John

Jesus Feeds the Five Thousand (Mt 14.13-21; Mr 6.30-44; Lk 9.10-17)

6 Iit atsve puʼ Jesus Galileet ep wuhkovatuphat Tiberias yan piw túṅwantiwhqat ayoqwat yama. 2 Noqw sinom qaanʼewakw hintaqam put aṅkya, pam tūtuyyaqamuy amuhpaʼ k̇ātatayhpiy tumaltaqw aw yórikyaqe ōviyʼo. 3 Noqw Jesus tsomomiq wupqe, put aw nánatuwnayaqamuy amumum pepeq qatuptu. 4 Noqw Jew-sinmuy tuiwiam Amutsva-Yūmosanihqat ep nōviwhqat aw hayiṅwiwta. 5 Noqw Jesus kwuhpukqe, sinmuy qaanʼewakw hintaqamuy put aw ökiwtaqamuy amumi yórikqe, Philip aw paṅqawu: Ya itam sen haqam tunöstuiyaqw ima nȫnösani? 6 Noqw pay pam put aw hin hepqe ōviy kita, pay pi as pam hinhtiniqey nāp navotiʼtaqe ōviyʼo. 7 Noqw Philip put aw paṅqawu: Pay as pi kurs itam lȫp sunat sīvat akw pölavikit tuiyeʼ, itam nāto kurs hin pumuy sohsokmuy hiṅsakw nopnayani. 8 Noqw suhk̇a put aw nánatuwnaqa Andrew, it Simon Peter tupkoat, Jesus aw paṅqawu: 9 Hak yep tiyohya tsivot söhövosvölavikit nitkayʼva, pu lȫqmuy tsākw pākiwhtuyu; noqw ya pam sinmuy k̇aysiwhqamuy amumi hímuu? 10 Noqw Jesus paṅqawu: Uma sinmuy yesvanayani. Noqw pep aʼnö tūsaqa; noqw ōviy sinom paṅ yesva, tsivót-sikip sōmorit pahsaʼhaqam tahtaqtu. 11 Pu Jesus pölavikit ömahtaqe, put ep hihlayhtit, put aw nánatuwnayaqamuy amumi put oya; noqw puma aṅ yesqamuy amuhpa put oʼya, pu pākiwhtuy pīwu, hihsaʼhaqam nānawaknaqat pahsaa. 12 Noqw pumuy ȫöyaqw, pam put aw nánatuwnayaqamuy amumi paṅqawu: Uma yóṅoyhput akwsiṅwqat tsovalayani, noqw qa himu hovalniwni. 13 Noqw ōviy puma tsivot söhövosvölavikit aṅqw yóṅoyhput nȫnösaqamuy akwsiṅwpuyamuy tsovalayaqe, pakwt lȫq sihk̇ayʼtaqat tutsáysivut aṅ opomnaya. 14 Noqw Jesus k̇ātatayhpit tumaltaqw, sinom aw yórikyaqe, paṅqaqwa: Pay kurs pas antsa iʼ tāqa God lavayʼayaat tūwaqatsit aw pitúniqa. 15 Noqw puma put awyeʼ, pas öqalay akw put moṅwtapyaniqat Jesus māmatsqe pay nāla piw tsomot aqwhaqamii.

Jesus Walks on the Water (Mt 14.22-33; Mr 6.45-52)

16 Noqw tapkiqw put aw nánatuwnayaqam wuhkovatuphat aw hanhqe, 17 Pākihut aqw yuṅt pāvaqe Capernaum aqwya; noqw nuṅwu qatālawvaqw, nāt Jesus qa pitu. 18 Noqw pumuy panwisq, aʼnö hukvaqw pāhu aʼnö hoṅvanta. 19 Noqw ōviy puma pāhut aṅqeʼ kwetstiwisqe payhp, sen nālöp tutskwatuwanit pahsavohaqami hoyóyoykuyaqw, Jesus pāvaqe waymak̇aṅw pākihut aw hayiṅwna. Noqw pam panmaqw, puma put tutwaqe pas tsātsawna. 20 Noqw pam pumuy amumi paṅqawu: Pay nūu, uma qa tsawiniwyuṅwni. 21 Pahsat pu puma hahlayhtotiqe, put pākihut aqw panaya; noqw pahsat pay pākihu pumuy haqami hoyóyototaqat aqw pitu.

The People Seek Jesus

22 Noqw qavoṅvaqw sinom wuhkovatuphat ayaqwat huruhtotiqam ura pay suhk̇a pākihu pápiqniqw put uʼnaya; noqw ura Jesus aw nánatuwnayaqam put aqw yuṅqw, pay ura Jesus pumuy qa amumum put aqw paki, noqw pay puma nanalt ahpiyya. 23 Noqw pay pētu pākihu Tiberius aṅqwyaqam paṅso öki, ura Tutuyqawhqa haqam pölavikit ep hahlayhtit tūnopnaqat paṅsoo. 24 Noqw sinom Jesus-nik̇aṅw pu put aw nánatuwnayaqamuy pep qa tutwaqe, pākihut aṅ yuṅt, Jesus hepwisqe Capernaum ep öki.

Jesus the Bread of Life

25 Nihqe puma wuhkovatuphat yupqöyveq put tutwaqe, aw paṅqaqwa: Tutuqaynaqa, ya um hisat peqw pitu? 26 Jesus lavayhtiqe pumuy amumi paṅqawu: Pas antsaa, pas antsa nu umumi paṅqawni: Uma k̇ātutmalat aw yórikyaqey qa paniqw nuy hepnumya, pi uma pölavikit nȫnösaqe ȫöyaqe ōviyʼo. 27 Uma nȫsiwhqat pay súlawhtiṅwuqat qa put ōviy tumalayʼyuṅwni. Uma nȫsiwhqat qatsit qasoʼtaqat aniwnaqat ōviy tumalayʼyuṅwni; put hapi nuʼ Sinot Tiat umuy máqani. Pi Ina God öqalay akw nuy tuvoylata. 28 Noqw puma put aw paṅqaqwa: Noqw itam hihta tumalat hintsatsk̇eʼ God tayawnayani? 29 Jesus lavayhtiqe amumi paṅqawu: Uma hapi hakiy God aṅqw távihqat aw tūtuptsiweʼ, yan God tayawnayani. 30 Pahsat pu puma put aw paṅqaqwa: Noqw ya um hihta akw put pantaqat itamumi mahtaknaqw itam aw yórikyeʼ ūmi tūtuptsiwani? Um hihta tumalayʼta? 31 Itanam pi ura qayēsiwhpuve hihta mennat nōnova; ōviy pi yan peyʼta: Pam ōveqatsit aṅqw pumuy tunösmaqa, yanʼi. 32 Pahsat pu Jesus pumuy amumi paṅqawu: Pas antsaa, pas antsa nu umumi paṅqawni: Qa Moses pút pölavikit ōveqatsit aṅqw umuy maqa; noqw Ina hapi pas antsa pölavikit ōveqatsit aṅqwnihqat umuy maqa. 33 Pi ōveqatsit aṅqw hawhqa hapi God aṅqw pölavikit anta, pam hapi sinmuy qatsit huylawu. 34 Pahsat pu puma put aw paṅqaqwa: Tutuyqawhqa, um okiw sutsep itamuy it pölavikit huylawni. 35 Noqw Jesus amumi paṅqawu: Nu hapi pölaviki hakiy qatsit máqaṅwuqa; inumi pítuhqa soon hisat tsöṅmokni, pu inumi tuptsiwhqa soon hisat pānaqmokni. 36 Noqw pi nu ura umumi paṅqawu: Uma as inumi yórikyak̇ahk̇aṅw qa tūtuptsiwa. 37 Sohsoyam Inay aṅqw inumi noiwyaqam inumiyani, noqw ason hak inuminiqw, soon nu put ayo tūvani. 38 Nu qa nāp itunatyay hintsakniqe ōveqatsit aṅqw hāwi, nu Inay nuy aṅqw távihqat tunatyayat hintsakniqe ōviyʼo. 39 Noqw iʼ hapi Inay nuy aṅqw távihqat tunatyaata: Nu sohsokmuy hakimuy put ahpiy inumi noiwyaqamuy qa hihtawat kwayht, nuhtuṅk talöṅvaqat ep pumuy ahoy tātaynani. 40 Noqw iʼ hapi nuy aṅqw távihqat tunatyaata: Sohsoyam Tiyat aw yórikyak̇ahk̇aṅw, put aw tūtuptsiwaqam qatsit qasoʼtaqat makiwyani; noqw nu nuhtuṅk talöṅvaqat ep pumuy ahoy tātaynani. 41 Pahsat pu Jew-sinom put aw qayan unaṅway hiṅqaqwa, pam pölaviki ōveqatsit aṅqw hawhqey ura paṅqawhq ōviyʼo. 42 Nihqe puma paṅqaqwa: Ya qa iʼ Jesus, it Joseph tíata? Itam put náyat-nik̇aṅw pu yuyat pumuy tuwiʼyuṅwa. Noqw ya hintaqw ōviy pam ōveqatsit aṅqw hawhqey paṅqawlawu? 43 Noqw ōviy Jesus lavayhtiqe amumi paṅqawu: Uma qa nānahpaʼ qaán umuhʼunaṅway hiṅqaqwani. 44 Pas Ina nuy aṅqw távihqa hakiy pan unaṅwtoynaqw, pam-sa inumini; noqw nu nuhtuṅk talöṅvaqat ep put ahoy tātaynani. 45 Pi ura God lavayʼaymuyatuy pēniyamuy aṅ yan peyʼta: Pu puma sohsoyam God aṅqw tutuqayyani, yanʼi. Paniqw ōviy sohsoyam Inay aṅqw nanaptak̇aṅw pu tūqayyaqam inumi ökiwta. 46 Pay k̇a hak hisat Inay aw yórikqat nu qa paṅqawu, hal iʼ hak God aṅqw pítuhqa, pam-sa Inay aw yórikiʼta. 47 Pas antsaa, pas antsa nu umumi paṅqawni: Inumi tuptsiwhqa hapi qatsit qasoʼtaqat pay makiwayʼta. 48 Nu hapi pölaviki sinmuy qatsit máqaṅwuqa. 49 Pay as pi umanam qayēsiwhpuve hihta mennat nȫnösat, pay qa yēse. 50 Nu hapi iʼ pölaviki ōveqatsit aṅqw hawhqa, it pölavikit aṅqw nösqa qa mokniqat ōviyʼo. 51 Nu hapi taytaqa pölaviki ōveqatsit aṅqw hāwi; it pölavikit aṅqw nösqa sutsep qátuni. Noqw nu pölavikit lavayhtiqe itokoy paṅqawu; put hapi nu sinmuy amuṅem távini, puma yesniqat ōviyʼo. 52 Noqw ōviy Jew-sinom put ep nāṅwuyʼyuṅqe, paṅqaqwa: Ya sen iʼ hin itamuy tokoy nopnani? 53 Pahsat pu Jesus amumi paṅqawu: Pas antsaa, pas antsa nu umumi paṅqawni: Pas uma Sinot Tiyat tokoyat qa nȫnösak̇aṅw, pu put uṅwáyat qa hikwyeʼ uma umuhʼunaṅwpeq qatsit ṅastayani. 54 Itokoy tūmoytak̇aṅw, pu iuṅway hīhikwqa hapi qatsit qa soʼtaqat pay himuyʼta, noqw nu nuhtuṅk talöṅvaqat ep put ahoy tātaynani. 55 Pi itoko pas antsa nȫsiwhqa, pu iuṅwa pas antsa hīhikwaqa. 56 Itokoy tūmoytak̇aṅw pu iuṅway hīhikwqa inuhpe qatu; noqw nu put ep qatu. 57 Pi Ina qátuhqa nuy aṅqw tavi; noqw nu put ahpiy qatu; noqw pay pan hapi hak nuy tūmoytaqa nuy akw qátuni. 58 Iʼ hapi pám himu pölaviki ōveqatsit aṅqw hāwi; pam it mennat umunamuy amuhpiy nȫsiwhqat qa panta; ura puma put aṅqw nȫnösat, pay qa sutsep yēse. It pölavikit aṅqw nösqa hapi pas sutsep qátuni. 59 Pam Capernaum ep tsotsvalkive sinmuy tutuqaynak̇aṅw, yan lavayhti.

The Words of Eternal Life

60 Noqw ōviy k̇aysiwhqam put aw nánatuwnayaqam it nanaptaqe paṅqaqwa: Pam hihta pas nuhtselʼewakw itamuy tutuqayna; ya sen hak aṅ kuytani? kitota. 61 Noqw put aw nánatuwnayaqam it ep qaanʼunaṅway hiṅqaqwaqw, Jesus unaṅwpeq navotiʼtaqe, amumi paṅqawu: Ya iʼ umumi qalomátöqti? 62 Noqw tis kurs k̇a nu Sinot Tiat ōveqatsit ep qátuṅwuqey aqw wuptoqw, uma aw yórikyeʼ, pahsat uma hin wūwayani? 63 Pi Hikwsi hapi hakiy taytoynaṅwu; hakiy tokoat qa hihta ápiniṅwu; nu umumi hihta lavayhtiqw, pam pantaqa hikwsit aṅqwnihqe sinmuy qatsíhuylawu. 64 Noqw pi uma haqawat qa tūtuptsiwa. Pi hakim put aw qa tuptsiwniʼyuṅqat Jesus pay navotiʼta, pu hak momṅwituy amumi put mātapniqata. Pam sinmuy tutuqaynativaqey aṅqaqw pūvut sohsok navotiʼta. 65 Pahsat pu pam paṅqawu: Paniqw hapi ōviy nu ura umumi paṅqawu: Pas Ina hakiy qa pan unaṅwtoynaqw, soon pam hak inumini. 66 Yantaqat atsve put aw nánatuwnayamuy amuṅaqw wūhaqnihqam put mātatve; nihqe pāpu qa amum hinnumya. 67 Noqw pahsat pu Jesus imuy pakwt lȫq sihk̇ayʼtaqamuy amumi paṅqawu: Noqw ya uma nuhtum inuṅaqw ahpiyyani? 68 Noqw pahsat pu Simon Peter lavayhtiqe paṅqawu: Tutuyqawhqa, noqw itam hakiy awyani? Pi um pi lavayit qatsit qasoʼtaqat aniwnaqat lalvaya. 69 Noqw pay itam tūtuptsiwaqe, um pas pam hak Christ God qátuhqat Tíatnihqat qapēvewnaya. 70 Noqw Jesus amumi paṅqawu: Ya nu umuy pakwt lȫq sihk̇ayʼtaqamuy qa namorsta? Noqw uma haqawa Nukpanat akw tuyqawiwta. 71 Pam hakiy Simon tiyat Judas Iscariot paṅqawu. Pam hapi as imuy pakwt lȫq sihk̇ayʼtaqamuy amumum tōnawk̇aṅw Jesus momṅwituy amumi mātapniniqw ōviyʼo.