Jawa’ in wat’ál jun i tsakam
A Pedro yab in exlál jant’oj k’in t’aja’ ani u wé’ jik’el. Jajá’ pel jun i exóbal, ani k’wajatak ti ólchinalchik k’al an exóbchix jawa’ in uluw a Charles Darwin. U exóbchinalchik abal jawa’ in uluw axé’ xi inik játs jawa’ tekedh ani abal yab wa’ats jun i ts’ejkom. Jayej, an exóbchix in uchal an exóbal kin uluwchik jant’oj in tsálpayal.
A Pedro yab in exlál jant’oj kin t’aja’. K’al in tátajchik exobchinének abal pel a Dios axi in ts’ejkamal patal jawa’ wa’ats. Exobchinének abal an ejataláb tujey antsaná’ jant’ini’ tin ulal an libro in k’ál a Génesis ani abal an evolución pel expidh jun i tsalap axi in kwa’al an atiklábchik. A Pedro u le’náb ka tólmiyat k’al in tátajchik ani an exóbchix, pero, ¿jita’ ne’ets kin belchij?
Axé’ játs jawa’ in wat’ál yan i tsakam támub ti támub. ¿Jant’oj in tomnál kin t’aja’ a Pedro ani patal an tsakam axi in tametnál axé’ xi k’ibataláb? ¿Yab aníts abal jajá’chik kwa’al kin takuy jant’oj ne’ets kin bela’? Abal kin exla’chik jant’ini’ ti tujey an ejataláb, lej exbadh kin jumbiy jawa’ in ulal an Biblia k’al jawa’ in tsálpayal yan i atikláb tin kwéntaj an evolución. Antsaná’ ne’etschik kin exla’ jant’oj kin bela’.
An Biblia tu uchál abal yab kwa’al ki alk’idh bela’ patal jawa’ u uluwáb, in ulal: «Axi yab tsalpadh in belál patal jawa’ ka uchan. Pero axi tsalpadh, in t’ajál ti kwéntaj max chubax» (Proverbios 14:15). An Biblia tu uchál abal ki «éyendha’ i tsalápil» abal ki tsu’uw max chubax jawa’ u exóbchinal (Romanos 12:1, 2).
Axé’ xi folleto yab ts’ejkadh abal kin níxokna’ an exóbchix kin ólchij an tsakam abal wa’ats jun i ts’ejkom. Expidh k’wajat dhuchadh jawa’ in ulal talchik i atikláb axi exoblámadh; abal yab wa’ats jun i ts’ejkom. Ani jayej k’wajat dhuchadh jawa’ in ulal an Biblia tin kwéntaj axé’.
Xowé’ ne’ets ki exóbna’ tin kwéntaj an célula, kom játs axi in kwa’al patal axi ejat. Ne’ets ka tsu’uw jant’ini’ ti k’wajat ts’ejkadh an célula ani ne’ets ka lej jík’pa’. Jayej ne’ets ka tsu’uw jant’oj in tsálpayal yan i atikláb axi yab in belál abal wa’ats jun i ts’ejkom.
Lej yan i atikláb in konowiyámal tin kwétemtal: «¿Wa’tsin jita’ axi in ts’ejka’ patal jawa’ i tsu’tal, o antsanák’ij ti wa’tsin?». Walám ma tatá’ a tsalpayámal k’al axé’. Axé’ xi folleto ne’ets ti tejwamédhanchij talchik i tsalap axi in tolmiyámal yan i atikláb abal kin bela’ abal wa’ats jun i ts’ejkom.