Ets’ey u kitnalak k’al jant’oj ku k’aniy u ejatal

JANT’INI’ U EYAK:

In wa’tsin ti Roma al jun i tsakam kwenchaláb axi lej ts’ejwantál. U lej yajchikna’ tam ti in tsipílak. Yab jayk’i’ tu exla’ u mamá, ani u papá yab tin lej t’ajálak ti kwéntaj. In yejey ban bel.

Tam tu kwa’alak 10 i támub, u tujchij tin kwe’, ani tam tu kidhbay 12 u jila’ u k’imá’. Yaníl in báliyat ti wík’axte’ ani u papá in ko’oy ka k’alej ti kin kaldha’. In lej tsákulom ani ets’ey in k’wajatak tin pejéx k’al an atikláb. Tam tu putuw 14 i támub, yabáts jayk’i’ tin wichiy tu k’imá’. In k’wajílak ti bel ani u eyendhálak i drogas. Tam ka akléts, u jápiyalak jun i carro ani taná’ in wayal, ani tam ka tájk’anits u aliyalak ju’táj kin achin.

U exóbna’ jant’ini’ kin kwe’láts. U kwe’chalak an atikláb jawa’ in ne’dhalak, jayej u otsálak i atáj tam akal. In tujey tin lej exláb, jaxtám an atiklábchik axi u júnkunalak abal ti kwe’, tin kaniy. Talbél in tujey ku kwe’ey i bancos. Kom in lej pójkaxak, in lej k’ak’nabak k’al u junkuwál. Ets’ey u ne’dhálak k’al jant’oj ku k’aniy u ejatal ani tam in wáyalak ets’ey u púnuwalak tin ál u láchik’. In lej pójkaxak, u eyendhálak i drogas, in at’axkaw ani u xe’tsindhálak jitak’ij. Ets’ey tin aliyalak an policía ani yaníl tin yek’wa’. Al yan i támub, in yek’wnalak ani in walkáb.

JANT’INI’ TIN TÓLMIY AN BIBLIA ABAL KU JALK’UY U EJATAL:

Jun a k’icháj, tam ti in kalej ti wík’axte’ in k’alej u tsa’biyal jun u tía. Naná’ yab u exlálak, pero jajá’ ani tsab u primo pelak i ólchix k’al a Jehová. Jajá’chik tin kaniy al jun i tamkuntaláb ani naná’ u tsalpay abal alwa’ak kin k’alej. Pero ban tamkuntaláb in jílk’on utat ban wí’leb, abal ku tsu’uw jita’ u otsel ani jita’ u kalel. Naná’ u kítnalak k’al jant’oj ku k’aniy u ejatal.

Nixé’ xi tamkuntaláb in t’aja’ abal ka jalk’un u tsalápil. U t’ilál abal u uluw tu kwetémtal: «Yab u éjtowal ku bela’ jawa’ k’wajat u tsu’tal». Patal jita’ u tsu’talak tejwa’ak lej kulbél ani te’e’él. Ma xowé’ yab u uk’chiyámal jawa’ u tsu’uw nixé’ a k’icháj. U ats’álak ejtíl max in k’wajat al píl i Tsabál.

In tujey u exobnál an Biblia k’al an Ólchixchik. Biyat u exobnálak an Biblia, u t’aja’ ti kwéntaj abal kwa’alak ku jalk’uy u ejatal ani u tsalápil. U lej tsalpay jant’ini’ ku eyendha’ tu ejatal jawa’ in ulal Proverbios 13:20: «Axi k’wajat ti xe’tsinal k’al i atiklábchik axi tsalpadh, ne’ets ka tsalpadhméj. Pero jita’chik in júnkuwal axi in t’ajál jawa’ kidháb, ne’ets kin lej yajchikna’». U exbay abal kwa’alak ku jila’ tin junkukúl. U ats’a’ k’ibat pero a Jehová tin tólmiy.

Jayej u lej tsápnanchij ku jila’ tin juts’ul ani ku eyendha’ i drogas. U kotoy u xi’íl kom lej nakatak, u tixk’a’ u ts’amuts’ ani u jila’ tin at’axkaw. Taná’ tu t’aja’ ti kwéntaj abal k’wajatakits u jálk’uyal jant’ini’ u ey.

Yab u kulbetnálak tin ajum nibal tin exóbal. Jaxtám u ko’oy ku lej tsápnanchij abal ku exóbna’ an Biblia. Pero k’ayúm k’ayúm, in tujey ku k’anidha’ a Jehová. Talbél, in tujey u ats’ál lej kidháb k’al jawa’ u t’ajámal ti biyál. Junchikíl u ats’álak lej t’e’pidh ani u tsálpayalak abal a Jehová yab ne’ets ti kin pákwlanchij jawa’ u t’ajámal. Tam u ats’alak antsaná’, u ajiyalak jawa’ in wat’a’ a David ani jant’ini’ ti pákwlanchat k’al a Jehová, nixé’ tin lej kanatbedhálak (2 Samuel 11:1–12:13).

K’e’at jant’oj axi u ats’álak lej k’ibat pel kin olnomáts (Mateo 28:19, 20). U ts’ejnálak max ku ela’ jita’ axi u odhnámal ti biyál. Pero k’ayúm k’ayúm, tixk’an jawa’ u ats’álak ani tujey u kulbetnál tin ólnom. U lej kulbetnálak ku ólna’ abal a Jehová pel jun i Dios axi u pákwlanchix.

AN ALWATALÁB AXI U BATS’UWAMAL:

In k’wajat ejat kom u exla’ a Jehová. Yan axi u júnkuwalak ti biyál, k’wajat ti wík’axte’ ani k’e’atchik tsemdháj. Pero naná’ in k’wajat lej kulbél, u kwa’al jun i aychixtaláb lej alabel. U exobnámal ku ko’oy i tsa’ataláb, antsaná’ yabáts in tsákulom, nibal in pejéx. Nixé’ in t’ajámal kin ne’dháxin alwa’ k’al axi k’e’at. In k’wajat tomkidh k’al jun i epchal axi in bij Carmen. Ti tsablóm, i tólmiyal an atiklábchik abal kin exla’ tin kwéntaj an Biblia.

Ani u lé’ abal ka exla’chik abal yabáts in kwe’, xowé’ in t’ojnal abal ku ela’ jawa’ u yéjenchal. Junchikíl in k’alelej ban bancos, pero yab abal tin kwe’, pel abal ku t’okdha’.