Nonb
22 Annapre, Izrayelit yo te deplase e yo t al monte tant yo nan Plèn Mowab yo ki tankou dezè, pa lòtbò Rivyè Jouden an, anfas Jeriko+. 2 Twouve, Balak+, pitit gason Zipò a, te wè tout sa Izrayelit yo te fè Amorit yo. 3 Pèp Izrayèl la te tèlman gen anpil moun, sa te fè moun Mowab yo vin kraponnen anpil. Moun Mowab yo te pè Izrayelit yo anpil+. 4 Se sa k fè yo te di moun respektab nan Madyan yo+: “Kounye a, pèp sa a pral kraze tout zòn nou an menm jan ak yon towo bèf k ap manje zèb nan savann.”
Nan epòk sa a, se Balak, pitit gason Zipò a, ki te wa peyi Mowab. 5 Li te voye kèk moun al kote Balaam, pitit gason Beyò a, nan Petò+, ki bò Rivyè Efrat, nan peyi l. Li te voye chèche l e li te voye di l: “Gen yon pèp ki sot ann Ejip, yo kouvri tout tè a+ e yo abite egzakteman anfas mwen. 6 Tanpri, vin kounye a pou w lage malediksyon sou pèp sa a pou mwen+, paske yo gen plis fòs pase m. Petèt m ap ka pot laviktwa sou yo e m ap ka mete yo deyò nan peyi a. Paske mwen konnen byen, depi w beni yon moun, li beni, e depi w lage malediksyon sou yon moun, li modi.”
7 Se konsa, moun respektab nan peyi Mowab ak peyi Madyan yo te vwayaje ak lajan nan men yo pou yo peye pou travay divinò a t ap fè a. Yo t al kot Balaam+ pou yo di l sa Balak te voye di l la. 8 Lè sa a, li di yo: “Pase nuit lan isit la e m ap vin di nou tout sa Jewova di m.” Konsa, prens peyi Mowab yo te pase nuit lan lakay Balaam.
9 Epi, Bondye vin pale ak Balaam, li di l+: “Kiyès mesye sa yo ki avè w la a?” 10 Balaam reponn vrè Dye a, li di l: “Se Balak, pitit gason Zipò a, wa peyi Mowab la, ki voye yon mesaj ban mwen, li voye di m: 11 ‘Men pèp ki sot ann Ejip la kouvri tout tè a. Vin lage malediksyon sou yo pou mwen+. Petèt m ap ka batay avèk yo pou m mete yo deyò nan peyi a.’” 12 Men, Bondye di Balaam: “Ou pa dwe al avèk yo. Ou pa dwe lage malediksyon sou pèp la, paske se yon pèp ki beni+.”
13 Balaam te leve demen maten, epi li di prens Balak yo: “Nou mèt retounen nan peyi nou, paske Jewova pa vle kite m al avèk nou.” 14 Se sa k fè, prens peyi Mowab yo retounen kot Balak, yo di l: “Balaam pa vle vin avèk nou.”
15 Men, Balak voye lòt prens. Yo te pi plis pase premye yo e yo te nan pi gwo pozisyon pase yo. 16 Yo rive kot Balaam, yo di l: “Men sa Balak, pitit gason Zipò a, voye di w: ‘Tanpri, pa kite anyen bloke w pou w pa vin kote m, 17 paske m ap rekonpanse w e m ap fè tout sa w di m. Tanpri, vin lage malediksyon sou pèp sa a pou mwen.’” 18 Men repons Balaam te bay sèvitè Balak yo: “Menmsi Balak ta ban m kay li a plen ajan ak lò, mwen pa t ap kapab fè anyen, ni gwo ni piti, anplis lòd Jewova, Bondye m nan, ban mwen an+. 19 Tanpri, pase nuit lan isit la, pou m ka konnen ki lòt bagay Jewova ap di m+.”
20 Epi, pandan nuit lan, Bondye vin pale ak Balaam, li di l: “Si mesye sa yo mande w al avèk yo, ou mèt ale. Men, se sèlman sa m di w pou w di+.” 21 Konsa, Balaam leve nan maten, li sele bourik li, epi l ale ak prens peyi Mowab yo+.
22 Men, Bondye te vin fache anpil poutèt li te ale. Epi, zanj Jewova a te kanpe nan wout la pou l anpeche l ale. Twouve, Balaam te sou bourik li e te gen de nan sèvitè l yo ki akonpaye l. 23 Lè bourik la wè zanj Jewova a kanpe nan wout la ak yon epe nan men l, li eseye kite wout la pou l al antre nan yon jaden. Men, Balaam tonbe bat bourik la pou l fè l retounen nan wout la. 24 Lè sa a, zanj Jewova a te kanpe nan yon ti wout tou jis ki separe de jaden rezen e ki te gen miray an wòch sou toule de bò l. 25 Lè bourik la wè zanj Jewova a, li kole kò l nan miray la e li kwense pye Balaam nan miray la. Balaam te kòmanse bat bourik la ankò.
26 Zanj Jewova a te vin pase devan yo ankò, li t al kanpe yon kote ki tou jis, yon kote yo pa t ka fè ni adwat ni agoch. 27 Lè bourik la wè zanj Jewova a, li kouche atè ak Balaam sou do l. Sa te fè Balaam vin an kòlè anpil e li te kontinye bat bourik la ak baton l lan. 28 Alafen, Jewova fè bourik la pale*+ e bourik la te di Balaam: “Sa fè twa fwa ou bat mwen, ki sa m fè w+?” 29 Balaam reponn bourik la: “Paske m wè w pran m pou egare! Si m te gen yon epe nan men m, mwen t ap touye w!” 30 Apre sa, bourik la di Balaam: “Èske se pa bourik ou mwen ye, bourik ou fè tout vi w ap monte rive jis kounye a? Èske m te konn aji avè w konsa anvan?” Balaam reponn: “Non!” 31 Apre sa, Jewova ouvè je Balaam+, epi Balaam wè zanj Jewova a kanpe nan wout la ak yon epe nan men l. Menm kote a, Balaam bese byen ba fas atè.
32 Epi, zanj Jewova a di l: “Sa fè twa fwa ou bat bourik la, poukisa w fè sa? Se mwen menm ki vin anpeche w ale, paske chemen w pran an kont volonte m+. 33 Lè bourik la te wè m, li te eseye pase nan yon lòt chemen pandan twa fwa+. Si l pa t pase lwen m, atò konsa mwen t ap gentan touye w e mwen t ap kite l viv.” 34 Balaam di zanj Jewova a: “Mwen peche, paske mwen pa t konnen si w te kanpe nan wout la pou w bare m. Kounye a, si sa pa fè w plezi, m ap retounen.” 35 Zanj Jewova a di Balaam: “Ou mèt ale ak mesye yo. Men, se sèlman sa m di w pou w di.” Konsa, Balaam te kontinye wout la ak prens Balak te voye yo.
36 Lè Balak tande Balaam rive, menm kote a, l al rankontre l nan vil Mowab la, ki arebò Vale Anon, sou fwontyè peyi a. 37 Balak di Balaam: “Èske m pa t voye rele w? Poukisa w pa t vin jwenn mwen? Èske se paske w te panse m pa ka rekonpanse w+?” 38 Balaam reponn Balak: “Bon, apa m vin kote w kounye a. Men, èske m ap ka di yon bagay? Se sèlman pawòl Bondye met nan bouch mwen m ka di+.”
39 Se konsa, Balaam deplase ansanm ak Balak, e yo rive Kiryatousòt. 40 Balak te touye bèf ak mouton pou l fè sakrifis, li voye kèk moso vyann pou Balaam ak prens ki te avè l yo. 41 Nan demen maten, Balak mennen Balaam sou Mòn Bamòtbaal, kote Balaam te ka wè tout pèp Izrayèl la+.