1 Corinthians
Warning against Idols
10 Pu pīwu, itupkomu, pay uma it navotiʼyuṅwniqat nu nāwakna: Ura itanam sohsoyam ōmawuy atpik̇aqeya; pu sohsoyam wuhkovatuphat aṅqeʼ nöṅa. 2 Pu puma sohsoyam ōmawuy akw Moses aw tuvoylatoti, pu wuhkovatuphat akwʼa. 3 Nihqe puma sohsoyam nȫsiwhqat God aṅqwnihqat aṅqw nȫnösa. 4 Pu sohsoyam kūyit God aṅqwnihqat aṅqw hikwya. Pi puma owat hihta tuawiʼtaqat aṅqw hikwya. Pam owa Christ tuawiʼta. Noqw pam suyan pumuy amumum hinma. 5 Noqw pi ura God pumuy amuṅaqw k̇aysiwhqamuy amuhpe qa salayhti; ōviypi ura puma qayēsiwhpuvehaqam wuhko soa. 6 Noqw iʼ yantaqa hapi itamuy uʼnantoyna, itam aṅ hihta qalomáhinyuṅqat qa aw kwaṅwátayyuṅwniqat ōviyʼo, panhtotiqamuy qa amun hinhtotini. 7 Piw ura pumuy amuṅaqw haqawat nāp yukit aw nāwakintotaqw, uma qa pumuy amún hintsatsk̇ani. Taq ura yan peyʼta: Sinom aṅ yesvat nōnova, pu piw hīhikwya, pu pahsat hoṅvaqe tīvantiva. 8 Pu itam qa amún nuvöqatsit tumalayʼyuṅwni. Ura pumuy amuṅaqw haqawat pantsatsk̇aqe sūkw tāwat ep sunat aṅqw payhkomuy sihk̇ayʼtasikip sōmorit pahsaʼnihqam súlawhti. 9 Pu itam qa Christ puhtsemokintotani, ura pumuy amuṅaqw haqawat panhtotiqamuy qa amunhtotini. Taq puma panhtotiqe tsūtsuʼtuy amuhpiy soa. 10 Pu uma piw pay qa yan umuhʼunaṅway hiṅqaqwani, ura pumuy amuṅaqw haqawat panhtotiqamuy qa amunhtotini; taq puma panhtotiqw, God hoṅviayay ayataqw, pam pumuy qöya. 11 Noqw as sinom pumuy amuhpiy hihta tuwiʼvayaniqat ōviy puma it sohsok hihta aṅ kūkuyva. Noqw itamuy soʼṅwamiq ökiwisqamuy uʼnantoynaniqe ōviy pāvam pēniwa. 12 Paniqw ōviy pay hūrs wúnuhqey namiwuwantaqa tunatyaltimantani; taq nāp hisat ūnateʼ, pam múnukni. 13 Pay qa hak hihta alöṅöt akw unaheviwhqey wūwantani, ispi wūhaknihqam pay pan hapi unaheviwyaqʼö. Pi God soon lavayiy qa an hinmani; nihqe pam hakiy öqaltaqw, soon unaheppi hakiy epnihqe öqalayʼtani. Pi God hin ayo yámakniqat hakiy āawnaqw, hak unaheppit aṅ kuyvani. 14 Noqw ōviyʼo aw iunaṅwamu, uma nāp yukit aw nāwakintiwhqat pas qeʼyani. 15 Nu hapi pās wuwniʼyuṅqamuy amumi yuaata. Uma nuy hiṅqawhqat aw wūwayani. 16 It kuyapkuyit aṅqw hahlayhpit kūyiwtaqat itam hahlayhtoteʼ, itam soñawnen Christ uṅwáyat aṅqw sūp hikwyaṅwu. Pu itam pölavikit yóṅoyhtoteʼ, itam Christ tokoyat aṅqw sūp nȫnösaṅwu. 17 Pay as pi itam k̇aysiwhqamyak̇ahk̇aṅw sūkw pölavikit anyuṅwa, piw sūkw tokot anyuṅwa. Pi itam sohsoyam put sūkw pölavikit aṅqw nōnova. 18 Kurs uma yep qatsit ep Israel-sinmuy amumi wūwayani. Ya ima homʼoyit aṅqw nōnovaqam God homʼoyvihk̇ayat qa amum God aw nāwakintiwisa? 19 Ya nu hihta paṅqawu: Sen pi nāp yuki pas antsa hímunihqat, sen nāp yukit aw himu noiwhqa pas antsa hímunihqat nu paṅqawu? Qae. 20 Nu hapi paṅqawu: Ima qa-Jew-sinom hihta homʼoʼyeʼ, puma nukpanhihikwsimuy amumi put homʼoʼyaṅwu, qa God awʼi. Noqw uma nukpanhihikwsimuy amumum hintsatsk̇aniqat nu qa nāwakna. 21 Soon uma Tutuyqawhqat kuyapkuyiyat nukpanhihikwsimuy kuyapkuyiyamuy enaṅ hīhikwyani. Soon uma Tutuyqawhqat tunösvoñayat nukpanhihikwsimuy tunösvoñayamuy enaṅ nōnovani. 22 Ya sen itam Tutuyqawhqat puvuhtsemoqnayani? Ya sen itam put epnihqe öʼqaltu? 23 Pay as nu hihta hinhtiniqw pam sohsoy k̇a inumi súanta, nīk̇aṅw pay qa sohsoy nukṅwa. Pay as nu hihta hinhtiniqw pam sohsoy k̇a inumi súanta, nīk̇aṅw pay qa sohsoy hakiy öqalaṅwu. 24 Qa hak hapi nēṅem-sa hihta ōviy tunatyawtat, ayo sukw eṅem hihta lolmat tunatyawtani. 25 Uma huhyankiva hihta huhyaniwhqat nōnovani, nen umuhʼunaṅwpeq umuhsunvotiy tunatyawk̇ahk̇aṅw qa pas hihta tūviṅlalwani. 26 Pi tūwaqatsi Tutuyqawhqat himuata, pu aṅ himu hinyuṅqa. 27 Kurs qatuptsiwniʼyuṅqamuy amuṅaqw haqawa umuy tūtsamhq, uma ámumyaniqey unaṅwtoteʼ, himu umutpip poñahtiwhqat uma nōnovamantani, qa tūviṅlalwak̇ahk̇aṅw umuhʼunaṅwpeq umuhsunvotiy tunatyawk̇ahk̇aṅwo. 28 Nīk̇aṅw ason kurs haqawa put nāp yukit aw noiwhqat umumi kitaqw, pay uma qa aṅqw nȫnösamantani, umuy āawanaqat k̇aptsiʼtotaniqe ōviyʼo, put unaṅwpeq sunvotiyat tunatyawk̇ahk̇aṅwo. Pi tūwaqatsi Tutuyqawhqat himuata, pu aṅ himu hinyuṅqa. 29 Nu uhʼunaṅwpeq uhsunvotiy qa kitat, ayam sukwat unaṅwpeq sunvotiyat nu kita. Noqw hak k̇a inumi paṅqawni: Pi nu qenive wunuk̇aṅw hihta tūmoytaqw, ya hinoqw ayam suk̇a pas nāp unaṅwpeq sunvotiy ahpiy nuy ōvelantani? 30 Pi nu put ep God aw hahlayhtit, put aṅqw nösṅwu. Noqw ya hinhtiqw ōviy nu put ep hahlayhtiqw ayam suhk̇a pas nāt piw put ep inumiq qalomáhiṅqawni? kítani. 31 K̇a pi panta. Nīk̇aṅw um as God tayawniwniqat ōviy sohsok hintsakmantani, sen um tūmoytani, sen um hikwni, sen pay nāp hihta hintsakni. 32 Uma qa hakiy unaṅwmoknayani, imuy Jew-sinmuyu, pu pay qa-Jew-sinmuyu, pu imuy God aw tōnawtaqamuyu. 33 Nu tuwat sohsokmuy hihta aṅ ahsupoq unaṅwve mamavisqe qa nēṅem hihta tunatyawtat, as k̇aysiwhqamuy hihta akw moṅwvasyeʼ ayo nö́ṅakniqat ōviy amuṅem tunatyawta.