James
Warning to the Rich
5 Taay, uma aṅ k̇ahaksinomu, uma pas umuhtönay aṅqeʼ tsaykitani. Taq uma nāt qahahlayhqatsit aw ökini. 2 Umuhk̇ahakhimu kwaṅwtipti; umuhyuwsi kwahyatoti. 3 Umuhsiva sohsoy sik̇aṅputi. Nihqe pam umuy tuhtualni; nen qȫhit an umuhtokoy tsohtsoʼnani. Uma soʼṅwaveq talöṅwintiwhqat ep nenṅem nihtiwhtaqat waranhtota. 4 Meh ayam hakim umuṅem höqyaqw uma pumuy ahsatiyamuy kwahanayaṅwu. Noqw Qaanʼewakw Hintaqamuy amumi Tutuyqawhqat naqvumiq tönaam töqtiqw, pumuy ahsatiam umuy tuhtualni. 5 Uma yep qatsit ep kwaṅwáewhpit yēse, qaunaṅwtalya. Pas uma nāwihtotoynaya, pas hisat qöyaniwyaniqey anʼi. 6 Uma hakiy súantaqat tūvayat nīnaya. Noqw pam umumi qa rohomhti.
Patience and Prayer
7 Noqw ōviyʼo, itupkomu, uma Tutuyqawhqat pítuniqat aw pahsavo wuhkomaqaptsiʼyuṅwni. Meh, ūyiʼtaqa tutskwaṅaqw hihta nukṅwat aniwnit ōviy maqaptsiʼtaṅwu; nen qa naṅʼekniʼtaqw, īts uyis yokvaṅwu, pu tuhoos pīwu. 8 Oviy uma qapēvewnayak̇ahk̇aṅw qa naṅʼeknayani. Taq Tutuyqawhqat pítuniqat aw hayiṅwʼiwma. 9 Uma qa nānami hinyuṅwni, itupkomu; taq nāphisat sen uma sóontsaniwyani. Meh, hakiy hin yukunaṅwuqat hötsíwmi wunu. 10 Itupkomu, uma God lavayʼaymuyatuy Tutuyqawhqat natṅwaniyat aw yank̇ahk̇aṅw yuaaykuyaqamuy amumi taywiseʼ, amumi nanawinyani. Pumuy hin k̇ānanvotpit aṅ nakwhaniʼyuṅqat pan piw uma hinwisni. 11 Meh, itamuyniqw k̇ānavotpit aṅ nakwhaniʼyuṅqam hapi pas hahlayhpit epya. Ura Job hin qa naṅʼeknaqat uma pay nanapta; nihqe Tutuyqawhqa hin put eṅem yúkuhqat uma navotiʼyuṅwa. Pi pas Tutuyqawhqa hakiy ōkwatuwṅwu, pu núokwa. 12 Nīk̇aṅwo, itupkomu, uma hapi pas tis pavan öqalat lavayit akw hihta pasiwnayaniqey qeʼyani. Uma qa ōveqatsit akw öqallavayhtotini, piw qa tūwaqatsit akwʼa, pu pay pas nāp hinwat lavayit akwʼa. Uma qa panyat, pay uma Owi, kitotaqw pantamantani, piw Qae, kitotaqw pantamantani. Taq nāphisat pi uma sóontsaniwyani. 13 Sen haqawa uma hihta ep okiwhinhteʼ, pam nāwaknani. Sen haqawa hahlayi, pam hahlaytatawlawni. 14 Sen haqawa umuṅaqw tūtuyeʼ, pam God sinomuyatuy amuṅaqw wukwʼaymuy wáṅwayni. Noqw puma Tutuyqawhqat natṅwaniyat aw yank̇ahk̇aṅw wihkuyit akw put lelwiyat, put eṅem nānawaknani. 15 Noqw puma qapēvewnayak̇ahk̇aṅw, put ōviy tūviṅtotaqw, pam qalaptuni; noqw Tutuyqawhqa put qatuptsinani, pu put qaanhtipuyat put ahpiy ayo yúkuni, kurs pam hihta ep qaanhtiqʼö. 16 Uma umuhʼöwihiniwhtipuy nānami nahostiwisni, pu uma nāhoy nenṅem nāwakinwisni; nen uma qalaptuyani. Pas haqam suan hinmaqat okiwnawakinpiat aʼnö hihta aw tuyqawiʼta. 17 Ura God lavayʼayaat Elias itamun sínonik̇aṅw itamun unaṅwayʼta. Nit pay ura pas qa yokvaniqat ōviy pam pas qa atsáyʼk̇aṅw nāwakna. Noqw ura payhkomuy yahsaṅwuy-nik̇aṅw aṅqw nāvay mūmuyawhtuy pahsavo tūwaqatsit aṅ qa yokva. 18 Nit pu piw pam nāwaknaqw, ōṅaqw yokvaqw, tutskwa hihta aniwna. 19 Itupkomu, kurs haqawa it pöhut pas antsanihqat aṅqw ayo lasq, hak put aw ahoy put wikveʼ, 20 It navotiʼtani: Iʼ hak qaanhinmaqat qasuyan tunatyayat aṅqw lasnaqa hapi mokiwuy aṅqw hakiy hikwsiyat ayo távini; nen nihtiwtaqat qaanhtipuyat nākwapnani.