6. An olnomtaláb tin puwél an tsabál
«Ani tin puwél an Tsabál ne’ets ka olnáj an alwa’ kaw, abal patal an atiklábchik kin ats’a’. Ani tam ne’ets ka ulits in taltal an xe’tsintaláb.» (MATEO 24:14)
● A Vaiatea u k’wajíl ti Tuamotú, jun i isla axi k’wajat lej owél ban Pacífico. Al 803.000 kilómetros cuadrados wa’ats buk’uchik wat’adh ochenta i tsakam islas. Taná’ u kwajíl expidh 16.000 i atikláb. Bélits abal lej ów, an ólchixchik k’al a Jehová in tsa’biyal a Vaiatea ani in atk’wajíl. ¿Jale’ tu k’alelchik, bélits abal lej ów? Kom in lé’ kin ólchij an alwa’ kaw tin kwéntaj in Eyaltal a Dios patal an atikláb axi tin puwél an Tsabál.
JAWA’ WAT’ENEK. An alwa’ kaw tin kwéntaj in Eyaltal a Dios k’wajat ti olnáb tin puwél an Tsabál. Ban támub 2010, an ólchixchik k’al a Jehová olnomáts wat’adh 1.600 millones i horas al 236 i pakdha’ bichow ani i tsakam kwenchal. Axé’ játs jant’ini’ max jun i ólchix k’al a Jehová u ólnom 30 minutos chudhél. Ban támub 2000 ma ti 2010, an ólchixchik k’al a Jehová in ts’ejka’ ani in buk’uw wat’adh 20.000 i publicaciones kaldhach ti Biblia.
JAWA’ TALCHIK IN ULAL. Biyálits tu olnáb in káwintal a Dios.
¿CHUBAX NIXÉ’? Lej exbadh ki t’aja’ ti kwéntaj abal yan i atikláb in examal kin ólna’ jawa’ in ulal an Biblia, pero yab in aynanchámal ani yab in olnál tin puwél an Tsabál, pero an ólchixchik k’al a Jehová in aynanchámal kin ólna’ an alwa’ kaw tin puwél an Tsabál ani in t’ilmayal cientos i millones i atikláb. In aynanchámal ti ólnom bélits abal exámej ka kúbdhanchat in t’ojlábil k’al yan i éyal axi in kwa’al yan in éy ani lej pojkax (Marcos 13:13).a An ólchixchik k’al a Jehová in jolk’ál i k’ij abal ti ólnom, jayej in buk’nál anik’ij an publicaciones axi in eyendhál abal ti exóbchix. Patal axé’ u t’ajnal expidh k’al i donaciones.
¿JANT’OJ A TSÁLPAYAL? ¿K’wajat ti olnáb an alwa’ kaw tin puwél an Tsabál? ¿Walám játs kom we’its ne’ets ka ulits yan i alwataláb?
[Nota]
a Max a lé’ ka exla’ más, a éjtowal ka tsu’uw axé’ an videos Fieles ante las pruebas, Los triángulos púrpuras ani Los testigos de Jehová se mantienen firmes ante el ataque nazi. Axé’ in ts’ejkamal an ólchixchik k’al a Jehová.
[Comentario]
«Ne’ets ki aynanchij tu ólnom k’al yan i kulbetaláb, ani expidh ne’ets ku koyóts ma tam a Jehová kin uluw. Jayej, ne’ets ki eyendha’ patal jawa’ a Jehová tu pidhál, abal ki ólchij an alwa’ kaw patal an atikláb.» (ANUARIO DE LOS TESTIGOS DE JEHOVÁ 2010)