John
The Empty Tomb (Mt 28.1-8; Mr 16.1-8; Lk 24.1-12)
20 Noqw Sundayt aw pituqw, suits talavay nāt qa talq, Mary Magdalene tūamit awʼi; noqw kurs owa tūamit aqw ūtsiwtaṅwuqa ayo taviwa. 2 Pahsat pu pam wárikqe, Simon Peter-nit pu nuy, Jesus aw unaṅwayat yan túṅwantiwhqat, itamumi paṅqawu: Taq kurs Tutuyqawhqat tūamit aṅqw hóroknaya; nihqe haqami pi put hintsatsna. 3 Pu ōviy nu Peter amum tūamit aqw wari. 4 Noqw nu Peter ehpeqtaqe pay mohti paṅso pitu. 5 Nihqe nu motoltiqe ahpamiq tātayhqe tsatsákwmötsaput ep oyiqw tuwa; nīk̇aṅw pay nu qa aqw paki. 6 Pahsat pu Simon Peter inuṅk pitu; nihqe tūamit aqw pákihqe, tsatsákwmötsaput ep oyaqw tuwa. 7 Pu höhönpi put qötöyat akw as mōkiwtaqa pay tsatsákwmötsaput qa enaṅ qatsk̇aṅw pay nāla suphaqam qātsi. 8 Pahsat pu nu tuwat aqw paki, nihqe nu yórikqe tuptsiwa. 9 Pam mokiwuy aṅqw pas soon ahoy qa tātayniqat pan peyʼtaqat nāt itam qa mātsiʼyuṅqe ōviyʼo. 10 Pahsat pu itam ahoy paṅqw nima.
Jesus Appears to Mary Magdalene (Mt 28.9-10; Mr 16.9-11)
11 Noqw Mary tūamit ihpaq wunuwk̇aṅw okiw pakmumuya; nihqe ōviy pam pan hiṅqawk̇aṅw, motoltit, tūamit aqw yori; 12 Nihqe hakimuy lȫqmuy hoṅviayatuy qȫtsat yuwsiʼtaqamuy pepeq qatuqw tuwa, haqeʼ Jesus tokoat as qatsqat pep suhk̇a qötöveniqw, pu suhk̇a kukveqʼa. 13 Noqw puma hakim put aw paṅqawu: Wuhti, ya um hinoqw pakmumuya? Noqw pam amumi paṅqawu: Ispi kurs puma Itutuyqawhqay haqami hintsatsnaqe, haqam put taviyaqw nu qa navotiʼtaqe ōviyʼo. 14 Yan pam hiṅqawht, ahoy namtökk̇aṅw Jesus pep wunuqw tuwa; nit pam Jesus-niqw qa māmatsi. 15 Noqw Jesus put aw paṅqawu: Wuhti, ya um hinoqw pakmumuya? Ya um hakiy hepnuma? Noqw pay pam ūyit tumalayʼtaqanihqat pam wūwahqe aw paṅqawu: Tāqa, kurs um put haqami hintsaneʼ, um haqam put távihqey nuy āawnani; noqw nu haqami hintsanni. 16 Noqw Jesus put aw paṅqawu: Mary. Noqw pam aw namtökt, put aw paṅqawu: Rabboni, kita. (Pam Tūtutuqaynaqa iʼnihqe pamʼi.) 17 Jesus put aw paṅqawu: Um nuy qa ṅuṅʼani, taq nu nāt Inay aw qa wūvi. Um itupkomuy amuminen amumi paṅqawni: Nu God Inay aw wupni, pu pay pam piw Umunaa, pu Umuhtutuyqawhqa. 18 Noqw Mary Magdalene Tutuyqawhqat aw yórikqey put aw nánatuwnayaqamuy amumi tūawva, pu pam yan put aw lavayhtiqata.
Jesus Appears to His Disciples (Mt 28.16-20; Mr 16.14-18; Lk 24.36-49)
19 Noqw ép Sundayt ep tapkiqw put aw nánatuwnayaqam haqam tsovawtaqe, okiw Jew-sinmuy mamqasyaqe ōviy hötsíwhpaʼ uhtsiʼyuṅqw, Jesus pítuhqe, amuhsonve wunuwk̇aṅw paṅqawu: Uma kwakwhat unaṅwayʼyuṅwni. 20 Yan pam lavayhtit, tokoy haqami söhkwiknayaqat pumuy amumi mahtakna may énaṅa. Noqw put aw nánatuwnayaqam Tutuyqawhqat aw yórikyaqe hahlayhtoti. 21 Pahsat pu Jesus piw amumi paṅqawu: Uma kwakwhat unaṅwayʼyuṅwni. Nu hapi hin Inay nuy ayataqat pan piw tuwat umuy aṅqeʼ ayata. 22 Yan pam lavayhtit, amumi hikwsut paṅqawu: Huvam Qahováriwtaqat Hikwsit kwusuyaa. 23 Uma hakiy qaanhtipuyat ayo yukuyaqw pam ayo yukiwṅwu; pu uma hakiy qaanhtipuyat qa ayo yukiwniqat paṅqaqwaqw pam qa ayo yukiwṅwu.
Jesus and Thomas
24 Noqw imuy pakwt lȫq sihk̇ayʼtaqamuy amuṅaqw hak Thomas, Didimus yan túṅwantiwhqa, qa amumumniqw Jesus pitu. 25 Noqw ōviy mímawat Jesus aw nánatuwnayaqam put aw paṅqaqwa: Itam Tutuyqawhqat aw yórikya. Noqw pam amumi paṅqawu: Pas nu māyat ep muahpit akw peyʼvaqat aw qa yórikk̇aṅw pu imalatsiy akw put aw qa hintsank̇aṅw, pu put tokoyat haqam söhkwiknayaqat aqw imay qa paneʼ soon tuptsiwni. 26 Noqw ahpiy nanalsikis talq put aw nánatuwnayaqam piw haqam ahpave tsovawta, noqw Thomas pumuy amumuma. Noqw hösíwa uhtsiwtaqw Jesus pítuhqe amuhsonve wunuk̇aṅw paṅqawu: Uma kwakwhat unaṅwayʼyuṅwni. 27 Pahsat pu pam Thomas aw paṅqawu: Kurs uhmalatsiy aqw pew hintsanaa, pu imay aw yórikuu; pu pew māvuyalteʼ, itokoy haqam söhkwiknayaqat aqw uhmay pánaa, nit um pāpu qapēvewnat tuptsiwniʼtani. 28 Noqw Thomas put aw paṅqawu: God, Itutuyqawhqa. 29 Noqw Jesus put aw paṅqawu: Thomas, paysoq pi um inumi yórikqe ōviy tuptsiwa; inumi qa yórikyat tūtuptsiwaqam pas hihlayhpit epyani.
The Purpose of this Book
30 Noqw Jesus put aw nánatuwnayaqamuy amumumnik̇aṅw pas qa tsaʼ k̇ātatayhpit hihta tuawiʼtaqat tumalta; noqw pāvam qa sohsoy it tutuvenit aṅ peyʼta. 31 Noqw pay hapi pas Jesus Moṅwʼasiʼtaqanihqat, pu God Tíatnihqat uma tūtuptsiwaniqw ōviy īi yantaqa pēniwa, pu uma tūtuptsiweʼ put ahpiy qatsit tutwani.