An janamtaláb axi in tʼajaʼ abal yab ka exláj a Dios

JAWAʼ IN ULAL AN ATIKLÁBCHIK

El Diccionario Akal crítico de Teología in ulal: «An Trinidad in leʼ kin uluw abal pel jun i Dios axi ox tin eb, an tataláb, in tsakámil ani an espíritu santo». Ani an Diccionario abreviado del cristianismo in ulal: «An católicos, an ortodoxos, an anglicanos ani an protestantes in belálchik axéʼ xi exobchixtaláb».

JAWAʼ IN ULAL AN BIBLIA

A Jesús, in tsakámil a Dios yab jaykʼiʼ in uluw abal pel ejtíl a Dios. Jajáʼ in uluw: «Neʼets kin kʼalej kʼal u Tátaj ti éb, jajáʼ in ey lej púlik ani nanáʼ weʼ tokot» (Juan 14:28). Ani jayej in uchaʼ jun in aykolil axéʼ: «Neʼets kin kʼadhiy kʼal u Tátaj axi jayej pel a Tátaj, neʼets kin kʼadhiy kʼal a Dios axi jayej pel a Dios» (Juan 20:17).

An espíritu santo yab pel jun i atikláb. An aykolchik axi ti kʼaʼál siglo «in batsʼuwchik i espíritu santo», ani a Jehová in uluw: «Nanáʼ neʼets ku abchij an espíritu santo patal an inikchik» (Hechos 2:​1-4, 17). An espíritu santo yab pel jun i Dios, pel in tsaplábil a Jehová.

JALEʼ TIN TOMNÁL KA EXLAʼ

An biblistas católicos Karl Rahner ani Herbert Vorgrimler in ulalchik abal an Trinidad yab u awil ka exláj max yab ka waʼtsin jun i tsuʼbixtaláb. Ani belits max ku wilkʼanchat an tsuʼbixtaláb, kʼibat ki exbay patal. Jaxtám, ¿walám i éjtowal ki kʼanidhaʼ jun i atikláb axi yab i exlál? Imbáj. Jaxtám, an exobchixtaláb kʼal an Trinidad yab tu tólmiyal ku utey kʼal a Dios.

A Marco, axi i bijiy ti tujtal, in tsuʼtal axéʼ xi exobchixtaláb jantʼiniʼ jun i tokʼbantaláb. In tsalpayalak abal a Dios yab in leʼak ka exláj kʼal ni jitaʼ. Nixéʼ in tʼajalak abal yab ka exláj ani ka kʼwajiy tsinat. Pero a Dios yab u tsinkʼonal, in leʼ abal ka exláj (1 Corintios 14:​33, La Biblia de las Américas). A Jehová tu ólchal jitaʼ jats jajáʼ, ani in leʼ abal ki exlaʼ. A Jesús in uluw: «Wawáʼ i kʼakʼnál jawaʼ i exlál» (Juan 4:22).

«Tam ti u exóbnaʼ abal a Dios yab pel jun i Trinidad —in ulal a Marco—, u ejtow ku koʼoy jun i jaʼubtaláb kʼal Jajáʼ.» Antsanáʼ tam, max ki exlaʼ jantʼiniʼ jats a Jehová yab neʼets ki atsʼaʼ kʼibat ki kʼanidhaʼ. An Biblia in ulal: «Max yab u kʼanidhom pel kom yabayej i exlál a Dios, axi in ey lej kʼanidhom» (1 Juan 4:8).