysanias Abilene-tutskwat ep moṅwʼiwtaqw, 2 Pu Annas-niqw pu Caiphas, puma God awwat mohpeq moṅwʼiwtaqw, ephaqam God lavayhti, Zacharias tiyat John awʼi, pam qayēsiwhpuveniqʼö. 3 Noqw pam pāyut Jordan aṅ ahsupoq tutskwat aṅ nakwsuqe, sinmuy amumi yuaataqe paṅqawu: Uma nāp umuhtunatyay aṅqw lasyeʼ, kūyit akw tuvoylatotini. Noqw God umuhqaanhtipuy umuhpiy ayo yúkuni, amumi kita. 4 Ura hakiy God lavayʼayayat Esaiast lavayiyat aṅ yan peyʼta: Hakiy tönaat qayēsiwhpuve tsaʼtinumqa navotniwa; nihqe yan lalvaya: Uma Tutuyqawhqat eṅem pöhut aw hintsatsnani; pam háqeʼniqat aw suwiptotani. 5 Sohsovik sisk̇at aṅ otsómhtini, pu sohsovik tuhtukwi, pu tsotsmo tutskwatiwni, pu aṅ nukushinyuṅqa súwiptotini, pu haqeʼ anahaiwyuṅqa pöhiṅputiwni. 6 Noqw sinom sohsoyam God hin ayo tūooyhqat aw yórikyani. 7 Pahsat pu sinom put ahpiy kūyit akw tuvoylatiwyaniqe ōviy put aw ökiwtaqw, pam pumuy amumi yan lalvaya: Is ohi, uma hakim tsūtsuʼtuy amunyuṅqamu, ya hak umuy itsívut nātoniqat aṅqw watqaniqat umumi paṅqawu? 8 Kurs uma pas antsa umuhtunatyay aṅqw lasyeʼ, uma alöṅöt qatsit ahpiy tutmalat hintsatsk̇ani. Pu uma umuhʼunaṅwpeq qa pan lavaytani: Abraham hapi itanaa, kitotani; taq nu umumi paṅqawni: God it oʼwat aṅqw Abraham eṅem sinmuy aniwnaniqey tuwiʼta. 9 Noqw pay soñawnen ōviy piw pik̇aiṅwa himutsokit ṅayat tsahqaniqey naʼsasʼiwta. Noqw ōviy himuwa tsoki lomasipalat qa himuyʼvaṅwuqa tsaqniweʼ, qȫhit aqw tūviwni. 10 Noqw sinom put tūviṅtotaqe aw paṅqaqwa: Noqw itam hinhtotini? 11 Noqw pam lavayhtiqe amumi paṅqawu: Lȫqmuy wukonapnayʼtaqa ṅastanihqat sūkw máqani; pu nȫsiwhqayʼtaqa piw pay anhtini. 12 Noqw moṅwit eṅem sīvat ömalalwaqam piw kūyit akw tuvoylatotiniqe ö́kihqe, put aw paṅqaqwa: Tūtutuqaynaqa, ya itam hinhtotini? 13 Noqw pam pumuy amumi paṅqawu: Pay hihsaʼhaqam umuṅem tuwantiwhqat epnihqe qa hóyokput uma nuhtuṅaqw ömahtiwisni. 14 Noqw pu solāwam piw tuwat put tūviṅtotaqe aw paṅqaqwa: Noqw ítamwat hinhtotini? Noqw pam amumi paṅqawu: Uma qa tūyuyuyhnayani. Piw qa hakiy hihta atsátotoynayani; pu uma hin ahsalalweʼ, pay put ep nakwhaniʼyuṅwni. 15 Noqw nāt sinom sumataq hintaniqat maqaptsiʼyuṅqw, sohsoyam unaṅwpeq John aw hin wūwantota, sen pi pam Christ-nihqata, sen pi pay qa pamnihqata. 16 Noqw John lavayhtiqe, sohsokmuy amumi paṅqawu: Pay nuʼ pi as pas antsa umuy kūyit akw tuvoylalawu. Nīk̇aṅw pay suhk̇a inuhpenihqe pas pavan öqala aṅqʼö. Noqw soon nu yanʼewaynīk̇aṅw pay ṅasʼew put tots-sosomhpiyat ṅahni. Ason pam Qahováriwtaqat Hikwsit akw umuy tuvoylatani, pu qȫhit akwʼa. 17 Soñawnen pam wuhihpiy yawta, nihqe murivihk̇ay ep pās qeniʼtani, nen söhövosiy koyohkiy aw taṅatani, nit pam ason tsihput qȫhit qatokṅwuqat akw taqtsokni. 18 Yan pam hīhihta akw pumuy ökwhank̇aṅw, amumi lomatuawit yuaata. 19 Noqw John Moṅwit Herod qöhqöya, tupkoyat Philip nȫmayat Herodius epʼe, pu sohsok hihta ep qaanhtiqat ep pīwu. 20 Noqw Herod pay nāt piw qaanhtit, John sivikimi pana.
The Baptism of Jesus (Mt 3.13-17; Mr 1.9-11)
21 Noqw pam nāt qa sivikive pakiwtaqw, sinom sohsoyam kūyit akw tuvoylatiwyaqw, pu Jesus piw kūyit akw tuvoylatiqe, nāwakintaqw ōmi hötsílti. 22 Noqw Qahováriwtaqa Hikwsi höwit an tokoyʼk̇aṅw put atsmi hāwi. Noqw ōṅaqw hakiy tönaat hiṅqawhqe paṅqawu: Um hapi pas aw iunaṅwaa Itii. Nu uṅ pas hahlayi.
The Genealogy of Jesus (Mt 1.1-17)
23 Noqw Jesus tumalay hintsaktiva, sunat pakwt sihk̇ayʼtaqat pahsaʼhaqam yahsaṅwniʼk̇aṅwo. Noqw sinom wūwantotaqw, Jesus Joseph tíata. Noqw pam Helit tíata; 24 Noqw pam Matthat tíata, noqw pam Levit tíata, noqw pam Melchit tíata, noqw pam Jannat tíata, noqw pam Joseph tíata; 25 Noqw pam Mattathias tíata, noqw pam Amos tíata, noqw pam Naum tíata, noqw pam Eslit tíata, noqw pam Nagget tíata; 26 Noqw pam Maath tíata, noqw pam Mattathias tíata, noqw pam Semeit tíata, noqw pam Joseph tíata, noqw pam Judat tíata; 27 Noqw pam Joannat tíata, noqw pam Rhesat tíata, noqw pam Zorobabel tíata, noqw pam Salathiel tíata, noqw pam Nerit tíata; 28 Noqw pam Melchit tíata, noqw pam Addit tíata, noqe pam Cosam tíata, noqw pam Elmodam tíata, noqw pam Er tíata; 29 Noqw pam Joset tíata, noqw pam Eliezer tíata, noqw pam Jorim tíata, noqw pam Matthat tíata, noqw pam Levit tíata; 30 Noqw pam Simeon tíata, noqw pam Judat tíata, noqw pam Joseph tíata, noqw pam Jonan tíata, noqw pam Eliakim tíata; 31 Noqw pam Meleat tíata, noqw pam Menan tíata, noqw pam Mattathat tíata, noqw pam Nathan tíata, noqw pam David tíata; 32 Noqw pam Jesset tíata, noqw pam Obed tíata, noqw pam Booz tíata, noqw pam Salmon tíata, noqw pam Naasson tíata; 33 Noqw pam Aminadab tíata, noqw pam Aram tíata, noqw pam Esrom tíata, noqw pam Phares tíata, noqw pam Judat tíata; 34 Noqw pam Jacob tíata, noqw pam Isaac tíata, noqw pam Abraham tíata, noqw pam Tharat tíata, noqw pam Nachor tíata; 35 Noqw pam Saruch tíata, noqw pam Ragaut tíata, noqw pam Phalec tíata, noqw pam Heber tíata, noqw pam Salat tíata; 36 Noqw pam Cainan tíata, noqw pam Arphaxad tíata, noqw pam Sem tíata, noqw pam Noet tíata, noqw pam Lamech tíata; 37 Noqw pam Mathusalat tíata, noqw pam Enoch tíata, noqw pam Jared tíata, noqw pam Maleleel tíata, noqw pam Cainan tíata; 38 Noqw pam Enos tíata, noqw pam Seth tíata, noqw pam Adam tíata, noqw pam God tíata.