«Max ka tʼajaʼ ti kwéntaj jawaʼ u olnál»
«Max ka tʼajaʼ ti kwéntaj jawaʼ nanáʼ u olnál pel it lej chubax exóbal kʼal nanáʼ. Neʼets ka exlaʼ an chubaxtaláb ani jats neʼets ti walkaʼ». (JUAN 8:31, 32)
¿Jantʼoj in leʼak kin olnaʼ a Jesús? Tam ti jajáʼ in uluw «jawaʼ nanáʼ u olnál» kʼwajatak ti kaw tin kwéntaj in exóbchixtal. Pero in uluw abal an exobchixtaláb axi in binalak talak ti eb: «Expidh nanáʼ tu olchámal ani tu exóbchamal an kaw jawaʼ tin pidhámal u tátaj abal nanáʼ tu ólchijchik» (Juan 12:49). Tam ti a Jesús in tʼajchij jun i oláb in tátaj Jehová, in uluw: «A káwintal pel an chubaxtaláb». Jaxtám tam in exobchalak an atiklábchik in tʼilchalak jawaʼ a Jehová in uchámal in tʼojnalilchik axi ti biyál (Juan 17:17; Mateo 4:4, 7, 10). Ani tam, ¿jantʼiniʼ tin aynanchal tin káwintal a Jesús an aykolchik axi chubax? Tam in belkálchik jawaʼ in ulal an Biblia ani in batsʼuwal jantʼiniʼ «in káwintal» a Dios jayej in jilál abal ka beldhanchat in ejatal kʼal jawaʼ in exobnálchik tanáʼ.
In tʼiplabil an aykolchik axi ti kʼaʼál siglo. An abatwalej Pablo jats axi in dhuchaʼ más i cartas axi i elál ti Biblia in lej kʼakʼnalak an exobchixtaláb axi in binál an Biblia jantʼiniʼ tin tʼajaʼ a Jesús. Jaxtám in uluw: «Patal an Biblia tsʼejkadh kʼal a Dios ani alwaʼ abal tu exóbchij» (2 Timoteo 3:16). Jayej an epchal inik axi u exóbchixak ban tamkuntaláb uchbiyat abal expidh kin ólnaʼ «jawaʼ exobchámej kʼal a Dios ani yab kin ólnaʼ kʼeʼat i exóbchixtaláb» (Tito 1:7, 9, Biblia en Lenguaje Sencillo [Nuevo Testamento]). Jayej uchan an aykolchik axi chubax abal kin tʼajaʼ ti kwéntaj walám ka waʼtsin «jitaʼ axi kin leʼnaʼ ti kʼambiy kʼal i exobchixtaláb axi yab chubax kom pel i tsalap axi ti tsabál ani yab in tsalap a Cristo» (Colosenses 2:8).
¿Xowéʼ ta kʼicháj jitaʼchik kʼwajat in tʼajál axéʼ? Ban Constitución dogmática sobre la divina revelación —axi kʼalej batsʼkʼudh kʼal an Vaticano ti 1965 ani u olnáb ban Catecismo de la Iglesia Católica— in ulal abal «an iglesia yab expidh in kaldhál ti Biblia jawaʼ in leʼchik kin exóbnaʼ. Jaxtám tu ólchal abal kwaʼal ki batsʼuw an sagrada tradición ani jawaʼ tu ólchal an Biblia ani tsablom kwaʼal ki belkaʼ jantʼiniʼ max abadh kʼal a Dios». Ban revista Macleanʼs jun i uxum axi u belom axi ti Toronto Canadá in uluw: «¿Jaleʼ ti kwaʼal ki belkaʼ jantʼniʼ abatnaxtaláb axi uluwat in tʼajál dos mil i támub? Wawáʼ jayej i kwaʼal i alwaʼchik tsalap abal ki eyendhaʼ ti ejatal pero kʼal in exobchixtal a Jesús ani jawaʼ in ulal an Biblia in tʼajál abal yab ka eyan jawaʼ wawáʼ i tsálpayal.
An New Catholic Encyclopedia in ulal tin kwéntaj an Ólchixchik kʼál a Jehová: «Jajáʼchik in eyendhál an Biblia abal kin kʼakʼnaʼ a Dios ani abal ka beldhanchat in ejatal». Xoweykʼij, jun i inik axi ti Canadá in uchaʼ jun i ólchix axi kʼwajatak tin wiʼlebil: «U exlálits jitaʼ jats tatáʼ». In chʼuchbiy an Biblia axi in chiʼdhalak an mimlab ani in uchaʼ: «An libro axi a neʼdhál ta kʼubak in tejwamedhál jitaʼ jats tatáʼchik».