«In le’akchik abal naná’ ku exla’ an chubaxtaláb tu kwetemtal»

JANT’INI’ U EYAK:

In wa’tsin ti Santo Domingo an capital k’al an República Dominicana. Pel tse’ ti eb ani naná’ jats axi más in tsipíl, u tatajchik alwa’ exoblámadh ani in le’akchik abal ki ko’oy jun i alwa’ xe’tsintaláb. Tse’ i támub ok’xidh kin wa’tsin in exla’chik tsab i misioneros axi pel i mormones, in jik’pa’chik kom jajá’chik lej alwa’ inik, lej t’okatchik ani alwa’ toltomidh. Al we’ i k’ij u yanél jats axi ok’oxchik in jalk’uychik in bélomtal tejé’ ti al an República Dominicana, u támkunalak ti Iglesia de Jesucristo de los Santos de los Últimos Días, axi exladh jant’ini’ ti Iglesia mormona.

Naná’ ets’ey in tólmixak k’al jawa’ in t’ajálakchik taná’ ti Iglesia, pero axi más u kulbetnálak jats kom in tsu’chalakchik in jalbíl an yaneláb, ani k’al in xe’tsintal ka k’wajiychik t’okat. Lej exbadh u ats’alak kom pelák in mormón, ani u le’na’ ku t’aja’ ku bajuw tin misionero.

Tam tu ko’oyits 18 i támub, u yanél k’alej ti k’wajíl ti Estados Unidos abal ku ejtow kin exobláts al jun i alwa’ universidad. Jun i támub talbél, u itsán axi pelak i ólchix k’al a Jehová chich tu tsa’biyal tejé’ ti Florida ani tu kaniy al jun i pulik tamkuntaláb, u lej jik’pa’ abal patal an atiklábchik in aliaylak an textos ti Biblia ani in dhuchalakchik patal jawa’ in ats’alak. Jaxtám u konoy jun i uw ani jun i lapicero abal ku t’aja’ jayetsek’ij.

Tam ti taley an tamkuntaláb u itsán tin ucha’ abal kom nana’ u le’ak ku t’aja’ tin misionero, in le’akchik ti kin tólmiy abal ku exla’ más alwa’ an Biblia. U lej kulbétna’ jawa’ tin ucha’, kom u exlálak más k’al an libro mormoón ani yab k’al an Biblia.

JANT’INI’ TIN TÓLMIY AN BIBLIA ABAL KU JALK’UY U EJATAL:

Talbél tam ti k’alejchik u aynanchij tin exóbal k’al an Biblia por teléfono, etsʼey tin uchálakchik ku júmbiy u bélomtal k’al jawa’ in ulal an Biblia. In le’akchik abal ku exlaʼ an chubaxtaláb tu kwetemtal.

Wa’atsak yan olchixtaláb k’al u bélomtal axi u tsálpayalak abal jats an chubaxtaláb pero yab u exlalak max u júmbinal k’al jawa’ in ulal an Biblia. U tsanúb tin abchij jún i ¡Despertad! axi ti 8 a noviembre ti 1995, in chi’dhalak tsab i exobintaláb k’al an belomtaláb Mormón. U jik’pa’ abal yab u exlálak patal an exobintaláb k’al an belomtaláb ju’táj naná’ in k’alelak. Jaxtám u aliy ti Internet abal ku tsu’uw max chubax axé’ xi olchixtaláb, axi in chi’dhalak an revista; ani chubax jawa’ in ulalak. Jayej u ela’ más i olchixtaláb al an museo k’al mormones al an bichow Utah.

Ets’ey u tsálpayalak abal an libro k’al an Mormón ni an Biblia u jumbinalak, pero tam in tujey ku lupudh exóbna’ an Biblia u t’aja’ ti kwéntaj abal yab u jumbinal etíl ti Ezequiel 18:4 an Biblia in ulal abal an ejataláb u tsémel, pero an libro k’al an mormón in ulal ti Alma 42:9 abal an ejataláb yab jayk’ij u tsémel.

Jayej jajá’chik in lej tsu’chalak in exbádh in bichówil, in ulalakchik abal an jardín de Edén k’wajatak ti condado de Jackson (Misuri, Estados Unidos). Ani axi in ok’nalakchik an Iglesia, in ulalakchik abal «tam in eyaltal a Dios kin abatna’, tam a Estados Unidos ne’ets kin omiy an bandera k’al yan i k’adhataláb. Antsaná’ in le’chik kin tejwamédha’ abal an bichow lej alwa’ in t’ajbilábil».

U tsalpayalak abal jant’oj ne’ets ka wat’ey k’al u bichówil tam nixé’ ka wat’ey. Jun i k’icháj jun i exlowál axi k’wajatak in tsapnanchal kin t’aja’ ti misionero tin tawna’ ani u konoy k’al nixé’. U konowiy: «Max a bichówil ka pejéxin k’al ke’at i bichow, ¿ne’ets kit pejéxin tatá’ k’al an mormones axi tana’ u k’wajil? Ani u jik’pa’ abal in uluw abal aníts. U aynanchij ku exóbna’ más tin kwéntaj k’al an mormones ani u t’ajchij talchik i konowixtaláb an ók’nomchik axi wit’adh k’al an mormones ani tin ucha’chik abal nixé’ xi tok’tsixtaláb ne’etsej kin wilk’anchat más talbél.

Ani yab u kulbetna’ jawa’ tin tok’tsiychik. U lej tsalpay abal jale’ u le’ak ku t’aja’ tin misionero, ani u t’aja’ ti kwéntaj abal axé’ xi t’ojláb jats jant’ini’ max u tólmiyal k’e’at i atiklábchik, ani u lej kulbetnalak kom jita’ in t’ajalak axé’ xi t’ojláb u lej puwenchabak. Pero u exlálak lej we’ k’al a Dios. Bélits abal u lej ajiyamal an Biblia, yabak jayk’i’ u punchamal in exbádh nixé’ xi libro. Yabak u exlál max a Dios in kwa’al tsalpadh jawa’ ne’ets kin t’aja’ k’al an atiklábchik.

AN ALWA’TALÁB AXI U BATS’UWAMAL:

Tam tu exóbna’ an Biblia k’al an ólchixchik k’al a Jehová, u exla’ yan jant’oj ejtíl jawa’ jats in bij a Dios, jant’oj u wat’el tam u tsémel, an t’ojláb axi in kwa’al a Jesús abal kin putuw in kulbétal a Dios. Xowé’ k’wájatakits u exobnál más tin kwéntaj k’al axé’ xi libro ani u lej kulbetnalák ku olna’ an alwa’ kaw k’al an atiklábchik k’al jawa’ k’wajatak u exóbnál. Ets’ey u belamal abal wa’ats jun i Dios ani xowé’ in t’ilomits k’al jajá’ tu olábil jant’ini’ max pel u ja’úb. Ti 12 a Julio ti 2004 in pujan jant’ini’ in ólchix k’al a Jehová, ani akak a íts’ talbél u t’aja’ tin precursor.

In t’ojon ti sede mundial cinco i támub ti Brooklyn (Nueva York). Pel jun i púlik kulbetaláb kin tolmixin abal ka ts’ejkan an Biblias ani más i publicaciones axi ne’ets ka tólmiyat an atiklábchik axi tin puwél an tsabál. U ats’ál in lej kulbél abal ku tólmiy yan i atiklábchik kin exla’ a Dios.