1. U yatsnal an tsabál
«Ne’ets ka lej t’eleláts an Tsabál.» (LUCAS 21:11)
● An noticieros axi k’wajatak in olnál jawa’ wat’ey ti Haití, in ats’a’chik abal k’wajatak ti uk’nal jita’ axi k’wajatak t’e’tsidh. Pelak jun i tsakam t’ele’ axi in bij Winnie, in kwa’alak jun tamúb k’al ts’ejel. Jajá’ éjtowat ka kaldháj, pero in papá ani in mamá tsemets.
JAWA’ WAT’ENEK K’al an terremoto axi wat’ey ti Haití ti enero ti 2010, tsemets wat’adh 300.000 i atikláb ani 1.300.000 in k’iba’chik in k’imá’. Yab expidh wa’tsin axé’ xi terremoto, jayej wa’tsin k’e’at al pilchik i bichow. Ti abril ti 2009 ma ti abril ti 2010 wa’tsin dieciocho i terremotos axi lej tsapik.
JAWA’ TALCHIK IN ULAL. Yabáts u lej yatsnal an Tsabál. Pel an tecnología axi in t’ajál ki ats’a’ i olchixtaláb axi lej k’ak’adh.
¿CHUBAX NIXÉ’? Ki t’ila’ abal an Biblia yab in olnál jay i terremoto ne’etsak ka wat’ey ok’xidh ka ulits in taltal an xe’tsintaláb. Jawa’ in ulal játs abal ne’ets ka wa’tsin yan i terremotos «abal ju’tamk’ij». Axé’ in tejwamedhál abal u k’wajatits tin taltal an xe’tsintaláb (Marcos 13:8; Lucas 21:11).
¿JANT’OJ A TSÁLPAYAL? ¿Walám k’wajat ti putnal an kaw axi in ulal an Biblia tin kwéntaj an terremotos?
Walám ka tsalpay abal ets’ey wa’tsinének i terremotos ani yab játs kom u k’wajatits ti taltal an xe’tsintaláb. Pero jawa’ ko’míj chubax játs abal k’wajat ti putnal jun i k’ej kaw axi ti Biblia. Ki tsu’uw k’e’at i k’ej kaw axi k’wajat ti putnal.
[Comentario]
«An atiklábchik axi in exobnál tin kwéntaj an Tsabál in bíjiyalchik ti terremotos. Pero abal patal wawá’ pel jun i k’ak’adhtaláb». (KEN HUDNUT, SERVICIO GEOLÓGICO DE ESTADOS UNIDOS)
[An dhabal kʼal an foto]
© William Daniels/Panos Pictures