1 ¿Jale’ i yéjenchal ku oláts?

AN OLÁB. Yan i atikláb in lé’ kin exla’ tin kwéntaj an oláb. Al axé’ xi ajumtalábchik ne’ets ki tók’tsiy buk i konowixtaláb axi in t’ajálchik an atikláb tin kwéntaj an oláb. Ne’ets ki tsu’uw jant’oj in ulal an Biblia tin kwéntaj axé’. Axé’ xi artículos pel abal kin tólmiy jita’chik yabayej u ól abal kin t’aja’, ani jita’ in t’ajálits i oláb kin áynanchij kin t’aja’ más alwa’.

TIN PUWÉL an Tsabál lej wat’adh yan i atikláb in t’ajál i oláb. U ólchik ban iglesias, ban sinagogas, ban santuarios ani al pílchik ju’táj. Ani in eyendhálchik yan jant’oj abal ti ól, ejtíl, an rosarios. Pero bélits max in eyendhál o imbáj, patal u ól.

An atiklábchik lej junits k’al patal jawa’ in kwa’al i ejataláb ban Tsabál. Antsaná’ jant’ini’ an ko’nélchik, wawá’ jayej i yéjenchal ku k’apúts, ki uts’a’ i já’ ani ku ixk’aláts. Jayej u wa’tsinal, u púwel ani u tsemel (Eclesiastés 3:19). Pero expidh an atiklábchik játs axi u ól. ¿Jale’?

Kom in yéjenchal. An atiklábchik in eyendhál abal ka tólmiyat k’al jita’ axi in kwa’al más i tsapláb, k’al jita’ axi jajá’chik in lej k’ak’nál. An Biblia in ulal abal antsaná’ ti ts’ejkadh an atiklábchik (Eclesiastés 3:11). A Jesús in uluw antsaná’: «k’ijidh jita’chik in tsálpayal abal in yéjenchal a Dios» (Mateo 5:3).

Nixé’ xi yejenchixtaláb in t’ajámal abal an atiklábchik kin ts’ejka’ i templos ani yan jant’oj abal ka oláts. Ani jayej in eyendhálchik yan i k’ij abal ti ól. Chubax, an atiklábchik in t’ajál yan jant’oj tin kwetémtal o in aliyal abal ka tólmiyat k’al k’e’at i atikláb. Pero, ¿yab aníts abal an atiklábchik yab in éjtowal kin ela’ tin kwetémtal patal jawa’ in yéjenchal kin exla’? Wa’ats yan jant’oj axi an atiklábchik yab in éxbayal ani yab in éjtowal kin t’aja’. I yéjenchal abal k’e’at jita’ axi más tsapik ani tsalpadh tu ku tólmiy. Pero, ¿jale’ ti yéjenchal ku oláts?

Jun i t’iplab, ¿a tametnámal jun i k’ibataláb k’al axi yab a exla’ jant’oj ka t’aja’ ani yab wa’tsin jita’ ti tólmiy?, ¿tsémenek jun a yanél ani a ats’ál abal yab jita’ in éjtowal ti kanatbédha’?, ¿a ats’ámal tam junchikíl abal yab a exlál jant’oj ka t’aja’?, ¿a tsalpayámal abal yab jita’ ne’ets ti pákwlanchij jawa’ a t’ajámal?

An Biblia tu tók’tsinchal yan i konowixtaláb, jayej in ulal abal an oláb játs axi in éjtowal tu ku tólmiy. Ti Biblia i elál i oláb axi in t’aja’ i inik ani i uxum abal kin konoy ka tólmiyat, ka exóbchat ani ka pákwlanchat in wálab. Jayej tók’tsinchat yan i konowixtakláb axi patal i lé’ ki exla’ (Salmo 23:3; 71:21; Daniel 9:4, 5, 19; Habacuc 1:3).

Pero patal axé’ xi atikláb in exlálak jant’oj lej exbadh. Jajá’chik in exlálak jita’ játs axi in tomnál ka ólonchat ani nixé’ pel jant’oj axi yan i atikláb yab in lej t’ajál ti kwéntaj.