Wii helft uns Yeehoowa aus hale?

1. Warom mise mer aus hale, un weer khan uns too temit helfe? (1 Pheeter 5:10)

IN TIISE xweyere letste taache, mus Yeehoowa sayn folek aus hale. Etliche sin krank xon een lang tsayt. Anere hon een keliipte im toot ferloer. Un noch anere tuun opositsyoon fon te familye orer fon te rechiirung mit mache. (Mat. 10:18, 36, 37) Say tich sicher tas ekaal ti propleem woos tuu mit machst, khan Yeehoowa tich helfe aus hale. (Lees 1 Pheeter 5:10.)a

2. Warom khene mer aus hale?

² Aus hale petayt troy tsu Yeehoowa plaype un tëm mit frooheet tiine soo kaar wën mer xwiirichkheete orer yachtung mit mache, orer wën mer fersuucht sin een sint mache. Fer aus hale, mise mer aach klaape tas ti tinge peser wëre. Meyer khene aus hale ploos wayl Yeehoowa uns “iwermeesich kraft” kept. (2 Kor. 4:7) In tiise artikel, tuun mer noo kuke 4 tinge woo Yeehoowa uns kept woo uns helfe tuun aus hale. Meyer lërne aach wii mer nutse too tefun kriin khene.

TAS KEPEET

3. Warom is tas kepeet een wuner?

³ Yeehoowa hot was wunerliches fer uns kemacht woo uns helfe khan aus hale. Opwool meyer sintiche layt sin, khene mer mit tëm xpreche un tee heert uns. (Hep. 4:16) Tenk mool: meyer khene tsu Yeehoowa peete in kwalkee xtun un iwer kwalkee sache. Eyer khan uns heere ekaal unser xprooch orer tas plats woo meyer sin, soo kaar wën mer aleen orer inkexpërt sin. (Yon. 2:1, 2; Aph. 16:25, 26) Wën mer aarich ëngstlich sin un wise net wii unser xpiirunge fer Yeehoowa aus leye, khan eyer ferxteen was mer saan wole. (Rom. 8:26, 27) Tas kepeet is wërklich een wuner.

4. Wii wise mer tas unser kepeete fer aus hale xtime mit Yeehoowa sayn wile?

⁴ In sayn Wort, lost Yeehoowa uns sicher tas “ekaal was mer ferlange, [Tee] heert uns wën tas mit sayn wile xtimt”. (1 Yo. 5:14) Soo, khene mer hilef tsu Yeehoowa ferlange fer aus hale? Sicher! Tas mache, xtimt mit tëm sayn wile. Wii wise mer tas? Yeehoowa saat tas wën mer ti proope aus hale, khan eyer een antwort fer Satanaas kepe. (Xpr. 27:11) Un noch, ti Piipel saat tas Yeehoowa wil “mit sayn kraft ti mënxe helfe woo tëm mit kans hërts liipe”. (2 Kro. 16:9) Tes weeche, meyer khene uns sicher sin tas Yeehoowa ti kraft un te wunx hot fer uns helfe aus hale. (Isa. 30:18; 41:10; Luk. 11:13)

5. Wii khan tas kepeet uns helfe friit hon? (Isayas 26:3)

⁵ Ti Piipel saat tas wën mer iwer unser soriche tsu Yeehoowa peete, tuut ‘Kot sayn friit, woo keet iwer ales woo ti mënxe ferxteen khene, unser hërtse un ketanke xitse’. (Fili. 4:7) Was wil tas saan? Ti layt woo Yeehoowa net tiine, tuun aach propleeme mit mache. Un fiile fon tëne fersuuche unerxiitliche tinge mache fer sich in ruu xpiire orer sayn propleeme ferkese. Tsum payxpiil, etliche fersuuche een sort metitatsyoon mache fer sayn ketanke leyer lose. Awer wën yemant soo was macht un sayn ketanke net mee kontroliirt, khan eyer fon te temoone influentsiirt wëre. Un tas is aarich kefeerlich. (Kuk aach Matheus 12:43-45.) Un noch, te friit woo yemant kriin khan torich tiise metitatsyoon khan net ferklaycht wëre mit te friit woo mer fon Yeehoowa kriin. Tee kept tiise friit ploos fer tëne woo uf tëm traue. Soo kaar wën se xlime situatsyoone mit mache, tuut Kot se eewich friit xenke. (Lees Isayas 26:3.)b Een aat wii eyer tas macht, is uns helfe erinere ufmuutiche tekste woo lose uns sicher tas Yeehoowa uns liipt un wil uns helfe. Tas peruycht unser hërts. (Psal. 62:1, 2)

6. Was khanst tuu in tayn kepeete tepay tuun? (Kuk aach tas pilt.)

⁶ Was khanst tuu mache? Wëns tuu een propleem host, mach tayn hërts tsu Yeehoowa uf. ‘Xmays tayn last uf tëm’ un ferlang tëm friit. (Psal. 55:22) Ferlang tëm aach kluucheet fer mit tayn propleeme um keen. (Xpr. 2:10, 11) Un ferkes net Yeehoowa in tayn kepeete tanke. (Fili. 4:6) Suuch pewaysunge tas Yeehoowa tich am helfe is aus hale un tank tëm too teweeche. Los net tas tayn propleeme tich um hale mërke ti seechen woos tuu xon host. (Psal. 16:5, 6)

KOT SAYN WORT

7. Wii khan ti Piipel xtutiire uns helfe aus hale?

⁷ Yeehoowa hot uns sayn Wort kep fer uns helfe aus hale. In te Piipel fine mer phaar tekste woo uns sicher lose tas Yeehoowa uns helfe tuut. Mërk mool ploos een payxpiil. In Matheus 6:8 hot Yeesus kesaat: “Ayre Fater wees xon was teyer praycht eep teyer es tëm ferlangt.” Yeesus khënt Yeehoowa peser wii kwalkee aner persoon. Tes weeche, hon mer khee tswayfel tas wën mer layte, wees Yeehoowa was mer prayche un tas eyer uns uf phase tuut. Ti Piipel is fol xeene ferxpreche woo uns ti neetich kraft kepe fer aus hale. (Psal. 94:19)

8. (a) Kep een payxpiil fon een piiplix funtament woo uns helfe khan aus hale. (b) Was khan uns helfe ti piiplixe funtamente erinere wën mer es prayche?

⁸ Ti piiplixe funtamente khene uns helfe aus hale. Tii kepe uns ti neetich kluucheet fer kuute ëntxlise mache. (Xpr. 2:6, 7) Tsum payxpiil, ti Piipel saat tas mer sole noo lose uns tsu fiil ketanke mache mit was im futuer pasiire khan. Xtats tas, sole mer uf Yeehoowa yeete taach traue. (Mat. 6:34) Wën mer ti Piipel yeete taach leese un too triwer noo tenke, wërts laychter ti neetiche funtamente erinere wën mer prayche een ëntxlus mache orer wise wii mit een propleem um keen.

9. Wii tuun ti kexichte fon Yeehoowa sayn troye tiiner uns helfe?

⁹ In te Piipel, fine mer aach ti kexichte fon keweenliche layt woo uf Yeehoowa ketraut un tëm sayn hilef kriit hon. (Hep. 11:32-34; Tya. 5:17) Wën meyer too triwer noo tenke, ferxtërke mer unser klaape tas Yeehoowa “is unser sicher plats un unser kraft, een hilef woo in unruyche tsayte laycht kefun wërt”. (Psal. 46:1) Wën mer tenke iwer wii Yeehoowa sayn tiiner klaape un persewerans ketsaycht hon, sin mer uf kemuut tëne noo mache. (Tya. 5:10, 11)

10. Wii khanst tuu nutse fon Kot sayn Wort kriin?

¹⁰ Was khanst tuu mache? Lees ti Piipel yeete taach un mach een list mit tekste woo tich perseenlich helfe tuun. Fiile leese te tekst un te komentaar im piichelche Tuu ti Piipel yeete taach unersuuche moynts frii. Tas helft tëne aan was ufmuutiches tenke torich te taach. Tas is was keholef hot een xwester woo Mariec heest wii sayn eltere kreps kriit hon. Was hot Maria keholef aus hale wii se sayn eltere uf kephast hot in te moonate foer tëne sayn toot? Tii saat: “Yeete moynt hon ich te tekst fom taach im piichelche Tuu ti Piipel yeete taach unersuuche kelees un too triwer noo ketenkt. Tas hot mich keholef se tenke aan Yeehoowa un ti wunerliche tinge woo eyer uns in sayn Wort in lërnt, xtats aan te propleeme woo ich hat.” (Psal. 61:2)

UNSER PRUUTERXAFT

11. Wii xpiire mer uns wën mer tenke iwer ti persewerans woo unser priiter tsayche?

¹¹ Yeehoowa penutst unser weltwayt pruuterxaft fer uns helfe aus hale. Es treest uns se wise tas “ti kans pruuterxaft uf te welt tas selwiche eelent mit macht”. (1 Phe. 5:9) Uf te kans welt, kepts priiter un xwestere woo eenliche propleeme wii unseres mit mache. Noch soo, tuun se aus hale. Tas tsaycht tas ekaal ti xwiirichkheet woo mer mit mache, khene mer aach aus hale. (Aph. 14:22)

12. Wii khene unser priiter uns helfe, un was khene mer fer tëne mache? (2 Korinter 1:3, 4)

¹² Unser priiter khene uns uf muute aus hale torich sayn wërter un aktsyoone. Ti priiter un xwestere hon kraat tas fer te aphostel Phaul kemacht. In sayn priife, hot eyer ti naame kesaat fon tëne woo tëm keholef hon wii eyer inkexpërt waar, un tee hot se ketankt. Tiise priiter un xwestere hon Phaul ketreest, uf kemuut un praktix hilef kep. (Fili. 2:25, 29, 30; Kol. 4:10, 11) Hayt, khene ti priiter uns aach treeste un helfe ti xweyere tsayte aus hale. Un meyer khene tas selwiche fer tëne mache wën se am layte sin. (Lees 2 Korinter 1:3, 4.)d

13. Was hot ti xwester Maya keholef aus hale?

¹³ Ti priiter hon een xwester in Ruslant, woo Maya heest, fiil uf kemuut. In 2020, sin ti polise in Maya sayn haus rin kang un tëm unersuucht. Xpeeter, must se sich foer een kericht xitse wayl se mit anere iwer sayn klaape kexproch hot. Tii saat: “Torich tiise tsayt waar ich miit, ëngstlich un traurich. Awer mayn priiter un xwestere hon mich aan keruuft un mensagens un priife fer mich kexrip. Tii hon mich sicher kelos tas se mich fiil liipe. Ich wust xon tas ich een kroos un liiplich familye hat. Awer tsayt 2020, sin ich mich noch mee too tefun sicher.”

14. Wii khene mer hilef fon unser priiter kriin fer aus hale? (Kuk aach tas pilt.)

¹⁴ Was khanst tuu mache? Wëns tuu een proop mit machst, playp ticht pay tayn priiter un xwestere. Hal tich net tsurik hilef fer ti elteste ferlange. Tii khene ‘wii xuts keeche te wint sin, wii een sicher plats fer sich ferxtekele fom xtorm’. (Isa. 32:2) Un ferkes tich net tas tayn priiter tuun aach xwiirichkheete mit mache. Wëns tuu een pruuter helfst wën tee es praycht, wërst tuu froo sin un tas tuut tich aach helfe tayn proop aus hale. (Aph. 20:35)

UNSER HOFNUNG

15. Wii hot ti hofnung Yeesus keholef, un wii tuut se uns hayt helfe? (Hepreeyer 12:2)

¹⁵ Yeehoowa kept uns een fest hofnung woo uns helft aus hale. (Rom. 15:13) Tenk tich traan was mit Yeesus pasiirt is. Yeesus wust tas wën eyer troy plaype teet, teet eyer pewayse tas ales was Satanaas keeche Yeehoowa kesaat hot liie waare, un tas Yeehoowa fertiint keert wëre. Yeesus hot aach hërtslich kewaart ti tsayt woo eyer tsurik tsum himel keengt fer mit sayn Fater plaype un ti tsayt woo eyer mit sayn priiter im himlixe Raych rechiire teet. Tiise hofnung hot tëm keholef te xlimste taach fon sayn leepe too uf te eyert aus hale. (Lees Hepreeyer 12:2.)e Kraat soo, unser hofnung fer fer imer uf Kot sayn nay welt leepe, helft uns aus hale kwalkee xwiirichkheet woo mer in Satanaas sayn welt mit mache.

16. Wii hot ti hofnung een xwester keholef aus hale un was lërnst tuu mit tëne sayn wërter?

¹⁶ Mërk mool wii ti hofnung fon tas leepe in te nay welt ti xwester Alla, fon Ruslant, keholef hot. Sayn man is tsu te katee kexikt kep foer kericht wëre. Wii tas pasiirt is, hot Alla kesaat: “Peete iwer unser hofnung fer te futuer un too triwer noo tenke, helft mich net soo oone muut sin. Ich wees tas noo tiise xwiirichkheete, kuute tinge khome tuun. Yeehoowa tuut sayn faynte ap kewine un uns peloone.”

17. Wii khene mer tsayche tas mer petanklich sin fer ti hofnung woo Yeehoowa uns kept? (Kuk aach tas pilt.)

¹⁷ Was khanst tuu mache? Hool tich tsayt fer se tenke iwer te wunerlich futuer woo Yeehoowa ferxprecht. Iwerlee tich wii wërt tas leepe sin in Kot sayn nay welt un al ti seechen woos tuu kriin tuust. Kwalkee proop woos tuu hayt mit machst, ‘tuut een khorts tsayt hale un laycht is’ wëns tuu tas ferklaychst mit tas eewiche leepe in te nay welt. (2 Kor. 4:17) Xprech aach mit te anere iwer tayn hofnung fer te futuer. Tenk iwer wii xweyer tas leepe is fer tii woo Yeehoowa net tiine. Tii hon aach fiile propleeme, awer tii wise net iwer ti wunerliche tinge woo Yeehoowa ferxprecht. Een khorts kexpreech khan xon kenuuch sin fer tëne uf muute interes aan unser hofnung tsayche.

18. Warom khene mer uf Yeehoowa sayn ferxpreche traue?

¹⁸ Noo fiile proope troy aus hale, hot Yoop fer Yeehoowa kesaat: “Yets ferxteen ich tas tuu khanst ales mache un tas niks was tuu pleenst unmeechlich fer tich is.” (Yoop 42:2) Yoop hot kelërnt tas niks khan Yeehoowa um hale sayn ferxpreche erfiile. Tiise woerheet khan uns kraft kepe fer aus hale. Tsum payxpiil, xtel tich mool foer een fraa woo xon een lang tsayt krank is. Tii is oone muut wayl kheen tokter khont se heele. Awer tan, tuut se een kuute tokter fine woo saat se kraat was sayn propleem is un wii eyer tëne helfe tuut. Opwool ti fraa wees tas es tuut tsayt nëme fer peser wëre, xpiirt se sich frooer. Yets wërts laychter fer tëne ti krankheet aus hale wayl tii een xeen hofnung hot — ti hofnung fer wërklich peser wëre. Kraat soo, meyer khene wayter aus hale wayl meyer sin uns sicher tas Yeehoowa sayn ferxpreche fon een paratiis sich erfiile tuut.

19. Was mise mer mache fer aus hale?

¹⁹ Wii mer kesiin hon, Yeehoowa helft uns ti proope aus hale torich tas kepeet, sayn Wort, unser pruuterxaft un unser hofnung. Wën mer unser pestes mache fer kuut penutse tiise tinge woo Yeehoowa uns kept, tuut eyer uns helfe ekaal ti xwiirichkheete woo mer mit mache pis ti tsayt khomt wën Satanaas sayn welt un ti eelent net mee eksistiire. (Fili. 4:13)