Kʼal an ólchixchik kʼal a Jehová, ¿an mimláb jayej in okʼnál jun i tamkuntaláb?

Aníts, waʼats yántolom tin puwél an tsabál. Jajáʼchik in tʼajál an tʼojláb kin ólnaʼ an alwaʼ kaw tin kwéntaj in Eyaltal a Dios, antsanáʼ jantʼiniʼ tin ulal an Salmo 68:11, tanáʼ a Jehová in ulal: «Lej yan an uxumchik axi in olnál an alwaʼ kaw».

Pero an tʼojláb axi in tʼajál axéʼchik xi ólchix lej pílits kʼal an tʼojláb axi in tʼajál an mimlábchik axi in okʼnál píl i kʼakʼnaxtaláb. ¿Jaleʼ ti lej pílits an tʼojláb axi in tʼajálchik?

Ki tsuʼuw abal lej pílits jantʼiniʼ tu exóbchix. An uxum axi u exóbchix al jun i kʼakʼnaxtaláb, játs axi in okʼnál an atiklábchik axi in exóbchal. Pero an mimlábchik axi kʼal an ólchixchik kʼal a Jehová, jajáʼchik yab u exóbchix ban tamkuntaláb, in tʼajál tam u ólnom atáj ti atáj ani ba juʼtamkʼij.

Kʼeʼat jantʼoj pel an uchbiláb axi in kwaʼalchik ban tamkuntaláb. An mimlábchik axi al kʼeʼat i kʼakʼnaxtaláb in okʼnálchik an tamkuntaláb ani in exóbchal. Pero an mimlábchik axi pel i ólchix kʼal a Jehová, yab jaykʼiʼ u exóbchix ban tamkuntaláb max waʼats jun i inik axi uchbidh abal ti exóbchix (1 Timoteo 3:2; Santiago 3:1).

An Biblia in ulal abal expidh an inik in kwaʼal in uchbíl abal kin ókʼnaʼ jun i tamkuntaláb. Ani an abatnaxtaláb axi an abatwálej Pablo in pidhaʼ a Tito, antsanáʼ tin ulal. «Jaxtám tu jilaʼ ti Creta, in uluw a Pablo abal [...] ka pidhaʼ in uchbíl an inik abal kin ókʼnaʼ an tamkuntaláb». (Tito 1:​5, nota.) Talbél in uluw abal «an inik axi ka bijiyat, yab kwaʼal ka élchin ni jantʼoj yab alwaʼ, kwaʼal kin koʼoy junkáts in tomkíl» (Tito 1:6). An abatwálej, jayej in ábchij jun i dhuchadh úw a Timoteo, juʼtáj tin ulal jun i kaw ejtíl axéʼ: «Pel jun i alwaʼ tʼojláb jitaʼ in léʼ ti ókʼnom, in uluw abal jitaʼ in léʼ ti ókʼnom, kwaʼal kin tʼajaʼ ti alwaʼ inik, yab ka élchin jawaʼ yab alwaʼ, kin koʼoy junkáts[...] in tomkíl, kin witʼaʼ ti exóbchix kʼal in Káwintal a Dios.» (1 Timoteo 3:​1, 2.)

Pero ¿jaleʼ ti expidh an inikchik in kwaʼal in uchbíl ti ókʼnom? An abatwálej Pablo in dhuchaʼ axéʼ xi kaw: «Yab ka jilan i uxum ti exóbchix kʼal in Káwintal a Dios kʼal i tamkunél epchaláb ani kin tʼajaʼ ti ábatnom kʼal an inikchik, ka kʼwajiy pikat al an tamkuntaláb epchaláb. Okʼox a Dios in tsʼejkaʼ a Adán ani talbél a Eva» (1 Timoteo 2:​12, 13). Antsanáʼ jantʼiniʼ a Jehová in tsʼejkaʼ an kʼaʼál tomkinél, in tejwamédhaʼ jitaʼ in léʼak Jajáʼ abal kin tʼajaʼ ti ókʼnom ani ti exóbchix.

Kom a Jesucristo játs axi in Okʼnál an tamkuntaláb, an ólchixchik kʼal a Jehová in nitsʼbiyal in tʼiplabil. A Lucas, in uluw abal a Jesús «xeʼtsin in olnál an alwaʼ kaw atáj ti atáj ani ba juʼtámakits». ¿Ani in aykólilchik, jantʼoj in tʼajaʼ tam ti uchbiyat abal kin ólnaʼ an alwaʼ kaw tin kwéntaj in Eyaltal a Dios? «Kʼalejchik al yan i bichow ani yan i kwenchaláb ani in ólnaʼchik an alwaʼ kaw.» (Lucas 8:1; 9:​2-6.)

Xoʼ ta kʼicháj jayétsekʼij an ólchixchik kʼal a Jehová ani an inikchik an uxumchik u kʼalél kin ólnaʼ an alwaʼ kaw tin kwéntaj in Eyaltal a Dios, antsanáʼ jantʼiniʼ tin ulal Mateo 24:14. A Jesús in kʼej ólnaʼ axéʼ: «Axéʼ xi alwaʼ kaw tin kwéntaj in Eyaltal a Dios, neʼets ka olnáj tin puwél an tsabál ani talbél neʼets ka ulits in taltal an xeʼtsintaláb».