Acts
Paul Accused by the Jews
24 Pu ahpiy tsivót-sikis talq God awwat mohpeq moṅwi Ananias wukwʼaʼyatuy tsamk̇aṅw pitu, hakiy lavayhtuwiʼtaqat Tertullus yan mātsiwhqat wikk̇aṅwo; noqw pam tutskwat ep moṅwit aw yuaayku Paul ehpewii. 2 Pu ōviy Paul tuṅwáyaqw, pahsat Tertullus put ehpewi yuaaykuqe paṅqawu: Itam hapi uhpiy uyiwawtaqat qatsit nāvok̇awinta, pu sohsovik sutsep uhtunatyay ahpiy himu qaöwíhintaqa imuy sinmuy amuṅem hintsatskiwa. 3 Noqw itam put tsúyakiwyuṅwa, um hak pas pavan Felix. 4 Noqw pay nu ūmi qa susʼitsniqat ōviy um as okiw hihsavo itamumi tūqaytani. 5 Taq itam it tāqat aw nanaptaqw, iʼ sokovi. Pam it Nazareth aṅqw tāqat aw tōnawtaqamuy moṅwíamu. Noqw put atsviy tūwaqatsit aṅ ahsupoq Jew-sinom Caesar ehpewi hoṅvanta. 6 Pu hikis pi as ōviy iʼ piw God kīyat sokoptaniqey anhti; noqw itam put ṅuayaqe, soon as itamumi hin tutaptiwhqat qa anwat put hin yukunayani. 7 Noqw pay mohpeq solāwamoṅwi Lysias itamumi suptuqe, öqalay akw put itamuy nawhki, 8 Nihqe hihta put nēveltotoynayaqam ūmiyaniqat paṅqawu. Noqw um nāp put aw pohteʼ, itam hihta put qalománeveltotoynayaqat sohsok navotni. 9 Noqw Jew-sinom put amum sunyaqe, pay pas pantaqat paṅqaqwa.
Paulʼs Defense before Felix
10 Pahsat pu moṅwi Paul yuaaykuniqat aw māmasaqw, pam lavayhtiqe paṅqawu: Nuʼ navotiʼtaqw um hisatṅahaqaqw imuy sinmuy amuṅem hihta aṅ hin wūwanma, noqw ōviy nu tuwat hahlayk̇aṅw, nēṅem hin lavayhtini. 11 Ispi um it navotniqʼö, nu okiwlawniqe Jerusalem aqwniqw, nāt puʼ ahpiy pakwt lȫq sihk̇ayʼtasikis tāla. 12 Piw nu qa haqam hakiy amum nāṅwuyʼtaqw puma inumi tāyuṅwa, pu sinmuy hin uʼnaṅwnaqʼö, sen God kīyat epʼe, sen tsotsvalkivee, sen pay kīvee. 13 Piw puma hihta nuy tsotsk̇anayaqey soon suyan paṅqaqwani. 14 Nīk̇aṅw it pay nu ūmi pas súaṅqawni: Nu hapi púmuyniqw qasuan God aw nāwakinma, iwuʼyamuy aw yantaqayamuy awʼi, tutavot aṅ hin peyʼtaqat, pu God lavayʼaymuyatuy pēniyamuy aṅ hin peyʼtaqat sohsok tuptsiwniʼk̇aṅwo. 15 Nihqe ima súanyuṅqam, pu qasuanyuṅqam soʼpum ahoy tātayyaniqat, nu ep God qapēvewna; noqw pay puma piw put pantaqat lavayta. 16 Paniqw hapi ōviy nu yūmosa suyan unaṅwayʼtaniqey tuwanlawu, qa hihta ep qaanhtiqey navotiʼtaqee, sen God epʼe, sen sinmuy amuhpee. 17 Pu ahpiy wūhakis yahsaṅwvaqw, nu isinmuy amumi ahoy pitu, hihta akw ōkwatuwiwyaniqat kuwahtiwhqat-nik̇aṅw, pu Tutuyqawhqat aw himu noiwhqat yank̇aṅwo. 18 Pantaqat atsve hakim Asiat aṅqw Jew-sinom nuy God kīyat ep napwataqw tutwa, nu qa k̇aysiwhqamuy sinmuy amumumniqʼö, piw hin qaqtsinayaqamuy amumuma. 19 Puma pi as yep utpipyeʼ, rohomtotinik̇ahk̇aṅwo, kurs hihta inuhpewi hinyuṅwee. 20 Hal pay pi ima yepyaqam paṅqaqwani, nāt nu moṅwtsovawtaqamuy amutpip wunuqw hihta inumi qalomátutwee. 21 Hal sen pi nu amuhsonve wunuk̇aṅw it supwat paṅqawhqat epʼe: Nu hapi soʼpum ahoy tātayyaniqat tuptsiwniʼtaqey ep puʼ it tāwat ep umuhpiy hin tūviṅtiwa, kítahqat epʼe. 22 Noqw Felix it navotqe, paṅwat pöhut pas suan navotiʼtaqe pumuy pay hāktaqe amumi paṅqawu: Ason mohpeq solāwamoṅwi Lysias pituqw, nu uṅ hinhtiqat pas sohsok navotni. 23 Pu tsivot-sikip sunat solāwamuy amumi moṅwi Paul taviʼtaniqat pam put aw paṅqawu. Nīk̇aṅw pay qa pas pas hūrs taviʼtat, pay tuwimat hihta akw put paaṅwayaniqw, sen put awyaniqw, pam pumuy qa mēwantani.
Paul before Felix and Drusilla
24 Noqw ahpiy hihsakis talq Felix hakiy Jew-sinot nȫmay Drusillat amum pitu; nihqe Paul wáṅwayhqe, Christ aw qapēvewnit put ahpiy aw tūqayta. 25 Noqw Paul put aw paṅqawu: Itam soon qa suan hinwiseʼ, namituyqawiʼyuṅwni. Taq God itamuṅem hin yúkuni. Noqw Paul yan yuaataqw, Felix tsawnaqe, tururuyku; nihqe paṅqawu: Pay um hāk puʼ ahpiyni; ason hisat inuṅem aw lomahinhtiqw, nu uṅ wáṅwayni, kita Paul awʼi. 26 Noqw as sakiqw Paul put sīvat maqaqw pam put mātapniqey wūwanta. Nihqe ōviy pam piép put wáṅwayeʼ, amum yuaataṅwu. 27 Noqw pay ahpiy lȫs yahsaṅwvaqw, Porcius Festus Felix qeniyat ep paki; noqw Felix Jew-sinmuy tayawnaniqey nāwaknaqe, Paul nāto sómiwtaqw ahpiyʼo.