Acts
The Lame Man Healed
3 Noqw hísatniqw nānawaknaṅwuniqw, tāwat atvelpeniqw, Peter John amum God kīyat aqwʼa. 2 Noqw hakim hakiy tāqat tihtiwhpuy aṅqaqw tuhapiwtaqat tsöpwisa; puma nāqavo God kīyat aw hötsíwat Lomasniwa yan túṅwantiwhqat epeq put tahtapya, pam God kīyat aw yuṅtaqamuy amumi okiw hihta tuṅlaytaniqat ōviyʼo. 3 Noqw ōviy pam Peter-nik̇aṅw pu John pumuy God kīyat aw pakitoqw túwahqe, amumi hihta tuhtui. 4 Noqw Peter John amum put aw taynumt, aw paṅqawu: Kurs itamumi tātayii. 5 Noqw pam pumuy amuṅaqw hihta makiwniqey wūwank̇aṅw, amumi-sa tayta. 6 Pahsat pu Peter paṅqawu: Nu sīvat ṅastaa; nīk̇aṅw nu hihta himuyʼtaqw uṅ máqani; nu Jesus Christ natṅwaniyat aw yank̇aṅw ūmi paṅqawni: Wunuptut nakwsuu, kitat, 7 Put putvaqw māyat ṅuat, wunuptsinaqw, pahsat pay put kukʼat, pu kuktupk̇aqe hoṅviti. 8 Noqw pam suṅwnuptut, nakwsuqe, pumuy amumum God kīyat aw paki, waymak̇aṅw, tsoʼtik̇aṅw, God pas hihtalawk̇aṅwo. 9 Noqw pam waymak̇aṅw God hihtalawhq sinom sohsoyam aw tāyuṅwa. 10 Noqw puma māmatsyaqw, pay as pam God kīyat aw hötsíwat Lomasniwa yan túṅwantiwhqat epeq qatuk̇aṅw, nuhtumi hihta tuṅlayʼtaṅwu; noqw pam hintsaniwhqat ep puma kātayuṅqe, hin kurs wūwaya.
Peterʼs Message in the Temple
11 Noqw tāqa tuhapʼiwtaṅwuqa powatiqa Peter John enaṅ hūrs ṅuyʼtaqw, sinom haqam Solomon Tuhööata yan mātsiwhqat aw sohsoyam pumuy amumi yuyutya. 12 Noqw kurs sinom kātayuṅqw, Peter māmatsqe, amumi paṅqawu: Uma Israel-sinom tahtaqtu, ya uma hinoqw it ep pas kātayuṅwa? Ya uma hinoqw pas itamumi-sa tāyuṅwa suhpan k̇a itam pas nāp itahʼöqalay, pu itahlomaqatsiy ahpiy it nakwsunaqat panʼi. 13 Iʼ hapi hak Abraham, pu Isaac, pu Jacob itahwuʼyamuy aw yantaqaam, God Tiy Jesus pas pavan sinota. Put hapi uma Pilate aw mātatveqe qa putyaniqey atpip paṅqaqwa, pas as pam put mātapniqey suʼqawtaqʼö, 14 Nihqe uma it hakiy Qahováriwtaqat, pu Súantaqat qa nānakwhaqe, tuwat soq hak hakiy nīnaqat umumi noiwniqat uma nānawakna; 15 Nihqe Qatsit aw Tūtsamhqat nīnaya; noqw God put soʼpumuy amuṅaqw ahoy tātayna; noqw itam hapi it pas suyan aw yórikiʼta. 16 Noqw iʼ tāqa put natṅwaniyat qapēvewnaqe, put natṅwaniyat aw yank̇aṅw hoṅvita. Uma hapi put aw tāyuṅwa, piw put tuwiʼyuṅwa. Pay pas panta. Pam Jesus aw tuptsiwniʼk̇aṅw sohsokmuy umutpik pās powiwk̇aṅw wunu. 17 Noqw taay, isinomu, pay nu navotiʼtaqw uma hintsatsk̇aqey qa mātsiʼyunwa, umuhmomṅwituy amunʼi. 18 Noqw pay hapi God sohsokmuy lavayʼaymuy moayamuy ahpiy hin hintaniqat lavaytiqey aw antsana, ura Christ okiwsaniwniqat pam kita. 19 Oviy uma umuhtunatyay aṅqw lasyeʼ, God aw lasyani; noqw umuhqaanhtipu umuhpiy ayo hȫniwni, noqw Tutuyqawhqa umuy suyan unaṅwtoynani. 20 Noqw pam Jesus Christ, umumi mohti yuaatiwhqat aṅqw tavini. 21 Put hapi ōveqatsit pas pay soon qa kwúsuni, hisat sohsoy himu ahoy pūhutiniqat aw pahsavoo. Put hapi ura God qatsit yayhniwhqat pahpiy sohsokmuy pas hihtuy lavayʼaymuy amuhpiy lavayhti. 22 Ura Moses itanamuy amumi pas suyan paṅqawu: God Umuhtutuyqawhqa umuhsinomuy amuṅaqw umuṅem lavayʼayay wunuptsinani, nuy hímunihqat panʼi. Ason pam umumi hin lavayhtiqw, uma sohsok aṅ aw tūqayyuṅwni. 23 Pu ason hak haqam put lavayʼayat aw qa tuqayvastaqa hapi sinmuy amuṅaqw súlawhtimantani. 24 Owí, pi sohsoyam God lavayʼaymat, Samuel ahpiy hihsaʼnihqam lavayhtotiqam yepehaq hin hintaniqat lavayhtoti. 25 Uma hapi God lavayʼaymuyatuy timatu, pu itanamuy amumi God pasiwniyat oyiʼyuṅqamu; ura pam Abraham aw paṅqawu: Pu ason hapi uhnatkoy ep tūwaqatsit aṅ sopk̇awtaqam sinom hahlayhpit ep ö́kini. 26 Noqw God hapi Tiy Jesus ahoy tātaynaqe umumi put mohti hōna, umuhnukpanay aṅqw umuy lasneʼ, hahlayhpit aw umuy ökinaniqe ōviyʼo.