¿Jantʼiniʼ tu tólmiyal an abatnaxtaláb axi a Dios tu pidhál?

1. ¿Jaleʼ ti yéjenchal ku exóbchat jantʼiniʼ ti ki beldhaʼ i ejatal?

I yéjenchal ku exóbchat jantʼiniʼ ti ki beldhaʼ i ejatal kom a Dios yab tu tsʼejkaʼ abal ki abatnaʼ ti kwetémtal. Jayej kom yab waʼats jitaʼ más tsalpadh ejtíl a Jehová ani jajáʼ lej tu kʼanidhál jantʼiniʼ jún i tataláb (Jeremías 10:23). Antsanáʼ jantʼiniʼ an tsakamchik in yéjenchal ka exóbchat kʼal in tátajchik, wawáʼ i yéjenchal abal a Jehová tu ku exóbchij jantʼiniʼ ti ki beldhaʼ i ejatal (Isaías 48:17, 18). An abatnaxtaláb axi tu pidhál a Dios pél jún tsʼejwalixtaláb abal ki exlaʼ jantʼiniʼ ti ki beldhaʼ i ejatal. Ka ajiy 2 Timoteo 3:16.

An abatnaxtaláb axi tu pidhál a Dios tu exóbchal jantʼiniʼ tu ku kʼwajiy más kulbél ani jantʼoj kwaʼal ki tʼajaʼ abal tu ku lábliy axi taʼtál a kʼicháj. Jaxtám, kom jajáʼ tu tsʼejkaʼ, kwaʼal ki jilaʼ tu ku exóbchij jantʼiniʼ ti ki beldhaʼ i ejatal. Ka ajiy Salmo 19:7, 11 ani Revelación (Apocalipsis) 4:11.

2. ¿Jantʼiniʼ tu tólmiyal in Káwintal a Dios?

An abatnaxtaláb axi a Dios tu pidhál tu ólchal jantʼoj in léʼ ki tʼajaʼ. Waʼats i abatnaxtaláb axi u éynal expidh abal tálchik i tʼajbiláb (Deuteronomio 22:8). Al kʼalejkʼij tam tʼajbiláb kwaʼal ki tsuʼuw jawaʼ tam abatnaxtaláb kwaʼal ki tʼajaʼ ti kwéntaj abal ki exlaʼ jantʼoj ki tʼajaʼ (Proverbios 2:10-12). Ejtíl, an Biblia tu ólchal abal a Dios tu tsʼejwaliyámal kʼal i ejatal. Ki tʼilaʼ axéʼ xi káw, tu tólmiyal ki tʼajaʼ ti kwéntaj jantʼiniʼ ku xeʼtsin ti tʼojlábil, ti kʼimáʼ ani tam u kalel tu belelél. Ka ajiy Hechos 17:28.

3. Waʼats tsáb i abatnaxtaláb axi más exbadh, ¿jawaʼ játs?

A Jesús in uluw abal waʼats tsáb i abatnaxtaláb axi más exbadh. Axi kʼaʼál tu ólchal abal u tsʼejkamej abal ki exlaʼ, ki kʼanidhaʼ ani ki kʼakʼnaʼ a Dios. Axéʼ xi abatnaxtaláb kwaʼal ki tʼajaʼ ti kwéntaj kʼal patal jawaʼ ki tʼajaʼ ti ejatal (Proverbios 3:6). Jitaʼchik kin jilaʼ ka abatnáj kʼal axéʼ xi káw neʼets kin tʼajaʼ tin jaʼúb a Dios, neʼets ka kʼwajiy kulbél ani abal etsʼey. Ka ajiy Mateo 22:36-38.

An tsábchil abatnaxtaláb tu tólminchal ki neʼdhaʼ alwaʼ kʼal i juntal kʼwajíl (1 Corintios 13:4-7). Tam ki tʼajaʼ axéʼ, i nitsʼbiyal a Dios. Ka ajiy Mateo 7:12 ani 22:39, 40.

4. ¿Jantʼiniʼ tu tólminchal an abatnaxtaláb axi a Dios tu pidhál?

An abatnaxtaláb axi a Dios tu pidhál in tʼajál ku kʼanidháxin ani ku kʼwajiy júnkudh ti kʼimáʼ kʼal i yanél (Colosenses 3:12-14). Ejtíl, jún kʼal nixéʼ xi abatnaxtaláb in beletnál i yanél kom in ulal abal axi tómkidhchik kwaʼal ka kʼwajiy etsʼey junax. Ka ajiy Génesis 2:24.

Ki belkaʼ an abatnaxtaláb axi a Dios tu pidhál tu beletnanchal i tsalápil ani i ichích. Jayej tu tólminchal ki elaʼ i tʼojláb kom axi in aliyal i tʼojnalchik in léʼ i atiklábchik axi ikʼax ani yab u kwéʼ (Proverbios 10:4, 26; Hebreos 13:18). In Káwintal a Dios tu exóbchal ku kʼwajiy kulbél kʼal jawaʼ i kwaʼal. Jayej tu exóbchal ki punuw okʼox a Dios kʼal patal jawaʼ ki tʼajaʼ. Ka ajiy Mateo 6:24, 25, 33 ani 1 Timoteo 6:8-10.

Ku kʼwajiy jantʼiniʼ tin ulal an abatnaxtaláb axi a Dios tu pidhál, tu beletnanchal i ejatal. Ejtíl, max ki belkaʼ an abatnaxtaláb axi in ulal yab ku utsʼálin, yab neʼets ku yawʼláts ani yab neʼets ki yajchiknaʼ (Proverbios 14:30; 22:24, 25; 23:20). A Jehová tu jilál ki utsʼaʼ wéʼ i vino, pero yab in léʼ ku wilej (Salmo 104:15; 1 Corintios 6:10). An abatnaxtaláb tu tólminchal ki tʼajaʼ ti kwéntaj i xeʼtsintal ani i tsalápil (Salmo 119:97-100). Wawáʼ yab expidh i belkál axéʼ xi abatnaxtaláb abal ku kʼwajiy alwaʼ ti ejatal, i belkál abal ki puwénchij a Jehová. Ka ajiy Mateo 5:14-16.