James
Warning against Prejudice
2 Itupkomu, uma qa sinonunuiṅhtni, kurs uma Itahtutuyqawhqay Jesus Christ pas k̇aptsitiwhqat aw tuptsiwniʼyuṅwee. 2 Kurs hak tāqa sik̇avalasivat taṅapsomk̇aṅw, lomayuwsiʼtaqa umuhtsotsvalkimi pakiqw, pu piw hak tāqa hinʼewakw yuwsiʼtaqa ep pákini. 3 Noqw kurs uma it lomayuwsiʼtaqat-sa aw unaṅwtapyeʼ haqam nukṅwat ep qatuptuniqat put aw paṅqaqwat, it ōokiwhqat aw paṅqaqwani: Pay um pep wúnuni, sen, Pay um yep iwuwukpiy aqlap qatuptuni, kitotani. 4 Kurs uma panhtoteʼ pay qa suan wūwantotani. Soq uma sinmuy tsīk̇antotani; nihqe qalomáʼnaṅwayʼk̇ahk̇aṅw, hakiy eṅem hin yuykuyaṅwu. 5 Kurs inumi tuqayvastotaa, aw iunaṅwam itupkomu. God yep qatsit ep aṅ okiwyaqamuy namorstaqe, pumuy moṅwtunatyay máqaniqey tunatyawta. Pay qa panta? Sam pi pan hapi pam put aw unaṅwayʼyuṅqamuy awiniʼta. 6 Noqw uma soq it ōokiwhqat qa hihtatota. Puyaw qa k̇ahaksinom umuy sóontsahtsanyak̇aṅw momṅwituy amumi umuy lölökinlalwa? 7 Puyaw qa puma umuhnatṅwaniy qa hihtalalwa, it natṅwanit pas hihk̇ayʼtaqat akw uma túṅwantiwyaqata? 8 Ura iʼ pas pavan tutavo tutuvenit aṅ peyʼta: Um hin pas nāmi unaṅwayʼtaqey pan uhsinosṅway aw unaṅwayʼtani, yanʼi. Noqw ōviy kurs uma put anhtoteʼ súanhtotini. 9 Nīk̇aṅw kurs uma qa sohsokmuy sun ōoyyeʼ, pay pan hapi uma qaanhtotini; nihqe mewnit qa tuqayvastoteʼ, panwat hin hinwisniqat tutavot ahpiy hin yukuniwyani. 10 Pi hak pay as sohsok tutavot aṅ hinmak̇aṅw, sūp haqam put ep qaanhteʼ, pay hapi sohsok ep qaanhtiṅwu. 11 Pi iʼ hak hakiy tokot qa sokoptaniqat kítahqa piw hak hakiy qa nīnaniqat kita. Noqw ōviy pay as kurs um tokot qa sokoptak̇aṅw hakiy nīneʼ, pay hapi um tutavot qa k̇aptsiʼta. 12 God it tutavot hakiy qenivo táviṅwuqat aṅwat itamuy hin yukunani. Noqw ōviy uma put-sa aw taywisk̇ahk̇aṅw hihta yuaatotani, piw hihta hintsatsk̇ani. 13 Pi ason hin yukiltiniqat aw pituqw, God núokwaat put itsívuyat aṅwuyʼtani. Noqw God aṅ qa núokwat tuwat soon ōkwatuwni.
Faith and Actions
14 Itupkomu, sen hak pas qapēvewniʼtaqey paṅqawk̇aṅw qa put aw hayawtaqat hinmeʼ, ya pam hin put akw moṅwvasttini? Ya sen pam qapēvewniy akw ayo yámakni? 15 Noqw kurs haqawat tuptsiwniʼyuṅqam qa yuwsiʼk̇ahk̇aṅw, nȫsiwhqat ṅastayaqw, 16 Uma haqawa amumi paṅqawni: Pay uma qa hin unaṅwayʼk̇ahk̇aṅw ninmani. Uma mukihtotit, ȫöyyani, kitat, puma hihta haqniʼyuṅqat pumuy qa huytaqw, ya hin puma put akw moṅwvastotini? 17 Noqw ōviy hak qapēvewniʼtaqey paṅqawhqa put qa aw hayawtaqat hinmeʼ, pam haktonsa qapēvewniʼtani. 18 Haqawa k̇a hakiy aw paṅqawni: Yaw um qapēvewniʼta; noqw nuʼwa hihta tumalayʼta. Taa, um uhqapēvewniy inumi mahtaknani qa hihta uhtumalay akwʼa. Noqw nuʼwa ihintsakpiy akw ituptsiwniy ūmi mahtaknani, kítani. 19 Pay God pas sūk̇anihqat um tuptsiwniʼta. Pay um súan wuwniʼta. Ima nukpanhihikwsimuy piw pan tuptsiwniʼyuṅqe maqasneve tururutoti. 20 Noqw puyaw um soon it navotni um hak anʼewakw wuwniʼtaqa sino? Sen hak qapēvewniat qa hihta apitiqw, pam haktonsa qapēvewniʼtaṅwu. 21 Ura Abraham itana homʼoyvihk̇at ep tiy Isaac homʼoyhq God put súantaqat paṅqawu. Pay qa panta? 22 Pam God aw tuptsiwniʼtaqe ōviy pan hinhti. Noqw put qapēvewniat hintsakpiyat akw aw antsaniwa. 23 Noqw tutuveni hin lavayhtiqat hapi anhti: Abraham God tuptsiwhq, God put súantaqat paṅqawu, ii. Noqw pam God kwātsiatnihqey pan túṅwantiwa. 24 Noqw ōviy hapi sino hintsakpiy ahpiy qenive wúnuṅwu, qa pas qapēvewnit akw-saa. 25 Pu iʼ hak tokoy huhyaqa, Rahab hakimuy tuawʼayhtuy pās tavit pu pay sutsvoqwat pumuy hōna. Nihqe pam hintsakpiy akw qenive wunuptu. 26 Pi hakiy tokoat qa hikwsiʼteʼ mokpuniṅwuniqw, pay hapi pan piw qapēvewni hintsakpit ṅastanen mokpuniṅwu.