Acts
More Persecution
12 Noqw ephaqam moṅwi Herod Jesus aw tōnawtaqamuy haqawatuy hintsanniqe amumi mayʼta, 2 Nihqe pam John pāvayat James sipwuvahpit akw nīna. 3 Noqw kurs pam panhtiqe, Jew-sinmuy unaṅwve hinhtiqey navotqe, pahsat piw Peter ṅuaniqey anhti. (Noqw qapek̇énʼoyiwhput ep nōviwniqat aw pitsíwiwta.) 4 Pu ōviy pam put ṅúahqe, sivikimi pánahqe, solāwamuy nālöp nānalöqmuy tōnawtaqamuy amumi put mātavi, put tūtuwalaniqat ōviyʼo, ason pay pas Amutsva Yūmosanihqat ep nóviwniqat yukiltiqw, pep pu sinmuy amumi put hóroknaniqey tunatyawtaqee. 5 Noqw ōviy puma Peter sivikive paniʼyuṅwa. Noqw Jesus aw tōnawtaqam put eṅem God aw nāwakintotaqe qa nātusiʼyuṅwa.
Peter Set Free from Prison
6 Pu Herod qāvo put hóroknaniqey ep mihiqw, Peter lȫqmuy sivanamiqlölöt akw sómiwk̇aṅw lȫqmuy solāwatuy amuhtsava pūwi; noqw tuwalanʼaʼyat ihpaq tūtuwala. 7 Noqw meh, Tutuyqawhqat hoṅviayaat pituqw, sivikive sohsovik tālawva; noqw pam Peter sutsṅaqwat pálaknaqe, put tātaynat, aw paṅqawu: Suqtuptuu. Noqw sivanamiqlölö put māyat aṅqw löhö. 8 Noqw hoṅviaya put aw paṅqawu: Kwewhtat totsvakii; noqw pam panhti. Pu pam paṅqawu: Um usíhtat, inuṅkni. 9 Noqw pam yámakqe put aṅkʼi; nihqe pay pas antsa hoṅviaya put pantsanhqat pam qa suyan navotiʼma; suhpan pay tūawtaqey pam wūwanma. 10 Noqw puma mohpeq tūwalaqamuy-nik̇aṅw pu amuṅk tūwalaqamuy amuhpiy ruhpakqe, kīmi hötsíwat aqw sivauutspit aw pituqw, pam nāp amumi hötsílti. Noqw pam paṅqw yámakqe, haqeʼ kisk̇at aṅ yamakq, pahsat pu hoṅviaya put aṅqw ahpiyʼo. 11 Noqw Peter suyan unaṅwtiqe paṅqawu: Puʼ hapi nu pas suyan navotiʼtaqw, pay kurs pas antsa Tutuyqawhqa hoṅviayay ayataqe, nuy Herod māyat aṅqw ayo tavi, pu Jew-sinom nuy hintsatsnayaniqey tunatyawyuṅqat aṅqʼö. 12 Pu ōviy pam it aṅ pās wūwaqe, pahsat pu hakiy John, Mark yan piw mātsiwhqat yuyat Maryt kīyat awʼi, noqw k̇aysiwhqam pep tsovawk̇aṅw nānawakna. 13 Noqw Peter ihk̇aqe ṅö́yakiwtaqat ep hötsíwat aw pöṅö́ṅöykinaqw, hak māna Rhoda yan mātsiwhqa put aqw kuyvato. 14 Nihqe pam Peter töṅayat māmatsqe, pas hin unaṅwtiqe aqw qa hötat, ahpami wárikqe, Peter hötsíwhpeq wúnuhqat pumuy āawna. 15 Noqw puma aw paṅqaqwa: Um qa navotiʼnuma. Noqw pam qatūqayk̇aṅw, pas antsa Peter pep wúnuhqat amumi paṅqawu. Noqw pahsat puma paṅqaqwa: Pay soon qa put tumalayʼmaqa hoṅviayani. 16 Noqw pas Peter pöṅö́ṅöytoynaqw, ōviy puma aqw hötayaqe, put aw tātayyaqe, pas hin unaṅwtoti. 17 Noqw pay puma qa hiṅqaqwaniqat pam amumi māmasaqw, pahsat pu Tutuyqawhqa hin put sivikiṅaqw hóroknaqat pam pumuy amumi lalvaya; nihqe paṅqawu: Uma īit yantaqat James aw tūawwisni, pu tuptsiwniʼyunqamuy amumii, kita; nit paṅqw ahpiynihqe haqamiwat awʼi. 18 Pu ōviy panis tālawvaqw, pas solāwam hin unaṅwtoti, Peter kurs haqaminiqw ōviyʼo. 19 Noqw as Herod put hept, qa túwahqe tūtuwalaqamuy amumi put ep hēva; nihqe pay pas puma soʼniqat paṅqawu. Panhtit pam Judeat aṅqw Caesareat aqwnihqe, pepeq huruhti.
The Death of Herod
20 Noqw Herod Tyre-nik̇aṅw pu Sidon ep sinmuy amumi hihta ep qayan unaṅwayʼta; noqw puma sun unaṅway put aw ö́kihqe, hakiy pas moṅwit tumalayʼtaqat Blastus yan mātsiwhqat pan unaṅwtoynayaqe, puma nānami qahin unaṅwayʼyuṅwniqat moṅwit aw nānawakna, puma pep tutskwat ep sinom moṅwit tutskwayat aṅqw nōnovaqe ōviyʼo. 21 Noqw hisat aw talöṅvaqw, Herod pavan pas moṅwyuwsiʼk̇aṅw moṅwʼatsveway ep qatuptuqe, pahsat pu sinmuy amumi pavan pas lavayhtuwiy pan yuaayku. 22 Noqw sinom sáakmaqe paṅqaqwa: Pas pam pavan hihta tönaata, qa sínota. 23 Noqw pahsat pay Tutuyqawhqat hoṅviayaat put wuvahta, pam God qa hihtataqw ōviyʼo; noqw pam āvutiqe súlawhti. 24 Noqw tuwat God lavayiat öqawhtaqe, suyhtsepṅwat aṅqeʼ kúrukiwma. 25 Noqw Barnabas Saul amum hin ayatiwhqey yúkuhqe, hakiy John, piw Mark yan mātsiwhqat wikk̇aṅw, Jerusalem aṅqw ahoy pitu.