John
The Wedding at Cana
2 Ahpiy pāyis talq hakim Galilee-tutskwat ep kitsókit Canat ep nāṅuani; noqw Jesus yuat pep nuhtuma. 2 Noqw Jesus put aw nánatuwnayaqamuy amumum nāṅuiwniqat aw tūtsamiwa. 3 Noqw ovavalat súlawhtiqw, Jesus yuat put aw paṅqawu: Puma okiw ovavalat ṅastaya. 4 Noqw Jesus yuy aw paṅqawu: Wuhti, ya um hinoqw hiṅqawlawu? Pay ituwaniy nāto qa aw pitu. 5 Noqw put yuat tumalʼaʼyatuy amumi paṅqawu: Umumi hiṅqawhq, uma anhtotini. 6 Noqw pep navay owakuyhpi oyi, nanap lȫp sen payhp wukokuyhpit aṅ ohpokit pan tūtukwa. Sinom kūyit akw nākwaṅwʼewakwtotaniqat ōviy pāvam pep oyi, imuy Jew-sinmuy hapi pam tuwiamu. 7 Noqw Jesus tumalʼaʼyatuy amumi paṅqawu: Uma kuyhpit aṅ kūyit opomnayani. Noqw puma put aṅ tsīkilaya. 8 Pu pam pumuy amumi paṅqawu: Taa, uma aṅqw kukyeʼ, tūnopniʼtaqat aw kūyiʼwisni; noqw puma aw kūyiʼwisa. 9 Noqw tūnopniʼtaqa kūyit ovavalaniwhtiqat aṅqw hikwt, put háqamyaqat qa navotiʼta. Pay tumalʼaʼyat put kukyaqam-sa navotiʼyuṅwa. Noqw ōviy tūnopniʼtaqa möönaṅwuy wáṅwayhqe, 10 Aw paṅqawu: Pas hapi as soon hak qa nukṅwat ovavalat tūnopnaṅwu, nen ason pay sinmuy pavan ȫöyaqw, pahsat pu pay hinʼewakwniṅwu; noqw kurs um tuwat pas nukṅwat ovavalt waranhta. 11 Yan Jesus Galileet ep Canat ep k̇ātatayhpit pas susmohti tumaltaqe, aʼnö hímunihqey pan namtakna; noqw put aw nánatuwnayaqam put aw tūtuptsiwa. 12 Yantaqat atsve puʼ pam Capernaum aqwʼa; pam-niqw, pu yuat-niqw, pu tupkomatu, noqw pu put aw nánatuwnayaqamu, nihqe puma pepeq pay qa wūhakis yēse.
Jesus Goes to the Temple (Mt 21.12-13; Mr 11.15-17; Lk 19.45-46)
13 Noqw Jew-sinmuy hintsakpiam amutsva yūmosanihqat ep nōviwhqat aw pitsíwta, noqw Jesus Jerusalem aqwʼa. 14 Nihqe God kīyat ep pakit, wāwakastuy, pu kanelmuy, pu hö́wihtuy huhyayaqamuy pepeq tuwa, pu sīvat nāhoyṅwantotaqamuy pep yesqamuyu. 15 Nihqe pam sosompihohyat wuvahpitat, pumuy sohsokmuy God kīyat aṅqw ihpoq lālaya, pu kanelmuyu, pu wāwakastuyu; nit pu sīvat nāhoyṅwantotaqamuy sīvayamuy siwumnat, huhyanpiyamuy takumna; 16 Nit hö́wihtuy huhyayaqamuy amumi paṅqawu: Uma imuy ayoʼhaqami tsamyani; uma Inay kīyat qa huhyankitotani. 17 Noqw put aw nánatuwnayaqam uʼnayaqw, ura yan peyʼta: Nu uhkiy eṅem qanātusiʼtaqey ep nīnaniwni. 18 Pahsat pu Jew-sinom lavayhtotiqe put aw paṅqaqwa: Noqw um hihta aw yank̇aṅw īit hintsaki; um hihta akw uhʼöqalay itamumi poñahtani? 19 Jesus lavayhtiqe amumi paṅqawu: Uma it God kīyat sahpuknayaqw, nu pāyis tālat aṅ put ahoy wunuptsinani. 20 Pahsat pu Jew-sinom paṅqaqwa: Lȫp sunat aṅqw navay sihk̇ayʼtaqat yahsaṅwuy aṅ iʼ kītiwhq, ya um pāyis tālat aṅ put aw ahoy wunuptsinani? 21 Noqw pay pam nāp tokoy God kīyatnihqat paṅqawu. 22 Noqw ōviy pam mokiwuy aṅqw ahoy tātayhq, ura pam yan amumi lavayhtiqat put aw nánatuwnayaqam uʼnaya; nihqe puma hin peyʼtaqat tútuptsiwa, pu Jesus yan amumi hin lavayhtiqata.
Jesus Knows All Men
23 Noqw Amuhtsva-yūmosanihqat ep nōviwhq, Jesus Jerusalem epniqw, sinom hīhihta k̇ātutmalayat aw yórikyaqe, put aw tūtuptsiwa. 24 Noqw pay Jesus pumuy amumi qa tuptsiwa, sohsokmuy amumi navotiʼtaqe ōviyʼo. 25 Noqw soon pas piw hak Jesus put āwintani; pi himu sinot unaṅwpeqniqw pam navotiʼtaṅwu.